ខេត្តកំពង់ស្ពឺ៖ អ្នកបើកបររថយន្តកងតឺន័រម្នាក់បានគៀបស្លាប់នៅក្នុងកាប៊ីនរថយន្តភ្លាមៗ ខណៈដែលរថយន្តកុងតឺន័របោះពួយព្រលះគ្នាចំពីមុខយ៉ាងពេញទំហឹងនៅលើផ្លូវជាតិលេខ៤បង្កឱ្យមានការភ្ញាក់ផ្អើលដល់អ្នកធ្វើដំណើរ ដោយឡែកអ្នកបើកបររថយន្តកុងតឺន័រម្នាក់ទៀតរត់គេចខ្លួនបាត់។
ហេតុការណ៍ខាងលើនេះបានកើតឡើង កាលពីវេលាម៉ោង១០និង១០នាទីយប់ថ្ងៃទី១៩ ខែកក្កដា ឆ្នាំ២០២៥ លើកំណាត់ផ្លូវជាតិលេខ៤ ចន្លោះបង្គោលគីឡូម៉ែត្រលេខ៣២~ទីលេខ៣៣ ត្រង់ចំណុចភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
នគរបាលស្រុកសំរោងទងបាននិយាយឱ្យដឹងថា ភាគីខាងរថយន្តកុងតឺន័រ១គ្រឿងម៉ាកហ៊ីយ៉ាន់ដាយ ពណ៌ស ពាក់ផ្លាកលេខភ្នំពេញ 3B-3862 សណ្តោងសឺមីរ៉ឺម៉ក់ពាក់ផ្លាកលេខភ្នំពេញ 4A-9094 អ្នកបើកបរឈ្មោះ សន ភារម្យ ភេទប្រុស អាយុ ៤០ឆ្នាំនៅភូមិភ្នំធំថ្មី ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ(បានស្លាប់ភ្លាមៗនៅក្នុងកាប៊ីន) ។ ចំណែកភាគីខាងរថយន្តកុងតឺន័រ១គ្រឿងទៀតម៉ាកហ្វ៊ុយសូ(FUSO) ពណ៌ស ពាក់ផ្លាកលេខតាកែវ 3A-3724 សណ្តោងសឺមីរ៉ឺម៉ក់ពាក់ផ្លាកលេខភ្នំពេញ 4B-0285 អ្នកបើកបរមិនស្គាល់អត្តសញ្ញាណ (បានរត់គេចខ្លួនបាត់ក្រោយពេលកើតហេតុ) ។
នគរបាលស្រុកសំរោងទងបាននិយាយឱ្យដឹងថា នៅមុនពេលកើតហេតុ មានរថយន្តកុងតឺន័រ១គ្រឿងម៉ាកហ៊ីយិនដាយ ពណ៌ស បានបើកបរតាមបណ្តោយផ្លូវជាតិលេខ៤ ក្នុងទិសដៅពីទិសខាងលិចទៅទិសខាងកើត លុះពេលធ្វើដំណើរមកដល់ចំណុចខាងលើបានបុកជាមួយរថយន្តកុងតឺន័រ១គ្រឿងទៀតម៉ាកហ្វ៊ុយសូ(FUSO) ពណ៌ស ដែលកំពុងបើកបរក្នុងទិសដៅបញ្ច្រាសទិសគ្នា ចំពីមុខយ៉ាងពេញទំហឹង បណ្ដាលឱ្យគៀបអ្នកបើកបររថយន្តកុងតឺន័រម្នាក់ស្លាប់ភ្លាមៗនៅកន្លែងកើតហេតុ។
នគរបាលស្រុកសំរោងទងបានបញ្ជាក់ថា ក្រោយកើតហេតុ នគរបាលជំនាញបានចុះទៅធ្វើការវាស់វែង នៅកន្លែងកើតហេតុ។ ចំពោះសពជនរងគ្រោះជាអ្នកបើកបររថយន្តកុងតឺន័រត្រូវបានរថយន្តសាមុយដឹកយកទៅតម្កល់នៅមន្ទីរពេទ្យបង្អែកខេត្តកំពង់ស្ពឺ រង់ចាំសាច់ញាតិមកទទួលយកទៅធ្វើបុណ្យតាមប្រពៃណី។
ដោយឡែករថយន្តទាំង ២គ្រឿងខាងលើរងការខូចខាតធ្ងន់ធ្ងរ នគរបាលជំនាញបានអូសយកទៅរក្សាទុកនៅអធិការដ្ឋាននគរបាលស្រុកសំរោងទង ដើម្បីធ្វើការដោះស្រាយ និងកសាងសំណុំរឿងបញ្ជូន បន្តចាត់ការតាមផ្លូវច្បាប់ ៕
ចែករំលែកព័តមាននេះ