ថៃ ៖ ថ្មីៗនេះ នាយកដ្ឋានគ្របគ្រងប្រព័ន្ធលូបង្ហូរទឹកទីក្រុងបាងកក បានចេញមុខមកបកស្រាយពន្យល់ដល់ប្រជាជនក្រុងបាងកក ចំពោះមូលហេតុដែលនាំឱ្យកើតមានជំនន់ទឹកភ្លៀងជន់លិចតំបន់មួយចំនួន ជាពិសេសរថភ្លើងក្រោមដី និងផ្សារចក្រតុចក្រ ថាគឺដោយសារតែពស់ថ្លាន់ដ៏ធំមួយក្បាល ។…
ថៃ ៖ ថ្មីៗនេះ នាយកដ្ឋានគ្របគ្រងប្រព័ន្ធលូបង្ហូរទឹកទីក្រុងបាងកក បានចេញមុខមកបកស្រាយពន្យល់ដល់ប្រជាជនក្រុងបាងកក ចំពោះមូលហេតុដែលនាំឱ្យកើតមានជំនន់ទឹកភ្លៀងជន់លិចតំបន់មួយចំនួន ជាពិសេសរថភ្លើងក្រោមដី និងផ្សារចក្រតុចក្រ ថាគឺដោយសារតែពស់ថ្លាន់ដ៏ធំមួយក្បាល ។
នាយកដ្ឋានគ្របគ្រងប្រព័ន្ធលូបង្ហូរទឹកទីក្រុងបាងកក បានរៀបរាប់ថា ពស់ថ្លាន់មួយក្បាលនេះបានវារចូលទៅក្នុងស្ថានីយ៍បូមទឹកតំបន់មាត់ប្រឡាយបាងខេន ហើយក៏កៀបជាប់នៅទីនោះ ហើយក្រោយមកក៏ងាប់នៅខាងក្នុងនោះបូកផ្សំជាមួយកាកសំណល់សំរាម និងមែកឈើដ៏ច្រើនសន្ធឹកបានកកស្ទះ នៅក្នុងប្រព័ន្ធបូមទឹកនេះទើបបណ្តាលឱ្យម៉ាស៊ីនបូមទឹកជាប់គាំងលែងដំណើរការ មិនអាចបូមរំដោះទឹកចេញទាន់ពេល ។
យ៉ាងណាក៏ដោយ ក្រោយពីរកឃើញមូលហេតុ មន្ត្រីជំនាញ បានទាញយកសាកសពពស់ថ្លាន់ដ៏ធំនោះចេញមកខាងក្រៅបានជោគជ័យទើបធ្វើឱ្យម៉ាស៊ីនបូមទឹកវិលមកដំណើរការធម្មតាឡើងវិញ ស្របពេលទីក្រុងបាកកក កំពុងត្រូវបានព្រមានឱ្យត្រៀមជើងព្រួលទប់ទល់នឹងទឹកជំនន់ទន្លេចៅប្រាយ៉ា ស្របគ្នានឹងការវាយប្រហារពីព្យុះត្រូពិក«តាប៉ាស» ។
អស់ពីរឿងឈឺក្បាលដោយសារពស់ថ្លាន់ ចូលដល់រឿងឈឺក្បាលដោយសារសត្វក្រពើវិញម្តង សេចក្តីរាយការណ៍ពីខេត្តរ៉ាក់យ៉ង បានឱ្យដឹងថា ដោយមានហេតុការណ៍ភ័យស្លន់ស្លោទាំងកណ្ដាលអធ្រាត្រ បន្ទាប់ពីទឹកជំនន់លិចផ្លូវ ស្រាប់តែមានក្រពើយក្សប្រវែងជាង២ម៉ែត្រមួយក្បាល បង្ហាញវត្តមាននៅដងផ្លូវ ត្រូវបានអាជ្ញាធរអំពាវនាវឱ្យប្រជាជនត្រូវបង្កើនការប្រុងប្រយ័ត្ន ។
ប្រភពពីសារព័ត៌មានបានបញ្ជាក់ នៅព្រឹកថ្ងៃទី០៩ ខែកញ្ញាថា ខេត្តរ៉ាក់យ៉ង នៅតែមានភ្លៀងធ្លាក់ខ្លាំងទាំងថ្ងៃទាំងយប់រហូតមកដល់ពេលនេះ បណ្តាស្រុកនានាជាច្រើន ត្រូវបានជន់លិចយ៉ាងល្ហល្ហេវ ជាពិសេស គឺទឹកជំនន់ដែលហូរពីព្រៃ បានរាលដាលមកដល់តំបន់អ្នកស្រុករស់នៅ ។
បន្ថែមលើរឿងទឹកជំនន់នេះ នៅត្រង់ទំនប់ទឹកមួយកន្លែងក្នុងឃុំម៉ាក់ខាមគូ ស្រុកនិគមផាត់ថាណា ប្រជាជនមានការភ័យខ្លាចយ៉ាងខ្លាំង ក្រោយពីប្រទះឃើញក្រពើដ៏ធំមួយក្បាលប្រវែងជាង២ម៉ែត្រឡើងមកដេកលើដងផ្លូវនៅក្នុងភូមិ ។ អ្នកភូមិនៅមិនទាន់ដឹងថា ក្រពើនេះ មកពីណាទេ តើវារស់នៅ និងរកចំណីក្នុងទំនប់ទឹកនោះ ឬយ៉ាងណានោះទេ ។ ដោយសារតែពេលយប់ ព្រមទាំងមានភ្លៀងធ្លាក់ និងទឹកជំនន់ផងនោះ មិនទាន់មានមន្ត្រីណាម្នាក់ចុះមកពិនិត្យ ឬចាប់ក្រពើនោះនៅឡើយទេ ។
ឆ្លើយតបនឹងវត្តមានសត្វក្រពើ ដើម្បីសុវត្ថិភាពប្រជាជន ក្រុមជួយសង្គ្រោះនៃមូលនិធិ Sawang Phorngkusol) និងអាជ្ញាធរស្រុកនិគមផាត់ថាណា បានចេញសេចក្តីព្រមានពីតំបន់គ្រោះថ្នាក់ និងជូនដំណឹងដល់ប្រជាជនឱ្យមានការប្រុងប្រយ័ត្ន និងហាមមិនឱ្យចុះនេសាទនៅតំបន់នោះឡើយ ។
សូមជម្រាបថា ក្រពើដ៏ធំមួយក្បាលនេះ ត្រូវបានគេប្រទះឃើញ និងថតជាប់នៅម៉ោងប្រហែល ១ទៀបភ្លឹថ្ងៃទី០៨ ខែកញ្ញា នៅត្រង់ទំនប់ច្រកលេង១៤ ហើយបានវារឆ្លងផ្លូវលេខ៣៦ មុននឹងលូនចុះចូលក្នុងអាងទឹកវិញ ហើយមកទល់នឹងពេលនេះ នៅនៅមិនទាន់រកឃើញនៅឡើយទេ ៕
ចែករំលែកព័តមាននេះ