ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី បានតែងតាំងប្រធានអង្គភាពស៊ើបការណ៍សម្ងាត់ លោកគីរីឡូ ប៊ូដាណូស (Kyrolo Budanov) ជាប្រធានក្រុមទីប្រឹក្សាកំពូលរបស់លោក។ ក្រៅពីនេះ…
ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី បានតែងតាំងប្រធានអង្គភាពស៊ើបការណ៍សម្ងាត់ លោកគីរីឡូ ប៊ូដាណូស (Kyrolo Budanov) ជាប្រធានក្រុមទីប្រឹក្សាកំពូលរបស់លោក។ ក្រៅពីនេះ លោកក៏បានតែងតាំងអ្នកឯកទេសខាងដ្រូន និងឌីជីថលជារដ្ឋមន្ត្រីការពារជាតិ។ ការតែងតាំងមន្ត្រីទាំង២រូបនេះធ្វើឡើងចំពេលដែលរដ្ឋាភិបាលទីក្រុងកៀវកំពុងខិតខំពង្រឹងសមត្ថភាពរបស់ខ្លួននៅក្នុងការចរចាបញ្ចប់សង្គ្រាម។
ការតែងតាំងលោកប៊ូដាណូសដែលជាអ្នកជើងចាស់ខាងវិស័យយោធា និងជាអ្នកដែលប្រជាជនអ៊ុយក្រែនគោរព និងឱ្យតម្លៃនោះជារបត់នយោបាយថ្មីនៅអ៊ុយក្រែនព្រោះប្រទេសនេះ និងប្រទេសភាគច្រើនមិនមានទម្លាប់តែងតាំងអ្នកមានបទពិសោធខាងយោធាឱ្យកាន់កាប់កិច្ចការស៊ីវិលបែបនេះទេ។ ការតែងតាំងលោកមីខាអ៊ីល ហ្វេដូរ៉ូស (Mikhail Fedorov) ជារដ្ឋមន្ត្រីការពារជាតិក៏ជាការរំលេចឱ្យឃើញថានៅក្នុងសង្គ្រាមសម័យទំនើប ការប្រើប្រាស់ដ្រូន និងបច្ចេកវិទ្យាជារឿងចាំបាច់ណាស់ដែលមិនអាចខ្វះបាន។ លោកហ្វេដេរ៉ូសធ្លាប់កាន់តំណែងជាឧបនាយករដ្ឋមន្ត្រីទី១ និងជារដ្ឋមន្ត្រីក្រសួងឌីជីថល។
លោកប៊ូដាណូសវ័យ៣៩ឆ្នាំត្រូវជំនួសតំណែងលោកអានដ្រី យេម៉ាក (Andriy Yermak) ដែលត្រូវបង្ខំចិត្តលាលែងពីតំណែងក្រោយផ្ទុះរឿងអាស្រូវពុករលួយបាត់លុយរាប់លានដុល្លារ។ មែនទែនទៅ លោកយេម៉ាកមិនបានស្ថិតនៅក្នុងបញ្ជីនៃជនសង្ស័យទេ។ ប៉ុន្តែក្នុងនាមជាប្រធានខុទ្ទកាល័យរបស់ប្រធានាធិបតី លោកត្រូវតែមានចំណែកទទួលខុសត្រូវ។
តាមរយៈការរុះរើក្បាលម៉ាស៊ីននៅក្នុងស្ថាប័នសំខាន់ៗដូចរៀបរាប់ខាងលើនេះ លោកហ្សេឡិនស្គីសង្ឃឹមថានឹងទទួលបានការជឿទុកចិត្តឡើងវិញពីសហគមន៍ជាតិ និងអន្តរជាតិ។ ពេលនេះជាគ្រាដ៏លំបាកសម្រាប់អ៊ុយក្រែនដែលហាក់ដូចជាចាញ់ប្រៀបរុស្ស៊ីទាំងសមរភូមិនយោបាយ និងយោធា។ រុស្ស៊ីចោទប្រកាន់ថាអ៊ុយក្រែនបានបញ្ជូនដ្រូន៩១គ្រឿងទៅវាយប្រហារគេហដ្ឋានរបស់លោកពូទីន។
រុស្ស៊ីលើកហេតុផលនេះទាមទារដាច់ខាតមិនបន្ធូរដៃឡើយនៅក្នុងការចរចា។ លោកត្រាំក៏បន្តដាក់សម្ពាធឱ្យអ៊ុយក្រែនប្រញាប់ទទួលយកផែនការសន្តិភាព និងចរចាឱ្យឆាប់ត្រូវរ៉ូវគ្នានឹងអាលបញ្ចប់សង្គ្រាមឆាប់ៗ។ ចំណែកនៅលើសមរភូមិយោធា កងទ័ពរុស្ស៊ីបន្តវាយទៅមុខជានិច្ចទោះបីដោយសន្សឹមៗយ៉ាងណាក្ដី។
ក្រោយការតែងតាំងមន្ត្រីទាំង២រូបខាងលើនេះ លោកហ្សេឡិនស្គីបង្ហោះសារនៅលើបណ្ដាញអ៊ិចថាអ៊ុយក្រែនចាំបាច់ត្រូវផ្ដោតការយកចិត្តទុកដាក់ខ្ពស់ចំពោះវិស័យសន្តិសុខ យោធា និងការទូត។ លោកសរសេរបន្តទៀតថាលោកគីរីឡូ ប៊ូដាណូស (Kirylo Budanov) មានបទពិសោធឆ្អិនឆ្អៅនៅក្នុងវិស័យទាំងនេះ និងមានថាមពលគ្រប់គ្រាន់ដើម្បីសម្រេចបានលទ្ធផលដូចការរំពឹងទុក។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ