រាជធានី​ភ្នំពេញ ៖ ក្រុមកីឡា​បាល់ទាត់​ជម្រើសជាតិ​នារី​កម្ពុជា នឹង​ត្រូវ​បន្ដ​ជួប​ក្រុម​ខ្លាំង​នារី​ហ្វី​លី​ពី​ន ការ​ប្រកួត​ជម្រុះ​ក្នុង​ពូ​ល G ជើងឯក​ប្រចាំ​ទ្វីបអាស៊ី AFC Women’s Asian Cup Australia 2026 វេលា​ម៉ោង​៧​យប់​ថ្ងៃ​ទី​២ ខែកក្កដា ឆ្នាំ​២០២៥ នៅ​ពហុ​កីឡដ្ឋាន​ជាតិ​អូ​ឡាំ​ពិ​ក​។

លោក Conor Nestor គ្រូបង្វឹក​ក្រុម​នារី​កម្ពុជា បាន​ចាត់​ទុក​ការ​ជួប​ក្រុម​នារី​ហ្វី​លី​ពី​ន​នៅ​យប់​នេះ គឺជា​ការ​ប្រកួតប្រជែង​កម្រិត​ខ្ពស់​មួយទៀត ព្រោះ​ក្រុម​របស់​លោក​លេង​ជាមួយ​ក្រុម​ដែល​បាន​លេង​ពានរង្វាន់​ពិភពលោក FIFA Women’s World Cup ដូច្នេះ​លោក​សង្ឃឹមថា ចំណុច​សំខាន់​ដែល​កីឡាការិនី​របស់​លោក​បាន​រៀនសូត្រ​កន្លង​មក គឺ​ត្រូវ​មាន​ទំនុកចិត្ត​លើ​ខ្លួនឯង​។

លោក​បាន​លើក​ឡើង​ថា ការ​ប្រកួត​មិត្តភាព​ជាមួយ​ហ្គាំ និង​ការ​ប្រកួត​បើក​ឆាក​ជាមួយ​ហុងកុង កូនក្រុម​របស់​លោក​សុទ្ធតែ​ធ្វើ​បាន​ល្អ​។ លោក​គិត​ថា​ផ្នែក​ខ្លះ ហុងកុង​លេង​ស្រ​ដៀង​គ្នា​ទៅ​នឹង​ហ្វី​លី​ពី​ន​ដែរ ដូច្នេះ​វា​គឺជា​ការ​ត្រៀមខ្លួន​ដ៏​ល្អ​សម្រាប់​ក្រុម​របស់​លោក ហើយ​លោក​នៅ​តែ​ជឿជាក់​លើ​កូនក្រុម​។

កត់​សម្គាល់ថា ក្រុម​នារី​ហ្វី​លី​ពី​ន​បាន​បង្ហាញខ្លួន​នៅ​ក្នុង​ការ​ប្រកួត​ពានរង្វាន់​ពិភពលោក FIFA Women’s World Cup ឆ្នាំ​២០២៣ ដោយ​ពួក​គេ​លេង​បាន​៣​ប្រកួត ឈ្នះ​នូ​វែ​ល​សេ​ឡង់ ហើយ​ចាញ់​ស្វី​ស និង​ន័​រ​វែ​ស​។

គួរ​បញ្ជាក់​ថា ជំនួប​រវាង​កម្ពុជា និង​ហ្វី​លី​ពី​ន​នៅ​យប់​នេះ គឺជា​ការ​ប្រកួត​ទី​២​ក្នុង​ពូ​ល G ដែល​ការ​ប្រកួត​ទាំងអស់​ពូ​ល​នេះ​រៀបចំ​ឡើង​នៅ​កម្ពុជា​។ ដ្បិត​ការ​ប្រកួត​បើក​ឆាក​កម្ពុជា​បាន​ស្មើ​ហុងកុង​លទ្ធផល ១-១ ចំណែក​ហ្វី​លី​ពី​ន​ឈ្នះ​អា​រ៉ាប់​ប៊ី​សា​អូឌីត​លទ្ធផល ៣-០​។ ដូច្នេះ​ការ​ប្រកួត​នៅ​យប់​នេះ កម្ពុជា​ត្រូវការ​ឈ្នះ​ចាំបាច់ ដើម្បី​រក្សា​ឱកាស​ប្រជែង​កៅអី​ទៅ​កាន់ការ​ប្រកួត​ពានរង្វាន់ AFC Women’s Asian Cup Australia 2026៕ រូបភាព ៖ សហព័ន្ធ​កីឡាបាល់ទាត់​កម្ពុជា និង Philippine Women’s National Football Team