ខេត្តបន្ទាយមានជ័យ ៖ រថយន្តក្រុងដឹកអ្នកដំណើរ២គ្រឿង ដែលអ្នកបើកបរ២នាក់បានស្លាប់ដោយគ្រាប់ផ្លោងថៃបានក្លាយជាកន្លែងគោរពបូជានៅតាមបណ្តោយផ្លូវជាតិលេខ៥៦ ស្ថិតក្នុងភូមិកាប់ចោរ ឃុំភូមិថ្មី ស្រុកថ្មពួក ។ នៅល្ងាចថ្ងៃទី៧ ខែមករា…
ខេត្តបន្ទាយមានជ័យ ៖ រថយន្តក្រុងដឹកអ្នកដំណើរ២គ្រឿង ដែលអ្នកបើកបរ២នាក់បានស្លាប់ដោយគ្រាប់ផ្លោងថៃបានក្លាយជាកន្លែងគោរពបូជានៅតាមបណ្តោយផ្លូវជាតិលេខ៥៦ ស្ថិតក្នុងភូមិកាប់ចោរ ឃុំភូមិថ្មី ស្រុកថ្មពួក ។
នៅល្ងាចថ្ងៃទី៧ ខែមករា ឆ្នាំ២០២៦ ក្រុមប្រតិភូអគ្គិសនីកម្ពុជាដែលវិលត្រឡប់មកពីនាំយកអំណោយចែកជូនកងទ័ពជួរមុខប្រាសាទតាមាន់ហើយឆ្លងកាត់ទីនោះ បាននាំគ្នាពិនិត្យមើលរថយន្តក្រុងទាំង២គ្រឿង ដែលចតទុកអែបចិញ្ចើមផ្លូវជាតិលេខ៥៦ មុខក្រោយគ្នាដោយបែរមុខទៅស្រុកថ្មពួក និងមកពីស្រុកអូរជ្រៅ ។
អ្វីដែលត្រូវបានកត់សម្គាល់នោះគឺរថយន្តទាំង២ដែលមានស្នាមធ្លុះធ្លាយលើកញ្ចក់រថយន្តបានក្លាយជាកន្លែង គោរពបូជាពីសំណាក់អ្នកធ្វើដំណើរដែលឆ្លងកាត់ ខ្លះដាក់ផ្លែឈើ ខ្លះដាក់ដបទឹកដើម្បីបន់ស្រន់សុំសេចក្តីសុខ ។
លោក អែម សុខា អភិបាលស្រុកថ្មពួកបានរំលឹកថា កាលពីម៉ោង១២យប់ថ្ងៃទី៨ ខែធ្នូ ឆ្នាំ២០២៥ នៅតាមផ្លូវជាតិលេខ៥៦ ស្ថិតក្នុងភូមិកាប់ចោរ ឃុំភូមិថ្មី ស្រុកថ្មពួក មានរថយន្តក្រុង២គ្រឿងប្រភេទ១២កៅអី និងអ្នកបើកបរ២នាក់ បានស្លាប់ភ្លាមៗក្រោយចតរថយន្តក្បែរគ្នាបើកភ្លើងហូបបាយត្រូវទាហានថៃបាញ់គ្រាប់ផ្លោងធ្លាក់ត្រូវ បណ្តាលឱ្យស្លាប់ទាំង២នាក់នៅនឹងកន្លែង ។
លោកអភិបាលស្រុកបានបញ្ជាក់ទៀតថា ក្រោយរថយន្តក្រុងទាំង២គ្រឿង និងអ្នកបើកបរស្លាប់ទាំង២នាក់ រថយន្តត្រូវបានអាជ្ញាធរអូសមករក្សាទុកនៅឃ្លាតពីគ្នាប្រមាណជាង២០០ម៉ែត្រ ពីកន្លែងគ្រោះថ្នាក់ ព្រោះកន្លែងចាស់នៅក្បែរទ្រូងផ្លូវអាចប្រឈមគ្រោះថ្នាក់ដល់អ្នកដំណើរ ទើបអូសចេញមកដាក់ក្បែរខាងជើងផ្លូវក្បែរគ្នា ។
ដោយសារតែមានការគោរព ទៅតាមជំនឿតៗគ្នានៅជុំវិញរថយន្តក្រុងទាំង២គ្រឿង មានសុទ្ធតែទឹកបរិសុទ្ធ ត្រូវបានអ្នកដំណើរឆ្លងកាត់ដាក់ព័ទ្ធជុំវិញរថយន្តកាន់តែច្រើនឡើង ។
លោក អែម សុខា បានបញ្ជាក់ថា កន្លែងរថយន្តក្រុងទាំង២គ្រឿងនិងអ្នកបើកបរស្លាប់២នាក់ ត្រូវបានក្លាយជាកន្លែងគោរពបូជាពីសំណាក់អ្នកដំណើរដែលឆ្លងកាត់មានដាក់ដបទឹកបរិសុទ្ធបើកគម្រប និងដាក់ផ្លែឈើ ឬបាយកញ្ចប់ដាក់មុខរថយន្តទាំង២គ្រឿង ជាការគោរពនិងបូជាសុំសេចក្តីសុខនិងសេចក្តីចម្រើន និងដាក់បណ្តាសារឱ្យទាហានសៀមរលាយដូចអំបិលត្រូវទឹក ។
សូមរំលឹកថា អ្នកបើកបររថយន្តក្រុងដឹកអ្នកដំណើរ២នាក់ ដែលស្លាប់នេះ តាមក្រសួងការពារជាតិ តាមរយៈអ្នកនាំពាក្យ លោកជំទាវ ម៉ាលី សុជាតា ក៏បានប្រកាសពីការស្លាប់របស់ពលរដ្ឋទាំងពីរនាក់នេះ នៅព្រឹកថ្ងៃទី៩ ធ្នូ ២០២៥ថា យោធាថៃបើកការបាញ់ប្រហារមកលើកម្ពុជាកាន់តែខ្លាំងឡើង នៅភូមិសាស្ត្រស្រុកថ្មពួក ខេត្តបន្ទាយមានជ័យ បណ្ដាលឱ្យប្រជាពលរដ្ឋស៊ីវិលដែលកំពុងឈប់រថយន្ត ស្លាប់បាត់បង់ជីវិតចំនួន២នាក់ នៅចន្លោះបង្គោលគីឡូម៉ែត្រលេខ ៣៦-៣៧ ដោយសារគ្រាប់ផ្លោងរបស់យោធាថៃ ។
សមត្ថកិច្ចជំនាញបញ្ជាក់ថា ពលរដ្ឋខ្មែរដែលស្លាប់ទាំងពីរនាក់ជាអ្នកបើករថយន្តក្រុងដឹកអ្នកដំណើរមានឈ្មោះ ស៊ីម វឌ្ឍនៈ អាយុ៤៤ឆ្នាំ ជាអ្នករស់នៅរាជធានីភ្នំពេញ ។ ចំណែកឯជនរងគ្រោះទីពីរ មិនស្គាល់អត្តសញ្ញាណ ៕
ចែករំលែកព័តមាននេះ