យោងតាមការចេញផ្សាយពីគេហទំព័របរទេសកាលពីពេលថ្មីៗនេះ បានឱ្យដឹងថា អ្នកគាំទ្ររាប់លាននាក់ បានធ្វើញត្តិតាមប្រព័ន្ធអនទ្បាញផ្ញើជូនគណៈកម្មាការអូទ្បាំពិករដូវរងា ដែលប្រារព្ធធ្វើទ្បើងនៅក្រុងស៊ូជី ប្រទេសរុស្ស៊ី ឱ្យបើកការស៊ើបអង្កេតលើលទ្ធផលពិន្ទុ ដែលបណ្តាលឱ្យរាជីនីសម្រស់ជិះស្គីលើទឹកកក គឹម យូណា បាត់បង់តំណែងជើងឯក ។
គេហទំព័រ Chosun បានបង្ហើបឱ្យដឹងថា ខ្លួនបានទទួលលទ្ធផលពិន្ទុ ដែលបង្ហាញថា ចៅក្រម៧រូប ក្នុងចំណោម៩រូប បានឱ្យពិន្ទុកីទ្បាការិនី គឹម យូណា ឈ្នះកីទ្បាការិនីម្ចាស់ផ្ទះរុស្ស៊ី នាង អាដែលលីណា សូនីកូវ៉ា ក៏ប៉ុន្តែលទ្ធផលសរុបទៅជាកីទ្បាការិនីម្ចាស់ផ្ទះជាអ្នកឈ្នះទៅវិញ ។ ពិន្ទុសរុបក្នុងតារាងបង្ហាញថា នាង សូនីកូវ៉ា ទទួលបានពិន្ទុ២២៤.៥៩នាំមុខ គឹម យូណា ដែលទទួលបានពិន្ទុ២១៩.១១ ។ ទោះជាតារាងពិន្ទុបង្ហាញយ៉ាងនេះក្តី ក៏អ្នកគាំទ្រយូណា នៅតែចោទប្រកាន់ថា ជាការកែប្រែលទ្ធផល ។
ជាមួយគ្នានេះដែរ កីទ្បាការិនីជិះស្គីចូលនិវត្តន៍របស់អាល្លឺម៉ង់ នាង Katarina Witt បានសម្តែងការមន្ទិលសង្ស័យចំពោះលទ្ធផលនេះដែរ ដោយនិយាយថា៖ «ខ្ញុំឆ្ងល់ខ្លាំងណាស់ចំពោះលទ្ធផលនេះ ខ្ញុំមិនយល់ពីការដាក់ពិន្ទុរបស់ចៅក្រមទាំងនោះទេ ។ តាមការគណនារបស់ខ្ញុំ គឹមយូហា គឺជាអ្នកទទួលបានជ័យជម្នះ» ។
ដោយទ្បែក លោក ម៉ាត់អាដាម អ្នកនាំពាក្យគណៈកម្មាការអូរទ្បាំពិកអន្តរជាតិ បាននិយាយថា៖ លោកមិនទាន់បានទទួលពាក្យបណ្តឹងជាផ្លូវការនៅទ្បើយទេ ពីសហព័ន្ធជិះស្គីរបស់ប្រទេសកូរ៉េ ហើយលោកនឹងបើកការស៊ើបអង្កេតភ្លាម ប្រសិនបើលោកទទួលបានពាក្យបណ្តឹង ។ ដោយទ្បែកម្ចាស់មេដាយប្រាក់ទាំងចម្រូងចម្រាស់នាង គឹម យូណា បាននិយាយថា នាងនឹងចូលនិវត្តន៍ បន្ទាប់ពីបរាជ័យទាំងមិនអស់ចិត្តនៅរុស្ស៊ីឆ្នាំ២០១៤ នេះ ៕
ចែករំលែកព័តមាននេះ