ខេត្តកំពង់ចាម ៖ ពីមួយឆ្នាំទៅមួយឆ្នាំរដ្ឋបាលខេត្តបានខិតខំយកចិត្តទុកដាក់លើវិស័យជលផល ពិសេសការអភិរក្សបឹងធម្មជាតិសម្រាប់ជាជម្រកត្រីពងកូនក្នុងរដូវវស្សា ។ ជាក់ស្ដែង កាលពីព្រឹកថ្ងៃទី៨ ខែកញ្ញា ឆ្នាំ២០២៥កន្លងទៅ ឯកឧត្តម…
ខេត្តកំពង់ចាម ៖ ពីមួយឆ្នាំទៅមួយឆ្នាំរដ្ឋបាលខេត្តបានខិតខំយកចិត្តទុកដាក់លើវិស័យជលផល ពិសេសការអភិរក្សបឹងធម្មជាតិសម្រាប់ជាជម្រកត្រីពងកូនក្នុងរដូវវស្សា ។
ជាក់ស្ដែង កាលពីព្រឹកថ្ងៃទី៨ ខែកញ្ញា ឆ្នាំ២០២៥កន្លងទៅ ឯកឧត្តម អ៊ុន ចាន់ដា អភិបាលខេត្ត រួមជាមួយមន្ត្រីស្ថាប័នជំនាញ និងអាជ្ញាធរពាក់ព័ន្ធគ្រប់លំដាប់ថ្នាក់បានរៀបចំពិធីលែងកូនត្រីនិងកូនបង្កងជិត១០ម៉ឺនក្បាល នៅតំបន់បឹងធំ ស្ថិតក្នុងភូមិក្តីបឹង ឃុំវិហារធំ ស្រុកកំពង់សៀម ជាប់ព្រំប្រទល់ជាមួយស្រុកព្រៃឈរ និងកងមាស ។ ជាមួយនេះ អាជ្ញាធរបានបំផុសឲ្យសហគមន៍នេសាទទាំងអស់ ត្រូវខិតខំពង្រឹងសមត្ថភាពសហគមន៍នីមួយៗ ក្នុងការចូលរួមការពារអភិរក្សធនធានជលផលក្នុងសហគមន៍ លុបបំបាត់ការប្រើប្រាស់ឧបករណ៍ខុសច្បាប់ពីសមាជិកសហគមន៍ និងជនល្មើសក្រៅសហគមន៍ ។
ឯកឧត្តមអភិបាលខេត្ត បានថ្លែងថា កូនត្រីនិងកូនបង្កងជិត១០ម៉ឺនក្បាល ដែលយើងរួមគ្នាលែងនាពេលនេះ គឺមានអត្ថន័យនិងសារៈសំខាន់បំផុត សម្រាប់បំផុសស្មារតីប្រជាពលរដ្ឋ អាជ្ញាធរពាក់ព័ន្ធ និងវិស័យឯកជន ឱ្យចូលរួម យ៉ាងសកម្ម ក្នុងសកម្មភាពថែរក្សា ការពារ អភិរក្ស និងបង្កើនផល ស្តុកធនធានជលផល ក្នុងបឹងធម្មជាតិ ឱ្យកាន់តែសម្បូរឡើងថែមទៀត សម្រាប់ប្រជាពលរដ្ឋយើងប្រើប្រាស់ កាត់បន្ថយភាពក្រីក្រ និងបង្កើនជីវភាពរស់នៅផងដែរ ។
ជាមួយគ្នានេះ ឯកឧត្តមអភិបាលខេត្ត ក៏បានធ្វើការណែនាំដល់មន្ទីរកសិកម្ម រុក្ខាប្រមាញ់ និងនេសាទ ខណ្ឌរដ្ឋបាលជលផល ត្រូវចាត់វិធានការឱ្យបានម៉ឺងម៉ាត់បន្ថែមទៀតចំពោះជនល្មើស បំផ្លាញព្រៃលិចទឹកនៅគ្រប់ទីកន្លែង និងកិច្ចការពារកន្លែងអភិរក្សជលផល ដោយបន្តការងារ បង្ក្រាបបទល្មើសជលផលជាប្រចាំ ។
ពោលគឺត្រូវចាត់វិធានការគ្រប់បែបយ៉ាង ដោយផ្តោតសំខាន់ ទៅលើបទល្មើសដែលបំផ្លិចបំផ្លាញខ្លាំង ដូចជាឧបករណ៍ឆក់ ឧបករណ៍ស្បៃមុង និងការប្រើ សារធាតុពុល ដើម្បីចាប់ត្រីជាដើម ។អាជ្ញាធរក្រុង-ស្រុក ឃុំ-សង្កាត់ និងអង្គភាពនានា សូមចូលរួមឲ្យបានសកម្មថែមទៀតក្នុងចលនាលែងកូនត្រីនេះនៅគ្រប់ទីកន្លែង តាមមូលដ្ឋាននីមួយៗ ដើម្បីឱ្យក្លាយជាប្រពៃណីលែងកូនត្រី ព្រោះសកម្មភាពនេះពិតជាបានរួមចំណែកធ្វើឲ្យកើនឡើងនូវធនធានជលផលសម្រាប់ប្រជាពលរដ្ឋយើង កាត់បន្ថយភាពក្រីក្រ និងបង្កើនជីវភាពរស់នៅប្រចាំថ្ងៃ ៕
ចែករំលែកព័តមាននេះ