ខេត្តបាត់ដំបង ៖ យុវជនម្នាក់ដែលគេស្គាល់ថា ជាកូនប្រុសរបស់មន្រ្តីចូលនិវត្តន៍ដ៏មានឥទ្ធិពលម្នាក់ ហើយដែលសង្ស័យថាស្រវឹងដល់កម្រិត បានបើករថយន្តបុកតូបអ្នកលក់ទំនិញរាយរង និងលក់សាំងដប បង្កឲ្យមានអគ្គិភ័យឆាបឆេះតូបអស់គ្មានសល់ ព្រមទាំងឆេះរបួសស្រ្តីម្ចាស់តូបម្នាក់ កាលពីវេលាម៉ោង៩និង២០នាទីយប់ថ្ងៃទី១៨ កុម្ភៈ នៅមុខក្លិបរាត្រីស្ដាឡាយ ស្ថិតក្នុងភូមិអូរតាគាំ៣ សង្កាត់ទួលតាឯក ក្រុងបាត់ដំបង ។
សមត្ថកិច្ចដែលចុះអន្តរាគមន៍និយាយថា អគ្គិភ័យនេះបង្កឡើងដោយសាររថយន្តម៉ាកISUZU trouper ពណ៌សម្បកឪឡឹក ពាក់ស្លាកលេខរដ្ឋសភា២-០៣៥ របស់លោកទេស ហ៊ាញ មន្រ្តីចូលនិវត្តន៍ ហើយត្រូវកូនប្រុសដែលស្រវឹងដល់កម្រិតបើកបុកតូបលក់សាំង ។ ប្រភពដដែលថា ស្រ្តីវ័យជាង៤០ឆ្នាំម្នាក់ឈ្មោះអេង ដែលជាម្ចាស់តូបបានរងរបួសដោយអគ្គិភ័យនេះ ហើយត្រូវសាច់ញាតិបញ្ជូនទៅសង្រ្គោះនៅមន្ទីរពេទ្យភា្លមៗដែរ ។ ប៉ុន្តែរថយន្តបង្កបានបើករត់ទាន់ពេលយកទៅលាក់ទុកក្នុងផ្ទះ ហើយត្រូវលោកទេស ហ៊ាញ ជាឪពុកចេញមករារាំងមិនឲ្យសមត្ថកិច្ចចូលសួរនាំកូនប្រុសនិងពិនិត្យរថយន្តដែលបង្កនោះទេ គឺធ្វើឱ្យនគរបាលខកចិត្តស្តូកតែម្តង ។
តាមការបំភ្លឺពីសាក្សីថា កូនប្រុសលោកទេស ហ៊ាញ បានបើករថយន្តមកពីទិសខាងកើតតាមសួនច្បារនាគបាញ់ទឹកក្នុងល្បឿនយ៉ាងលឿន លុះមកដល់ចំណុចខាងលើ ដែលជាផ្លូវកោងខ្លាំងបត់មិនទាន់ក៏ជ្រុលទៅបុកតូបលក់ទំនិញ និងលក់សាំងបង្កឲ្យមានអគ្គិភ័យតែម្ដង ។ សាក្សីបន្តថា រថយន្តបង្កនោះក៏ត្រូវភ្លើងឆាបឆេះដែរ ដោយសារតែសាំងបាចសាចលើ ។ រីឯអីវ៉ាន់និងសាំងត្រូវភ្លើងឆេះអស់គ្មានសល់ ប៉ុន្តែមិនបានរាលដាលដល់លំនៅឋាននៅក្បែរនោះទេ ដោយសារតែបានក្រុមសន្តិសុខក្លិបស្ដាឡាយប្រើបំពង់ឧស្ម័នជួយបាញ់ពន្លត់ ខណៈរថយន្តពន្លត់អគ្គិភ័យរបស់សមត្ថកិច្ចត្រៀមចេញអន្តរាគមន៍ដែរ ។ កោះសន្តិភាពមិនអាចសុំការបំភ្លឺពីលោកទេស ហ៊ាញ បានទេជុំវិញបញ្ហានេះ ។ ប៉ុន្តែតាមការស្រង់សម្តីសមត្ថកិច្ចបាននិយាយថា ពេលដែលសមត្ថកិច្ចដេញតាមរថយន្តបង្កនេះដល់ផ្ទះ បានឃើញលោកទេស ហ៊ាញ និងភរិយា ចេញមករារាំងនៅខាងមុខរបងផ្ទះ ហើយនិយាយថា លោកមិនឲ្យយករថយន្ត ឬឃាត់ខ្លួនកូនប្រុសលោកទេ ដោយសន្យាថា លោកនឹងធានាចេញមុខដោះស្រាយតាមផ្លូវច្បាប់ ។
សមត្ថកិច្ចបានដកថយដោយគ្មានអល់អែក និងដោយគ្មានចំណាត់ការតាមផ្លូវច្បាប់ភ្លាមៗឡើយ ក្រោយពីស្ដាប់លោកទេស ហ៊ាញ ពន្យល់បែបនេះ ដែលជាហេតុនាំឲ្យមានការរិះគន់យ៉ាងខ្លាំងចំពោះការអនុវត្តច្បាប់ពុំគ្មានតម្លាភាព ។ មតិខ្លះនិយាយថា ការអនុវត្តច្បាប់របស់សមត្ថកិច្ចទៅលើអ្នកមានអំណាចនៅតែគ្មានប្រសិទ្ធភាព ដោយកន្លែងដដែល បើទោះជាដឹងថា អ្នកមានអំណាចនោះមានកំហុសយ៉ាងណាក្ដី ។ រីឯប្រជាពលរដ្ឋទន់ខ្សោយមិនអាចគេចផុតពីច្បាប់ឡើយ សូម្បីតែមានកំហុសតិចតួចក្ដីច្បាស់ជាទាញកអាវបោះដាក់រថយន្តមិនខាន ។ ទោះជាយ៉ាងណារហូតមកដល់ពេលនេះ គេនៅមិនទាន់ដឹងថាភាគីទាំង២ជួបគ្នាដោះស្រាយបែបណាហើយនោះទេ បើទោះជាករណីនេះត្រូវធានាខុសត្រូវដោយលោកទេស ហ៊ាញ ដែលជាភាគីបង្កក្ដី ៕
ចែករំលែកព័តមាននេះ