កម្ពុជាមានវត្តអារាមនៅពាសពេញផ្ទៃប្រទេស គ្រប់ទីតំបន់ទៅតាមជំនឿរបស់ប្រជាជន ។ ក្រៅពីវត្តដែលកកើតឡើងតាំងពីបុរាណកាលមក ក្នុងសម័យកាលបច្ចុប្បន្នក៏មានកកើតវត្ត ថ្មីៗបន្ថែមទៀត ។ តើបច្ចុប្បន្នមានវត្ត និងព្រះសង្ឃប៉ុន្មានអង្គ ?
យោងតាមឯកសាររបស់ក្រសួងធម្មការ និងសាសនា ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី២៧ នៅថ្ងៃទី២១ ធ្នូ ឆ្នាំ២០១៨ ឲ្យដឹងថា បច្ចុប្បន្នទៅទូទាំង ប្រទេសកម្ពុជា មានវត្តចំនួន៤.៩៨៥វត្ត ព្រះសង្ឃចំនួន៧០.៨៥៣អង្គ ក្នុងនោះគណៈមហានិកាយចំនួន៤.៧៤៤វត្ត ព្រះសង្ឃចំនួន៦៦.០៣៦អង្គ និងគណៈធម្មយុត្តិកនិកាយចំនួន២៤១វត្ត និងព្រះសង្ឃចំនួន៤៨១៧អង្គ ។
ចំនួនវត្ត និងព្រះសង្ឃទូទាំងប្រទេសនៅឆ្នាំ២០១៨នេះ សូមមើលប្រៀបធៀបជាមួយចំនួននៅឆ្នាំ២០១៧៖ អនុសំវច្ឆរៈមហាសន្និបាតសង្ឃទូទាំងប្រទេស លើកទី២៦ នាខែធ្នូឆ្នាំ២០១៧ បង្ហាញថា នៅទូទាំងប្រទេសកម្ពុជា មានវត្តសរុប ៤.៨៧២វត្ត និងព្រះសង្ឃ៦.៩១៩៩អង្គ ។
ក្នុងចំណោមវត្តទាំង៤.៨៧២វត្តនោះមានវត្តគណៈមហានិកាយ៤.៦៥៦វត្ត ចំណែកគណៈធម្មយុត្តិកនិកាយមានចំនួន ២១៦ វត្ត។ ចំណែកក្នុងចំណោមព្រះសង្ឃទាំង៦.៩១៩៩ អង្គ គឺមានព្រះសង្ឃគណៈមហានិកាយចំនួន៦៤ .៤០៧អង្គ និងព្រះសង្ឃគណៈធម្មយុត្តិកនិកាយចំនួន៤.៧៩២អង្គ ។
ក្រៅពីវត្តអារាម មានពុទ្ធិកសាកលវិទ្យាល័យនៅទូទាំងប្រទេស ចំនួន៣ គឺពុទ្ធិកសាកលវិទ្យាល័យព្រះសីហនុរាជ ពុទ្ធិកសាកលវិទ្យាល័យព្រះសីហមុនីរាជា និងពុទ្ធិកសាកលវិទ្យាល័យសម្តេចអគ្គមហាសេនាបតីតេជោហ៊ុន សែន កំពង់ចាម ។ ពុទ្ធិកសាកលវិទ្យាល័យព្រះសីហនុរាជ មានសាខាចំនួន២ គឺពុទ្ធិកសកលវិទ្យាល័យព្រះសីហនុរាជ កំពង់ឆ្នាំង និងពុទ្ធិកសាកលវិទ្យាល័យព្រះសីហនុរាជ បាត់ដំបង ៕ (កែសម្រួលដោយ ៖ បុប្ផា)
ចែករំលែកព័តមាននេះ