តាមបណ្តាញព័ត៌មានចិនផ្សាយថា ការប្រើប្រាស់ស្រានៅក្នុងប្រទេសបានធ្លាក់ចុះជាលើកដំបូងក្នុងឆ្នាំ២០១៣ បន្ទាប់ពីមានការកើនទ្បើងក្នុងរង្វង់២៥% ជារៀងរាល់ឆ្នាំជិតមួយទសវត្សមកនេះ ។ យោងតាមការសិក្សាថ្មីមួយលើទីផ្សារជាតិស្រវឹង និងស្រានៅលើពិភពលោកបានបង្ហាញថា ការធ្លាក់ចុះនៃអត្រាលក់ស្រានៅប្រទេសចិនមានចំនួន២%បើធៀបនឹងឆ្នាំ២០១២ ។ ប៉ុន្តែទោះជាយ៉ាងណាក៏ដោយ ភាពជឿជាក់នៃឧស្សាហកម្មផលិតស្រាលើពិភពលោកនៅក្នុងទីផ្សារដ៏ធំបំផុតប្រកបដោយសក្តានុពលមួយនេះ នៅតែមានដដែល ។ បច្ចុប្បន្នប្រទេសចិន គឺជាអ្នកទិញស្រាក្រហម ស្រាស ធំបំផុតទី៥លើពិភពលោក។
នៅក្នុងឆ្នាំ២០១៣ ប្រទេសចិនបានទិញស្រា ចំណុះ០,៧៥លីត្រចំនួន១៧១លានកេស ស្មើនឹងជាង៨០% នៃស្រាដែលផលិតក្នុងស្រុក ។ មិនតែប៉ុណ្ណោះ ចិនក៏បានជាប់ជាប្រជាជាតិដែលផលិតស្រាលំដាប់កំពូលទី៥ លើពិភពលោកផងដែរ នៅក្នុងឆ្នាំ២០១២ ។ ម៉្យាងទៀត តាមការសិក្សាបានឱ្យដឹងថា ការធ្លាក់ចុះនៅការលក់នេះ បានប៉ះពាល់ដល់ស្រាដែលផលិតក្នុងស្រុកសំខាន់ៗ ខណៈដែលស្រានាំចេញមិនមានកង្វល់ពីការរំខានដល់កំណើនទ្វេដងនៅចន្លោះឆ្នាំ២០០៧ និងឆ្នាំ២០១៣នោះទ្បើយ ៕
ចែករំលែកព័តមាននេះ