រាជធានីភ្នំពេញ ៖ ការប្រកួតកីឡាសិស្សមធ្យមសិក្សាថ្នាក់ជាតិឆ្នាំ២០២៥ក្រោមប្រធានបទ«កីឡាបង្កើនបញ្ញាស្មារតី»បានប្រកាសបើកការប្រកួតជាផ្លូវការកាលពីល្ងាចថ្ងៃទី៧ ខែមិថុនាឆ្នាំ២០២៥ ក្រោមអធិបតីភាពឯកឧត្តមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា…
រាជធានីភ្នំពេញ ៖ ការប្រកួតកីឡាសិស្សមធ្យមសិក្សាថ្នាក់ជាតិឆ្នាំ២០២៥ក្រោមប្រធានបទ«កីឡាបង្កើនបញ្ញាស្មារតី»បានប្រកាសបើកការប្រកួតជាផ្លូវការកាលពីល្ងាចថ្ងៃទី៧ ខែមិថុនាឆ្នាំ២០២៥ ក្រោមអធិបតីភាពឯកឧត្តមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា នៅក្នុងវិមានពហុកីឡដ្ឋានជាតិអូឡាំពិក។
ឯកឧត្តមឧបនាយករដ្ឋមន្ត្រីហង់ជួន ណារ៉ុន បានមានប្រសាសន៍ក្នុងឱកាសនោះថា ការប្រកួតកីឡាសិស្សមធ្យមសិក្សានេះធ្វើឡើងក្នុងគោលបំណងបំផុសសកម្មភាពអប់រំកាយនិងកីឡានៅក្នុងគ្រឹះស្ថានសិក្សារាជធានីខេត្ត ផ្ដល់ឱកាសឱ្យសិស្សានុសិស្សជួបជុំលេងកីឡាដើម្បីសុខភាព ការរីចម្រើនផ្នែកបញ្ញាស្មារតី មានកាយសម្បទាមាំមួន និងឆន្ទះមោះមុត ។ ជាពិសេសជួយជំរុញលើកទឹកចិត្តដល់សិស្សានុសិស្សលេងកីឡាបង្កើនសមត្ថភាព បច្ចេកទេស ក្នុងការហ្វឹកហាត់ត្រៀមលក្ខណៈចូលរួមប្រកួតថ្នាក់ជាតិនិងអន្តរជាតិ។ មិនតែប៉ុណ្ណោះអាចចម្រាញ់កីឡាករ កីឡាការិនីថ្នាលល្អៗឱ្យពួកគេមានឱកាសអាចចូលទៅក្នុងក្រុមជម្រើសជាតិ ។
យើងដឹងហើយថា ចក្ខុវិស័យរបស់រាជរដ្ឋាភិបាល គឺលើកកម្ពស់វិស័យកីឡាផ្សារភ្ជាប់នឹងការអប់រំ និងការបន្តជំរុញចលនា«យុវជនម្នាក់ចេះកីឡាមួយប្រភេទយង៉ាតិចប្រចាំជីវិត»។
អ្វីដែលសំខាន់បំផុតនោះ ការប្រកួតកីឡាសិស្សមធ្យមសិក្សាថ្នាក់ជាតិឆ្នាំ២០២៥ ធ្វើឡើងដើម្បីអភិវឌ្ឍធនធានមនុស្ស ការកសាងក្រុមកីឡាករថ្នាលឆ្ពោះទៅឆ្នាំ២០២៩ ដែលកម្ពុជាទទួលធ្វើជាម្ចាស់ផ្ទះប្រកួតកីឡាយុវជនអាស៊ីលើកទី៥(5th Asian Youth Games 2029)។
ឯកឧត្តមប៉ុន សុខ អគ្គនាយកកីឡាបានឱ្យដឹងថា ការប្រកួតកីឡាសិស្សមធ្យមសិក្សាថ្នាក់ជាតិឆ្នាំ២០២៥ នឹងប្រព្រឹត្តិទៅចាប់ពីថ្ងៃទី៦ដល់ថ្ងៃទី១៥ ខែមិថុនា ឆ្នាំ២០២៥ លើ១៤ប្រភេទកីឡារួមមាន៖បាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូWT តេក្វាន់ដូITF ប៊ូលនិងប៉េតង់ គុនល្បុក្កតោ ហែលទឹក វ៉ូវីណាម គុនដាវ និងចំបាប់ ដែលមាន១៤២វិញ្ញាសា។ កីឡាករ កីឡាការិនីចូលរួមមកពី២៥រាជធានីខេត្តសរុបមានចំនួន៣៦២០នាក់ ៕
ចែករំលែកព័តមាននេះ