ខេត្តកំពង់ស្ពឺ ៖ យ៉ាងហោចណាស់ជនជាតិឥណ្ឌូណេស៊ីប្រុស-ស្រី២នាក់ បានស្លាប់ភ្លាមៗនៅកន្លែងកើតហេតុ និង៣នាក់ផ្សេងទៀតរងរបួសធ្ងន់ ត្រូវបានដឹកបញ្ជូនយកទៅសង្គ្រោះភ្លាមៗនៅមន្ទីរពេទ្យ ខណៈដែលពួកគេជិះរថយន្តស៊េរីទំនើបមួយគ្រឿងម៉ាកហ្វដរ៉ាប់ទ័រ ជ្រុលទៅបុករថយន្តកុងតឺន័រពីក្រោយ ខណៈរថយន្តកុងតឺន័រខូចកំពុងចតលើផ្លូវ ។…
ខេត្តកំពង់ស្ពឺ ៖ យ៉ាងហោចណាស់ជនជាតិឥណ្ឌូណេស៊ីប្រុស-ស្រី២នាក់ បានស្លាប់ភ្លាមៗនៅកន្លែងកើតហេតុ និង៣នាក់ផ្សេងទៀតរងរបួសធ្ងន់ ត្រូវបានដឹកបញ្ជូនយកទៅសង្គ្រោះភ្លាមៗនៅមន្ទីរពេទ្យ ខណៈដែលពួកគេជិះរថយន្តស៊េរីទំនើបមួយគ្រឿងម៉ាកហ្វដរ៉ាប់ទ័រ ជ្រុលទៅបុករថយន្តកុងតឺន័រពីក្រោយ ខណៈរថយន្តកុងតឺន័រខូចកំពុងចតលើផ្លូវ ។
ហេតុការណ៍នេះ បានកើតឡើងកាលពីវេលាម៉ោង១០និង២០នាទីយប់ ថ្ងៃទី៧ ខែមករា ឆ្នាំ២០២៦ នៅលើផ្លូវល្បឿនលឿន បង្គោលគីឡូម៉ែត្រលេខ៧៥(+៤០០) ទិសដៅព្រះសីហនុ-ភ្នំពេញ ស្ថិតនៅក្នុងភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបានឱ្យដឹងថា នៅមុនពេលកើតហេតុ មានរថយន្តស៊េរីទំនើបម៉ាកហ្វដរ៉ាប់ទ័រ ពណ៌ប្រផេះ ពាក់ផ្លាកលេខ ព្រះសីហនុ ២D-៨៦៩១ បើកបរដោយឈ្មោះ Christoper ភេទប្រុស អាយុ៣២ឆ្នាំ ជនជាតិឥណ្ឌូណេស៊ី បានស្លាប់ភ្លាមៗនៅកន្លែងកើតហេតុ ស្នាក់នៅខេត្តព្រះសីហនុ និងអ្នករួមដំណេីរក្នុងរថយន្ដមានចំនួន៤នាក់ទៀត ក្នុងនោះស្រី២នាក់ ៖
១-ឈ្មោះ TiTin ភេទស្រី អាយុ២៨ឆ្នាំ ជនជាតិឥណ្ឌូណេស៊ី កាន់លិខិតឆ្លងដែនលេខE2025620(ស្លាប់ភ្លាមៗនៅកន្លែងកើតហេតុ) ។
២-ឈ្មោះ Ferdiansyah ភេទប្រុស អាយុ២៤ឆ្នាំ ជនជាតិឥណ្ឌូណេស៊ី កាន់លិខិតឆ្លងដែនលេខX7286830 (រងរបួសធ្ងន់) ។
៣-ឈ្មោះ Qeila WADHAHARA ភេទប្រុស អាយុ២៣ឆ្នាំ ជនជាតិឥណ្ឌូណេស៊ី កាន់លិខិតឆ្លងដែនលេខX5874411(រងរបួសធ្ងន់) ។
និង៤-ឈ្មោះ RATANA ភេទស្រី អាយុ៣០ឆ្នាំ ជនជាតិឥណ្ឌូណេស៊ី កាន់លិខិតឆ្លងដែនលេខX3173171(រងរបួសធ្ងន់) ។ ទាំង៤នាក់ស្នាក់នៅក្នុងក្រុងព្រះសីហនុ ខេត្តព្រះសីហនុ តែមិនដឹងថា ប្រកបមុខរបរអ្វីនោះទេ ។
តាមប្រភពព័ត៌មានឱ្យដឹងថា រថយន្តស៊េរីទំនើបខាងលើ បានបើកបរតាមបណ្តោយផ្លូវល្បឿនលឿន ពីទិសខាងលិចទៅទិសខាងកើត(ព្រះសីហនុ-ភ្នំពេញ) លុះពេលធ្វើដំណើរមកដល់ចំណុចកើតហេតុខាងលើ បានជ្រុលទៅបុកពីក្រោយរថយន្តសណ្តោងកុងតឺន័រ១គ្រឿងម៉ាក ហ៊ីយ៉ាន់ដាយ ពណ៌លឿងលាយបៃតង ពាក់ផ្លាកលេខ ភ្នំពេញ ៣B-៣៩៥៤ សណ្ដោងសឺមីរ៉ឺម៉ក ពាក់ផ្លាកលេខ ភ្នំពេញ ៤A-៨៤៥២ ដែលខូចចតនៅលើផ្លូវល្បឿនលឿន ពេញទំហឹង បណ្តាលឱ្យស្លាប់ និងរបួស ហើយអ្នកបើករថយន្តកុងតឺន័រ បានរត់គេចខ្លួនបាត់ ។
នគរបាលស្រុកភ្នំស្រួចបានបន្តឱ្យដឹងថា ក្រោយកើតហេតុ នគរបាលជំនាញបានចុះធ្វើការវាស់វែងនៅកន្លែងកើតហេតុ ហើយរថយន្តចំនួន២គ្រឿងបានរងការខូចខាតកម្រិតធ្ងន់មួយគ្រឿង ។ នគរបាលស្រុកភ្នំស្រួចបានបញ្ជាក់ថា ចំពោះសពជនរងគ្រោះទាំង២នាក់ ដឹកយកទៅតម្កល់ទុក រង់ចាំសាច់ញាតិ និងស្ថានទូតមកទទួលយក ៕
ចែករំលែកព័តមាននេះ