ព្រៃស ៖ មណ្ឌលអប់រំកែប្រែទី១ បានសម្រេចបញ្ជូនជនជាប់ឃុំសរុបចំនួន ៩៩នាក់ ទៅឃុំបន្តនៅមណ្ឌលអប់រំកែប្រែទី៤ និងពន្ធនាគារខេត្តកំពង់ឆ្នាំង ដើម្បីអនុវត្តយន្តការកាត់បន្ថយភាពចង្អៀតណែនក្នុងពន្ធនាគារ ។ ជាក់ស្តែងបើយោងតាម…
ព្រៃស ៖ មណ្ឌលអប់រំកែប្រែទី១ បានសម្រេចបញ្ជូនជនជាប់ឃុំសរុបចំនួន ៩៩នាក់ ទៅឃុំបន្តនៅមណ្ឌលអប់រំកែប្រែទី៤ និងពន្ធនាគារខេត្តកំពង់ឆ្នាំង ដើម្បីអនុវត្តយន្តការកាត់បន្ថយភាពចង្អៀតណែនក្នុងពន្ធនាគារ ។
ជាក់ស្តែងបើយោងតាម អគ្គនាយកដ្ឋានពន្ធនាគារ បានប្រកាសនារសៀលថ្ងៃទី០៨ ខែមករា ឆ្នាំ២០២៦ នេះថា ៖ មណ្ឌលអប់រំកែប្រែទី១ បានបញ្ជូនជនជាប់ឃុំចំនួន ៩៩នាក់ ទៅឃុំបន្តនៅមណ្ឌលអប់រំកែប្រែទី៤ និងពន្ធនាគារខេត្តកំពង់ឆ្នាំង ។
នៅព្រឹក ថ្ងៃទី០៨ ខែមករា ឆ្នាំ២០២៦ ឯកឧត្តម ឧត្តមអគ្គានុរក្ស.១ នុត សវនា អគ្គនាយករង និងជាប្រធានមណ្ឌលអប់រំកែប្រែទី១ បានអញ្ជើញចុះពិនិត្យចាត់តាំងកម្លាំងមន្ត្រីមណ្ឌលកែប្រែទី១ ចំនួន ១៩នាក់ ដឹកនាំដោយលោកឧត្តមអគ្គានុរក្ស.៣ យិន ភិរម្យ និងលោកឧត្តមអគ្គានុរក្ស.៣ សុក គឹមសាន អនុប្រធានមណ្ឌលទទួលផែនសន្តិសុខពន្ធនាគារ សហការជាមួយកម្លាំងនាយកដ្ឋានសន្តិសុខ នៃអគ្គនាយកដ្ឋានពន្ធនាគារ បានបញ្ជូនជនជាប់ឃុំ ទៅឃុំបន្តនៅមណ្ឌលអប់រំកែប្រែទី៤ ចំនួន៥០នាក់ និងពន្ធនាគារខេត្តកំពង់ឆ្នាំង៤៩នាក់ ។
ការបញ្ជូនជនជាប់ឃុំទៅឃុំបន្តនេះ គឺជាយន្តការមួយ ដើម្បីជួយកាត់បន្ថយភាពចង្អៀតណែនក្នុងពន្ធនាគារ ក្រៅពីនោះមណ្ឌលក៏បានខិតខំកសាង និងកែសម្រួលអគារឃុំ មួយចំនួនបន្ថែមទៀតផងដែរ។
ឆ្លៀតក្នុងឱកាសនោះដែរ ឯកឧត្តមប្រធានមណ្ឌល ក៏សូមប្រសិទ្ធពរជ័យ ដល់ថ្នាក់ដឹកនាំ និងមន្ត្រី សូមទទួលបានជោគជ័យ សម្រេចគ្រប់ភារកិច្ច ក្នុងការដឹកបញ្ជូនជនជាប់ឃុំ ទៅឃុំបន្តនៅគោលដៅកំណត់ ប្រកបដោយសុវត្ថិភាព៕
ចែករំលែកព័តមាននេះ