រាជធានីភ្នំពេញ ៖ រថយន្តស្ទូច ១គ្រឿង បានបត់ឆ្វេងឆ្លងផ្លូវ នៅត្រង់ចំណុចហាមមិនឲ្យបត់ ត្រលប់ក្រោយ បណ្ដាលឲ្យម៉ូតូម៉ាកហុងដាឌ្រីមសេ១២៥ មួយគ្រឿង ជិះគ្នា២នាក់…
រាជធានីភ្នំពេញ ៖ រថយន្តស្ទូច ១គ្រឿង បានបត់ឆ្វេងឆ្លងផ្លូវ នៅត្រង់ចំណុចហាមមិនឲ្យបត់ ត្រលប់ក្រោយ បណ្ដាលឲ្យម៉ូតូម៉ាកហុងដាឌ្រីមសេ១២៥ មួយគ្រឿង ជិះគ្នា២នាក់ ដែលកំពុងបើកបរធ្វើដំណើរក្នុងទិសដៅស្របគ្នា ក្នុងល្បឿនលឿន ទៅដល់វាក់គេចអត់ទាន់ ក៏ជ្រុលទៅបុកពីក្រោយរថយន្ត ដែលឆ្លងផ្លូវជិតផុតទៅហើយនោះ ពេញទំហឹង ហើយបុរសអ្នកបើកបរម៉ូតូបានស្លាប់ភ្លាមៗ រីឯអ្នករួមដំណើរម្នាក់របួសធ្ងន់ បន្ទាប់មក រថយន្តបង្ក បានបើករត់គេចទៅបាត់ ។
ឧប្បត្តិហេតុនោះបានកើតឡើងកាលពីវេលាម៉ោង០១និង៣០នាទីរសៀលថ្ងៃទី២៧ ខែសីហា ឆ្នាំ២០២៥ នៅតាមផ្លូវ៦០ម៉ែត្រ ស្ថិតនៅខាងត្បូងផ្សារអ៊ីអន៣ ក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
បុរសដែលស្លាប់ខាងលើនោះ មានប័ណ្ណចាក់វ៉ាក់សាំងការពារជំងឺកូវីដ១៩ ១សន្លឹកជាប់ខ្លួន ដែលមានឈ្មោះ ម៉ាក់ រតនា អាយុ ប្រហែលជាង៣០ឆ្នាំ ប៉ុន្តែអត់ទាន់ដឹងថា ស្នាក់នៅទីណានោះទេ ។ មិនតែប៉ុណ្ណោះ ក៏មិនទាន់ដឹងថា តើប័ណ្ណចាក់វ៉ាក់សាំង គឺជារបស់ជនរងគ្រោះមែន ឬមិនមែននោះដែរ ដោយឡែក អ្នករួមដំណើរមិនទាន់ត្រូវបានស្គាល់អត្តសញ្ញាណនៅឡើយទេ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ មានរថយន្តស្ទូច មិនចាំម៉ាក ១គ្រឿង បានបើកបរធ្វើដំណើរតាមផ្លូវ៦០ម៉ែត្រ ក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ ដែលជាចំណុចហាមបត់ត្រលប់ក្រោយ ស្រាប់តែរថយន្តនោះ បានបត់ឆ្វេងឆ្លងផ្លូវ ។ ចំណែកបុរសជនរងគ្រោះ២នាក់ខាងលើ បានជិះម៉ូតូ ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ 1LO-4442 តាមផ្លូវ៦០ម៉ែត្រ ក្នុងទិសដៅស្របគ្នាដែរ ហើយពេលទៅដល់បានវាក់គេចចេញអត់ទាន់ ក៏ជ្រុលទៅបុកពីក្រោយរថយន្តពេញទំហឹងតែម្ដង ។
សមត្ថកិច្ច បានប្រាប់ឲ្យដឹងបន្ថែមទៀតថា ពេលនោះបានបណ្ដាលឲ្យបុរស ដែលជាអ្នកបើកបរម៉ូតូស្លាប់បាត់បង់ជីវិតភ្លាមៗនៅនឹងកន្លែង ដោយឡែកអ្នករួមដំណើរម្នាក់ទៀត រងរបួសធ្ងន់ធ្ងរ បន្ទាប់មករថយន្តស្ទូចខាងលើបានបើករត់គេចទៅបាត់ ។
ក្រោយពេលកើតហេតុ នគរបាលខណ្ឌដង្កោ បានហៅរថយន្តមន្ទីរពេទ្យបង្អែកខណ្ឌដង្កោទៅដឹកយកអ្នករបួសធ្ងន់ទៅសង្គ្រោះបន្ទាន់នៅមន្ទីរពេទ្យព្រះកុសុមៈ រួចស្រាវជ្រាវរកសាច់ញាតិជនរងគ្រោះ ដើម្បីទៅទទួលយកសពទៅធ្វើបុណ្យ តាមប្រពៃណី ៕
ចែករំលែកព័តមាននេះ