ខេត្តបន្ទាយមានជ័យ៖​ ក្មេងទំនើងពីរនាក់​បានត្រូវប៉ូលិសក្រុងប៉ោយប៉ែត​ធ្វើការឃាត់ខ្លួន​តាមពាក្យបណ្តឹងរបស់បុរសម្នាក់ ​បន្ទាប់ពីក្មេងទំនើង​ទំាងពីរបានយកដុំថ្មគប់ទៅលើ​ដើមបណ្តឹង​​បណ្តាលឲ្យរង​របួស​ឈាមពេញ​ផ្ទៃមុខដេរជាច្រើន​ថ្នេរនោះរួចមក ។​

ហេតុការណ៏ឃាត់ខ្លួននេះ​បានធ្វើឡើងនៅរសៀលថ្ងៃទី​១៩ កុម្ភៈ ​២០១៤ ​នៅចំណុចភូមិ​ផ្សារកណ្តាល ​សង្កាត់-ក្រុងប៉ោយប៉ែត ។

ក្មេងទំនើងទំាងពីរនាក់​រស់នៅភូមិ-​សង្កាត់ចាប់ខ្លួនខាងលើ ​ម្នាក់មាន​ឈ្មោះ តៅ សុខជា ​អាយុ១៨ឆ្នាំ ​និងឈ្មោះ ឃាង សុខឃឿន ​អាយុ១៨ឆ្នាំ ​។ ចំណែកបុរសដែលអះអាងថា​ជាជនរងគ្រោះ​និងជាដើម​បណ្តឹងឈ្មោះ​ ជូ ជន់ ​អាយុ២៨ឆ្នាំ រ​ស់នៅភូមិបាលិលេយ្យ​ សង្កាត់ប៉ោយប៉ែត ។

តាមសមត្ថកិច្ចបានឲ្យដឹងថា​ មុនពេលកើតហេតុ​ជនរងគ្រោះបានជិះម៉ូតូដើរ​លេងនៅចំណុចដើម​ស្រល់ក្បែរកាស៊ីណូមួយ​កន្លែងនៅក្រុងប៉ោយប៉ែត ​ខណៈនោះលេចមុខក្មេងទំនើង​ទំាងពីរនាក់​ដែលរៀន​នៅវិទ្យាល័យអូរជ្រៅ​ បានជិះម៉ូតូស្គុបពីមួយគ្រឿងអែបក្បែរ ​ហើយបានជេរទៅលើបុរសរូបនោះដោយមិនដឹង​មូលហេតុ ​ពេលនោះជនរងគ្រោះ​ក៏បានបង្អង់ម៉ូតូសួរ​នំាហើយក៏ជិះម៉ូតូ​ចេញទៅ ស្រាប់តែ​ក្មេងទំនើងទំាងពីរ​នាក់​បាន​រើសដុំថ្មជិះ​ដេញ​តាមពីក្រោយ និងគប់ទៅលើផ្ទៃមុខជនរងគ្រោះ​បណ្តាលឲ្យរបួសធ្ងន់ធ្ងរ​ដេរជាច្រើនថ្នេរតែម្តង ។

បច្ចុប្បន្ន ​ប៉ូលិសកំពុងកសាងសំណុំរឿង​បញ្ជូនក្មេងទំនើងទំាងពីរ​នាក់ទៅតុលាការចាត់ការ​តាមនីតិវិធីច្បាប់ ៕