ខេម ចាន់ រំពឹងឈានឡើងទីផ្សារក្រោយកាន់ពានជើងឯក
- ភ្នំពេញ
ប្រទេសថៃ ៖ ក្រោយមានឈ្មោះជាម្ចាស់ពានជើងឯកTV5 Knock Out Series By K-Cement ក្នុងប្រភេទទម្ងន់៥៤គីឡូក្រាម កាលពីថ្ងៃទី៦…
ប្រទេសថៃ ៖ ក្រោយមានឈ្មោះជាម្ចាស់ពានជើងឯកTV5 Knock Out Series By K-Cement ក្នុងប្រភេទទម្ងន់៥៤គីឡូក្រាម កាលពីថ្ងៃទី៦ កក្កដា កីឡាករ ខេម ចាន់ មិនទាន់មានឱកាសឡើងប្រកួតនៅលើសង្វៀននៅឡើយទេ ទើបទទូចឱ្យមានការផ្គូផ្គងលោកឡើងប្រកួតបានញឹក ដើម្បីបានប្រាក់ផ្គត់ផ្គង់ជីវភាព ។
កីឡាករ ខេម ចាន់ និយាយថា ក្រោយទទួលបានតំណែងជាម្ចាស់ពានជើងឯក លោកមានក្ដីស្រមៃខ្ពស់ច្រើន ថាខ្លួននឹងមានទីផ្សារ ហើយមិនស្ងាត់ដូចពេលកន្លងមក ខណៈលោកក៏ត្រូវការតម្លៃខ្លួនខ្ពស់ជាងមុន ។ លោកថា ក្នុងពេលកំពុងប្រកួត លោកបានត្រឹមតែលួចស្រមៃមិនហ៊ានសង្ឃឹមនោះទេ ដោយសារតែក្នុងពេលនោះ កីឡាករដែលបានចូលប្រកួតដ្បិតថាមួយចំនួនគឺជាកីឡាករថ្មី ប៉ុន្តែសម្រាប់ថ្វីដៃគឺមិនធម្មតា ។
លោកអះអាងថា លោកមិនសូវមានការផ្គូផ្គងឱ្យប្រកួតនោះទេនាពេលកន្លងមក ខណៈការប្រកួតមួយលើកៗក៏មិនសូវជាបានតម្លៃខ្លួនខ្ពសដែរ។ អុីចឹងហើយទើបលោកសម្រេចចិត្តទៅធ្វើការមួយផ្សេងទៀតក្រៅពីការប្រដាល់ ប៉ុន្តែដោយសារមិនដាច់ចិត្ត ទើបនៅតែត្រាំត្រែងជាមួយអាជីពមួយនេះ ។ លោករំពឹងថា បំណាច់ក្លាយជាម្ចាស់ពាន គឺគួរតែបានប្រកួតញឹក និងបានតម្លៃខ្លួនខ្ពស់ មិនគួរយួរៗទើបមានការប្រកូតម្ដង និងមិនសូវបានតម្លៃខ្ពស់ តាមអ្វីដែលលោកចង់បាននោះទេ ជាពិសេសនៅក្នុងកាលៈទេសៈ ដែលលោកត្រូវការថវិកាច្រើនដើម្បីជីវភាពនាពេលនេះ។
ជាក់ស្ដែង ការប្រកួតមួយលើកៗ បើទូទាត់លាត់សើយ បូករួមជូនអ្នកឱ្យទឹករួចរាល់គឺសល់តែរង្វង់ប៉ុន្មានម៉ឺនប៉ុណ្ណោះ ដែលតម្លៃទទួលបាននេះ មិនស្មើនឹងការលះបង់ការងារខាងក្រៅ ហើយសម្ងំតែការហ្វឹកហាត់ដើម្បីត្រៀមខ្លួនមួយលើកៗនោះផង ទើបលោកចេះតែបាក់ទឹកចិត្តម្ដងៗពីការប្រដាល់ ។ លោកថា ជីវិតជាកីឡាករបានត្រឹមល្អមើលពេលនៅលើរេញប៉ុណ្ណោះ ប៉ុន្តែនៅពីក្រោយការប្រកួត គឺរូបលោកគ្រាន់តែជាកម្មករស៊ីឈ្នួលរកប្រាក់ដូចជាលីសែងដើម្បីដូរប្រាក់ប៉ុណ្ណោះ ។
លោកថា ខ្លួនស្រឡាញ់ការប្រដាល់ គឺដោយសារតែចង់ ល្បីឈ្មោះ និងសំខាន់គឺបានរកប្រាក់ដែលលោកយល់ថា ទោះជាត្រូវគេវាយបែកមុខបែកមាត់ក៏ធូរជាងទៅធ្វើការនៅថៃ និងស៊ីឈ្នួលគេនាពេលកន្លងមក ។ លោកថា ខ្លួនតស៊ូនៅក្នុងអាជីពមួយនេះក៏ច្រើនដែរ ដោយលោកប្រកាសថា នឹងខំប្រឹងឱ្យមានឈ្មោះចូលប្រកួតដណ្ដើមពាន ឬខ្សែក្រវាត់ ដើម្បីពង្រីកកេរ្តិ៍ឈ្មោះ ក្រែង មានឱកាសទទួលបានតម្លៃខ្លួនខ្ពស់ដើម្បីឱ្យលោកកាន់តែមានកម្លាំងចិត្ត ។
លោករំពឹងថា ចាប់ពីពេលនេះទៅ លោកនឹងទទួលបានឱកាសឡើងប្រកួតញឹកញាប់ និងបានតម្លៃខ្លួនសក្តិសមនឹងការប្រឹងប្រែង ។ ខេម ចាន់ បង្ហាញអារម្មណ៍ត្រេកអរយ៉ាងខ្លាំង ដែលទទួលបានចំណាត់ថ្នាក់លេខ១ក្នុងការប្រកួតជ្រើសរើសជើងឯកក្នុងពេលនោះ ប៉ុន្តែលោកថា ខ្លួនក៏មិនសប្បាយចិត្តនោះដែរនៅពេលលោកនៅតែមិនសូវមានសង្វៀនឡើងប្រកួត ខណៈដែលទឹកប្រាក់៤ពាន់ដុល្លារ ដែលលោកទទួលបានក៏ប្រើអស់ទៅហើយ។ លោកអះអាងថា ស្ថានភាពប្រដាល់របស់លោកនៅក្នុងពេលនេះ ទំនងជាកាន់តែល្អប្រសើរ ព្រោះមានគេស្គាល់ច្រើន ។
លោកថា បើខ្លួនមិនបានចូលប្រកួតក្នុងព្រឹត្តិការណ៍ជ្រើសរើសជើងឯកដែលទើបនឹងបញ្ចប់នេះទេ ក៏ប្រហែលមិនបានទឹកប្រាក់៤ពាន់ដុល្លារ និងបានក្លាយជាជើងឯកនោះដែរ ខណៈដែលលោករំពឹងថា ក្រោយពេលកាន់ពាននឹងទទួលបានឱកាសឡើងរេញបានញឹក និងបានឡើងប្រកួតលើរេញជាមួយកីឡាករបរទេសផង ដើម្បីទទួលបានទឹកប្រាក់តម្លៃខ្លួនខ្ពស់ ដែលមួយប្រកួតគឺអាចបានដល់រង្វង់ជាង៣០០ដុល្លារនោះ ។ លោកថា អ្វីដែលលោកចង់បានពីការលើកពាននេះ គឺបានឡើងរេញញឹកទទួលបានលុយច្រើន ដើម្បីកុំឱ្យលោកពិបាកដើរស៊ីឈ្នួលគេបន្ថែម ហើយពិបាកខ្លួន។
លោក សេង កដិកា អ្នករៀបចំការប្រកួតបានអះអាងថា កីឡាករ ខេម ខាន់ នឹងត្រូវរៀបចំឱ្យឡើងប្រកួតជាលក្ខណៈមិត្តភាពក្នុង ស្រុកជាមួយកីឡាករកម្ពុជា និងកីឡាករបរទេសឆាប់ៗ ដោយលោកបញ្ជាក់ថា ខេម ចាន់ គឺជាម្ចាស់ពាន បើគង់តែរៀបចំដាក់ឱ្យប្រដាល់ ក៏ត្រូវតែធ្វើឱ្យបានសមរម្យបន្តិចដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ