រាជធានីភ្នំពេញ ៖ យុវជន ២នាក់ បានរងរបួសធ្ងន់ស្រាល ខណៈដែលពួកគេជិះម៉ូតូម៉ាកស៊ុយស៊ូគីឡេត ពណ៌ទឹកសមុទ្រលាយស ១គ្រឿង ពាក់ស្លាកលេខ ភ្នំពេញ 1BW-7774 ធ្វើដំណើរតាមមហាវិថីព្រះមុនីវង្ស ក្នុងទិសដៅពីត្បូងទៅជើង លុះមកដល់មុខស្ថានីយ៍ប្រេងឥន្ធនៈកាល់តិច ស្រាប់តែរថយន្តតាក់ស៊ីម៉ែត្ររបស់ក្រុមហ៊ុនមហាកំផែង ពណ៌ខៀវលាយទឹកប្រាក់ ១គ្រឿង ពាក់ស្លាកលេខ ភ្នំពេញ 2X-5965 ធ្វើដំណើរស្របទិសគ្នា បានឈប់ដាក់ភ្ញៀវជនជាតិចិន ហើយរ៉ឺយ៉ែថយក្រោយដោយមិនមានភ្លើងស៊ីញ៉ូ បណ្តាលឲ្យម៉ូតូបុកពីក្រោយ រួចរថយន្តថយមកថែមកិនលើម៉ូតូគាបជាប់តែម្តង។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១ និង ៤៥នាទី យប់រំលងអាធ្រាត្រឈានចូលថ្ងៃទី១៩ កុម្ភៈ ២០១៤ ស្ថិតក្នុងសង្កាត់ស្រះចក ខណ្ឌដូនពេញ។ ក្រោយបង្កគ្រោះថ្នាក់ហើយ អ្នកបើកបររថយន្តតាក់ស៊ីបង្កខាងលើ បានចេញមកបង្កជាជម្លោះពាក្យសម្តី និងបានហៅបក្ខពួកប្រមាណជា ១០រថយន្តតាក់ស៊ី មកព្រួតដេញវាយជនរងគ្រោះបណ្តាលឲ្យបែកក្បាល ខណៈដែលជនរងគ្រោះព្យាយាមរត់បាន ៥០ម៉ែត្រ បានប្រជាពលរដ្ឋជួយ និងសមត្ថកិច្ចចុះមកដល់អន្តរាគមន៍ភ្លាមៗ ចំណែកតៃកុងរថយន្តតាក់ស៊ីបានរត់គេចខ្លួនបាត់។
ក្រោយកើតហេតុ ទាំងម៉ូតូ និងរថយន្ត ត្រូវសមត្ថកិច្ចនាំយកទៅរក្សាទុកអធិការដ្ឋាននគរបាលខណ្ឌដូនពេញ ដើម្បីធ្វើការដោះស្រាយតាមផ្លូវច្បាប់៕
ចែករំលែកព័តមាននេះ