ខេត្តកំពង់ស្ពឺ ៖ ក្រុមជនសង្ស័យជាមុខសញ្ញាកាប់ប្លន់យកម៉ូតូចំនួន០៥នាក់ ត្រូវបានកម្លាំងនគរបាលស្រុកភ្នំស្រួច សហការបង្ក្រាបបាន ខណៈដែលធ្វើសកម្មភាពស្ទាក់ប្លន់យកម៉ូតូពីជនរងគ្រោះហើយព្យាយាមជិះម៉ូតូគេចខ្លួន ប៉ុន្តែអស់លក្ខណ៍ត្រូវនគរបាលក្របួចជាប់ ។ ការតាមបង្ក្រាបក្រុមជនសង្ស័យស្ទាក់កាប់ប្លន់ម៉ូតូបាន កាលពីរំលងអធ្រាត្រថ្ងៃទី៧…
ខេត្តកំពង់ស្ពឺ ៖ ក្រុមជនសង្ស័យជាមុខសញ្ញាកាប់ប្លន់យកម៉ូតូចំនួន០៥នាក់ ត្រូវបានកម្លាំងនគរបាលស្រុកភ្នំស្រួច សហការបង្ក្រាបបាន ខណៈដែលធ្វើសកម្មភាពស្ទាក់ប្លន់យកម៉ូតូពីជនរងគ្រោះហើយព្យាយាមជិះម៉ូតូគេចខ្លួន ប៉ុន្តែអស់លក្ខណ៍ត្រូវនគរបាលក្របួចជាប់ ។ ការតាមបង្ក្រាបក្រុមជនសង្ស័យស្ទាក់កាប់ប្លន់ម៉ូតូបាន កាលពីរំលងអធ្រាត្រថ្ងៃទី៧ ខែកញ្ញា ឆ្នាំ២០២៥ នៅលើផ្លូវក្រាលកៅស៊ូមួយខ្សែ (ចំណុចត្រពាំងឱប ទៅឃុំព្រៃក្មេង) ក្នុងភូមិប្រាសាទ ឃុំមហាសាំង ស្រុកភ្នំស្រួច ខេត្តកំពង់ស្ពឺ ។
នគរបាលស្រុកសំរោងទងបាននិយាយឱ្យដឹងថា ម៉ូតូដែលក្រុមជនសង្ស័យធ្វើសកម្មភាពស្ទាក់ប្លន់បានសម្រេច ហើយព្យាយាមជិះគេចខ្លួននោះ ម៉ាកហុងដាសេ១២៥ ស៊េរីឆ្នាំ២០១៩ ពណ៌ខ្មៅ ពាក់ផ្លាកលេខ កណ្ដាល 1AE.7272 ម្ចាស់មានឈ្មោះ សាត រស់ ភេទប្រុស អាយុ២៣ឆ្នាំ រស់នៅភូមិពង្រ ឃុំតាំងក្រូច ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបានបន្តថា ក្រុមជនសង្ស័យជាចោរប្លន់ដែលឃាត់ខ្លួនបានមានឈ្មោះ ទី១~ ឈ្មោះ យ៊ាំង សុភ័ស ភេទប្រុស អាយុ២០ឆ្នាំ មុខរបរមិនពិតប្រាកដ ទី២~ ឈ្មោះ យ៊ាំង ភា ភេទប្រុស អាយុ១៨ឆ្នាំមុខរបរមិនពិតប្រាកដ ទី៣~ ឈ្មោះ ឆិល មករា ភេទប្រុស អាយុ១៥ឆ្នាំមុខរបរមិនពិតប្រាកដ ទាំង៣នាក់ខាងលើ រស់នៅក្នុងភូមិទឹកថ្លា ឃុំដំបូករូង ស្រុកភ្នំស្រួច ខេត្តកំពង់ស្ពឺ ទី៤~ ឈ្មោះ អ៊ុ ចាន់ដេត ភេទប្រុស អាយុ១៤ឆ្នាំមុខរបរមិនពិតប្រាកដ និងទី៥~ ឈ្មោះ ទឿង វាសនា ភេទប្រុស អាយុ១៤ឆ្នាំមុខរបរមិនពិតប្រាកដ ទាំង០២នាក់ រស់នៅក្នុងភូមិត្រាច ឃុំកាហែង ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបានបន្ថែមទៀតថា នៅមុនពេលកើតហេតុ និងឈានទៅដល់ធ្វើការឃាត់ខ្លួនក្រុមជនសង្ស័យជាចោរប្លន់ខាងលើ គឺនៅវេលាម៉ោង៨និង២០យប់ ថ្ងៃទី៧ ខែកញ្ញា ឆ្នាំ២០២៥ ឈ្មោះ សាត រស់ ភេទប្រុស អាយុ២៣ឆ្នាំ រស់នៅភូមិពង្រ ឃុំតាំងក្រូច ស្រុកសំរោងទង បានជិះម៉ូតូ ១គ្រឿង ម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៩ ពាក់ផ្លាកកណ្ដាល 1AE.7272 ចេញពីលេងផ្ទះឈ្មោះ គីម ស្រីខួច ភេទស្រី អាយុ ២០ឆ្នាំ រស់នៅភូមិក្រាំងពោធិ៍ ឃុំអូរ ស្រុកភ្នំស្រួច ខេត្តកំពង់ស្ពឺ តាមបណ្តោយផ្លូវជាតិលេខ៤ ពីទិសខាងលិចទៅទិសខាងកើត លុះពេលធ្វើដំណើរទៅដល់ចន្លោះបង្គោលគីឡូម៉ែត្រលេខ៥៦ ទៅលេខ៥៧ ស្ថិតនៅក្នុងភូមិពង្រធំ ឃុំកាហែង ស្រុកសំរោងទង ក៏ស្រាប់តែមានជនសង្ស័យចំនួន៥នាក់ជិះម៉ូតូចំនួន០២គ្រឿង ម៉ាកហុងដាសេ១២៥ ពណ៌ខ្មៅ តាមមកពីក្រោយ ហើយក៏បានយកកាំបិតខ្វេវដងដែកគំរាមកាប់មកលើរូបគេ ពេលនោះខ្លួនក៏បានផ្ដួលម៉ូតូចោល ហើយបានរត់គេចខ្លួន រីឯម៉ូតូត្រូវបានក្រុមជនសង្ស័យលើក
យកម៉ូតូជិះគេចខ្លួនទៅទិសខាងកើតបាត់។ ម្ចាស់ម៉ូតូក៏បានទៅដាក់ពាក្យបណ្តឹងឱ្យនគរបាលស្រុកភ្នំស្រួចជួយអន្តរាគមន៍ ស្វែងរកក្រុមជនសង្ស័យដែលធ្វើសកម្មភាពប្លន់យកម៉ូតូនោះ។
នគរបាលស្រុកសំរោងទងបានបញ្ជាក់ថា ក្រោយពេលទទួលបានពាក្យបណ្តឹងភ្លាម កម្លាំងនគរបាលជំនាញព្រហ្មទណ្ឌស្រុកសំរោងទង បានសហការជាមួយកម្លាំងនគរបាលប៉ុស្ដិឃុំកាហែង នគរបាលប៉ុស្តិឃុំធម្មតាអរ នឹងនគរបាលស្រុកភ្នំស្រួចបានធ្វើការអន្តរាគមន៍ ដេញប៉ផាប់ចាប់ប៉ផីង ដល់ផ្លូវក្រាលកៅស៊ូមួយខ្សែ ចំណុចភូមិប្រាសាទ ឃុំមហាសាំងស្រុកភ្នំស្រួច ខេត្តកំពង់ស្ពឺ ក៏បង្ក្រាបបានមុខសញ្ញាក្រុមជនសង្ស័យចំនួន០៥នាក់តែម្តង។
ក្រោយឃាត់សួរនាំក្រុមជនសង្ស័យបានឆ្លើយសារភាពថាពួកគេពិតជាបាន ធ្វើសកម្មភាពប្លន់យកម៉ូតូខាងលើពិតប្រាកដមែន។ កន្លងទៅក្រុមពួកគេធ្លាប់ធ្វើសកម្មភាពកាប់ប្លន់យកម៉ូតូ០១គ្រឿង កាលថ្ងៃទី៣១ ខែសីហា ឆ្នាំ២០២៥ ផ្លូវជាតិលេខ៤ បង្គោលគីឡូម៉ែត្រលេខ៦៧ ទៅលេខ៦៨ចំណុចភូមិត្រពាំងអត់ទឹកឃុំគីរីវន្ត ស្រុកភ្នំស្រួច ខេត្តកំពង់ស្ពឺ បានសម្រេច។
នគរបាលស្រុកសំរោងទងបានបញ្ជាក់បន្ថែមថា ក្រោយបង្ក្រាបបានក្រុមជនសង្ស័យជាចោរប្លន់ នគរបាលដកហូត បានម៉ូតូចំនួន០៣គ្រឿង ជារបស់ជនរងគ្រោះ០១គ្រឿង កាំបិតខ្វេវដងដែក០១ នឹងទូរស័ព្ទចំនួន០២គ្រឿង ផងដែរ។
បច្ចុប្បន្ន ក្រុមជនសង្ស័យរួមជាមួយនឹងវត្ថុតាង នគរបាលស្រុកភ្នំសំរោងទងបានកសាងសំណុំរឿង បញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ