ប្រទេសស៊ីរី ៖ កងទ័ពស៊ីរីកាលពីថ្ងៃទី១១សីហាវាយដណ្ដើមយកបានមូលដ្ឋានមួយ នាភាគពាយ័ព្យប្រទេស ដែលនោះជាជោគជ័យដំបូងក្នុងការវាយលុករបស់ខ្លួន ក្នុងខេត្តអុីដលីបដែលនៅទីនោះ ការប្រយុទ្ធគ្នាដ៏សាហាវនានាបណ្ដាលឲ្យមនុស្សស្លាប់ជាង៦០នាក់។
ម្យ៉ាងវិញទៀតមីស៊ីលការពារអាកាសរុស្ស៊ីបានបាញ់នាពេលព្រលប់ ប្រឆាំងបណ្ដាដ្រូនដែលហោះមកពីទីតាំងកាន់កាប់ដោយពួកជីហាដ សំដៅមកកាន់មូលដ្ឋានអាកាសចរណ៍រុស្ស៊ី HMEIMIM ក្នុងខេត្តឡាតាគីយ៉េជិតខាង។ នេះជាការអះអាងរបស់អង្គការសិទ្ធិមនុស្សស៊ីរីOSDH ដែលមានប្រភពព័ត៌មានច្រើនក្នុងប្រទេស។
ខេត្តអុីដលីបនាភាគពាយ័ព្យស៊ីរីនិងមូលដ្ឋានជាច្រើនដែលនៅក្បែរគ្នា ដែលស្ថិតក្នុងដៃពួកជីហាដនិងក្រុមឧទ្ទាមឯទៀតៗក្នុងខេត្តជិតខាងហាម៉ា អាឡែបនិងឡាតាគីយ៉េ សុទ្ធតែជាគោលដៅនៃការទម្លាក់គ្រាបបែកនិងការបាញ់ផ្លោងដោយកាំភ្លើងធំស្ទើររាល់ថ្ងៃចាប់តាំងពីជាង៣ខែមកហើយ ពីសំណាក់របបស៊ីរីនិងសម្ព័ន្ធមិត្តរុស្ស៊ី។
យោងតាមលោករ៉ាមីអាប់ដែលរ៉ាហ៍ម៉ាន នាយករបស់OSDHថា កងទ័ពស៊ីរីដណ្ដើមកាន់កាប់នាព្រឹកព្រហាម មូលដ្ឋានអាល់ហាប៊ីត នាភាគខាងត្បូងខេត្តអីុដលីប ក្រោយការប្រយុទ្ធគ្នាយ៉ាងស៊ីសាច់ហុតឈាម ប្រឆាំងក្រុមជីហាដHAYAT TAHRIR AL CHAM ជាសាខាអាល់កៃដានៅស៊ីរី ព្រមទាំងក្រុមឧទ្ទាមដទៃៗទៀត។ នោះជាមូលដ្ឋានដំបូងដែលកងកម្លាំងស៊ីរីវាយដណ្ដើមយកបានក្នុងខេត្តអីុដលីប តាំងពីចាប់ផ្ដើមការវាយលុកពីដំណាច់ខែមេសាមក។
ការប្រយុទ្ធគ្នាដ៏សាហាវនៅអុីដលីបនាថ្ងៃទី១១សីហា បណ្ដាលឲ្យយុទ្ធជនទាំងសងខាងស្លាប់៦១នាក់ ក្នុងនោះមានទាហានស៊ីរី២១នាក់ និងយុទ្ធជនឧទ្ទាម៤០នាក់។ យោងតាម់OSDHថា មុននេះយុទ្ធជនដល់៧០នាក់បានត្រូវស្លាប់ក្នុងការប៉ះទង្គិចគ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ