រាជធានីភ្នំពេញ ៖ ការប្រកួតប្រដាល់ក្បាច់គុនបុរាណខ្មែរជាលក្ខណៈមិត្តភាពអន្តរជាតិនៅលើសង្វៀនទូរទស្សន៍អប្សរា ដែលតែងតែរៀបចំធ្វើឡើងមួយខែម្តងក្រោមការជួយឧបត្ថម្ភធំពីណាហ្គាវើលនោះ បានវិលមកកំដរអារម្មណ៍ប្រិយមិត្តទស្សនិកជនដែលនិយមទស្សនាការប្រកួតប្រដាល់នៅថ្ងៃសៅរ៍ ទី២២ កុម្ភៈនេះ ដោយមានកីឡាករចំនួន៥គូ ក្នុងនោះគូប្រកួតលក្ខណៈមិត្តភាពអន្តរជាតិមានចំនួន៣គូ។
កីឡាករសារឹម ង៉ា មកពីសមាគមកីឡាប្រដាល់ក្រសួងការពារជាតិ ត្រូវជួបជាមួយកីឡាករថៃឈ្មោះ កាំបាំណាក ឯឈិន ក្វាន់ងុ៉យ មកពីក្លិបមកុដរាជសីហ៍ ជួបជាមួយកីឡាករថៃឈ្មោះ ថេវ៉ាស៊ីត ឃុនម៉ៈ ខណៈផុន ផាន់ណា មកពីក្លិបអប្សរាគុនខ្មែរ ជួបជាមួយកីឡាកររុស្ស៊ីឈ្មោះ Phandy ។
កីឡាករបរទេសទាំង៣រូបនេះមិនធ្លាប់មកប្រកួតជាមួយកីឡាករកម្ពុជាម្តងណាឡើយ ។ កីឡាករកាំបាំណាក ដែលមកជួបជាមួយ សារឹម ង៉ា លើកនេះទៀតនោះ ក៏គេមិនស្គាល់ពីប្រវត្តិប្រកួតច្បាស់លាស់នោះដែរ បុ៉ន្តែអ្នករៀបចំកម្មវិធីប្រកួតអួតថា គេជាជើងខ្លាំងម្នាក់ដែលពិបាកនឹងបង្ក្រាបបំផុត ។ ចំណែកឯ សារឹម ង៉ា វិញ បើទោះជាគេស្គាល់ថាជាជើងខ្លាំងម្នាក់ដែលមិនងាយរកគូប្រកួតបានក៏ដោយ បុ៉ន្តែសម្រាប់ការមកប៉ះ កាំបាំណាក លើកនេះគេមិនហ៊ាននិយាយថាម៉េចឡើយ ដោយសារតែគេមិនធ្លាប់ដឹងពីសមត្ថភាពកីឡាករថៃរូបនេះ ដូច្នេះមានតែរង់ចាំមើលលើការប្រកួតជាក់ស្តែងបុ៉ណ្ណោះ ។
ចំណែកឯ ឈិន ក្វាន់ងុ៉យ និងថេវ៉ាស៊ីត ឃុនម៉ៈ វិញនោះក៏អត់ដឹងពីប្រវត្តិប្រកួតច្បាស់លាស់ដូចគ្នា ។ ឈិន ក្វាន់ងុ៉យ មិនធ្លាប់ប្រកួតជាលក្ខណៈអន្តរជាតិម្តងណាឡើយ ទើបពេលមកប៉ះកីឡាករថៃដែលគេមិនស្គាល់ពីប្រវត្តិច្បាស់លាស់ពេលនេះធ្វើឱ្យគេមានមន្ទិលយ៉ាងខ្លាំងពីលទ្ធផលចុងក្រោយមិនដឹងថាទៅជាយ៉ាងណា ។ ផុន ផាន់ណា ជួបជាមួយកីឡាកររុស្ស៊ី Phandy នាពេលនេះក៏មិនដឹងថាយ៉ាងណានោះដែរ ។ ផុន ផាន់ណា ជាកីឡាករដែលបុិនប្រសប់ខាងប្រេើស្នៀតកែង និងជង្គង់ផ្តួលគូប្រកួត ហើយមួយរយៈមកនេះយីអ៊ុនរបស់គេឡើងខ្ពស់គួរសម ដោយគេមើលឃើញតាមរយៈការប្រកួតឈ្នះច្រើនជាងចាញ់ ទើបគេគិតថាកីឡាកររុស្ស៊ីដែលមកជួបគេលើកនេះប្រហែលទៅមិនរួចឡើយ ។
ក្រៅពីគូអន្តរជាតិនេះទៅ នៅមានការប្រកួតរវាងកីឡាករកម្ពុជាចំនួន២គូទៀត ក្នុងនោះកីឡាករកំពែង ខ្មៅ មកពីក្លិបវីអាយភី ជួបជាមួយកីឡាករហឹម សេរី មកពីក្លិបរាជសីហ៍បង្ក្រាបគ្រឿងញៀន និងកីឡាករបាង កាយ៉ាក មកពីក្លិបវីអាយភី ជួបជាមួយកីឡាករសឹុម សំ មកពីក្លិបកងរាជអាវុធហត្ថរាជធានីភ្នំពេញ ៕
ចែករំលែកព័តមាននេះ