ខេត្តស្ទឹងត្រែង ៖ នៅថ្ងៃទី៨ ខែមករា ឆ្នាំ២០២៦ ប្រធានមន្ទីរទេសចរណ៍ខេត្តស្ទឹងត្រែង បានដាក់ចេញនូវបទបញ្ជាណែនាំដល់ម្ចាស់សហគមន៍អេកូទេសចរណ៍តាមដងទន្លេមេគង្គលើ ឱ្យពង្រឹងជាបន្ទាន់នូវគុណភាព និងសុវត្ថិភាពនៃសេវាកម្មដឹកជញ្ជូនភ្ញៀវទេសចរ ក្នុងគោលបំណងលើកកម្ពស់វិស័យទេសចរណ៍ខេត្ត…
ខេត្តស្ទឹងត្រែង ៖ នៅថ្ងៃទី៨ ខែមករា ឆ្នាំ២០២៦ ប្រធានមន្ទីរទេសចរណ៍ខេត្តស្ទឹងត្រែង បានដាក់ចេញនូវបទបញ្ជាណែនាំដល់ម្ចាស់សហគមន៍អេកូទេសចរណ៍តាមដងទន្លេមេគង្គលើ ឱ្យពង្រឹងជាបន្ទាន់នូវគុណភាព និងសុវត្ថិភាពនៃសេវាកម្មដឹកជញ្ជូនភ្ញៀវទេសចរ ក្នុងគោលបំណងលើកកម្ពស់វិស័យទេសចរណ៍ខេត្ត ស្របពេលដែលតំបន់នេះកំពុងទាក់ទាញភ្ញៀវទេសចរយ៉ាងច្រើនកុះករក្នុងរដូវប្រាំងឆ្នាំ២០២៦នេះ ។
លោក អ៊ន ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានសង្កត់ធ្ងន់ពីសារសំខាន់នៃការរួមគ្នាក្នុងការផ្តល់សេវាកម្មប្រកបដោយគុណភាព និងមានសុវត្ថិភាពខ្ពស់ក្នុងអំឡុងពេលចុះពិនិត្យតំបន់រ៉ាមសារទន្លេមេគង្គលើ និងសហគមន៍ទេសចរណ៍កោះហាន កាលពីថ្ងៃទី០៧ មករា ឆ្នាំ២០២៦ ។
លោក អ៊ន ប៉ោសឿន បានលើកឡើងថា «ដើម្បីឱ្យភ្ញៀវមានកំណើនឡើង យើងត្រូវរួមគ្នាពង្រឹងសេវាកម្មឱ្យបានល្អ ប្រកបដោយគុណភាព និងមានសុវត្ថិភាព ធ្វើយ៉ាងណាឱ្យភ្ញៀវទេសចរមកលេងម្តងហើយចង់មកម្តងទៀត» ។ រមណីយដ្ឋានកោះហាន ត្រូវបានគេទទួលស្គាល់ថា ជាគោលដៅទេសចរណ៍ដ៏ពេញនិយមបំផុតមួយនៅខេត្តស្ទឹងត្រែងនាដើមឆ្នាំ២០២៦នេះ ។
លោក សេង សុធា អ្នកសម្របសម្រួលប្រចាំនៅរមណីយដ្ឋានកោះហានបានបញ្ជាក់ថា កោះហានបានទទួលភ្ញៀវទេសចរជាតិ និងអន្តរជាតិយ៉ាងច្រើន ព្រោះតំបន់នេះ មានភាពទាក់ទាញដោយសារទេសភាពធម្មជាតិដ៏ស្រស់ត្រកាល រួមមាន ព្រៃលិចទឹក កោះខ្សាច់ ទីតាំងបោះតង់កម្សាន្តពេលយប់ ទីតាំងអុំទូកកៃយ៉ាក់ និងឱកាសទស្សនាពពួកសត្វស្លាបកម្រនៅតាមតំបន់រ៉ាមសារ។
លោកបានលើកឡើងដែរថា ការចំណាយថវិកា និងពេលវេលាដ៏មានតម្លៃរបស់ភ្ញៀវទេសចរ ក្នុងការជិះទូកកម្សាន្តមើលតំបន់រ៉ាមសារតាមដងទន្លេ និងបោះតង់ស្នាក់នៅពេលយប់ គឺជាសូចនាករមួយដែលបង្ហាញពីការគាំទ្រយ៉ាងខ្លាំងដល់វិស័យទេសចរណ៍ក្នុងខេត្ត។
លោក យ៉ាយ ថុង អ្នកបម្រើសេវាប្រជាសហគមន៍ បានទទួលយកការណែនាំនេះ ដោយប្តេជ្ញាខិតខំពង្រឹងសេវាកម្មដឹកជញ្ជូន ធ្វើយ៉ាងណាឱ្យមានសុវត្ថិភាពកាន់តែខ្ពស់ ក្នុងការជូនភ្ញៀវទស្សនាតាមជុំរុំដើមរំចេង (ដែលមានទឹកហូររាក់ៗ) ទៅបោះតង់នៅកោះហាន និងទួលខ្សាច់កោះទន្សាយជាដើម ។
កញ្ញា វីរៈ ធីតា ភ្ញៀវទេសចរជាតិមកពីខេត្តត្បូងឃ្មុំ បានសម្តែងការពេញចិត្ត និងទទួលស្គាល់ថា តំបន់រ៉ាមសារ និងកោះហាន ពិតជាមានសក្តានុពលធនធានធម្មជាតិ និងជីវចម្រុះគ្រប់ប្រភេទ ។ កញ្ញាបានលើកឡើងថា ទេសភាពស្អាតៗនៅទីនេះពិតជាទីចាប់អារម្មណ៍របស់ភ្ញៀវ និងជាប្រភពទាក់ទាញដែលធ្វើឱ្យអ្នកមកទស្សនាមិនខកបំណងឡើយ។
ជាការឆ្លើយតប ទៅនឹងកំណើនភ្ញៀវទេសចរ និងការណែនាំរបស់មន្ទីរទេសចរណ៍ សហគមន៍ទេសចរណ៍កោះហាន បានប្តេជ្ញាចិត្តរួមគ្នាសម្រាប់ឆ្នាំ២០២៦នេះថា និងផ្តល់សេវាកម្មជូនភ្ញៀវដោយសុវត្ថិភាពខ្ពស់ ។ បន្ថែមបរិមាណទូកកែយ៉ាក់ចំនួន២០ទូក ។ ដាក់កម្លាំងប្រចាំការតាមចំណុចនីមួយៗ ដើម្បីធានាសណ្តាប់ធ្នាប់ និងសុវត្ថិភាព ។ លក់ដូរមិនតម្លើងថ្លៃ ដើម្បីរក្សាភាពទាក់ទាញ ។ រក្សាតម្លៃសេវាដឹកជញ្ជូនទូកមួយនៅត្រឹមតែ១៥ ដុល្លារប៉ុណ្ណោះ ។
ការរៀបចំខ្លួន និងការពង្រឹងសេវាកម្មរបស់សហគមន៍អេកូទេសចរណ៍ខេត្តស្ទឹងត្រែង នឹងចូលរួមចំណែកយ៉ាងសំខាន់ក្នុងការរក្សាលំនឹងកំណើនភ្ញៀវទេសចរ និងធ្វើឱ្យខេត្តស្ទឹងត្រែងនៅតែជាគោលដៅអេកូទេសចរណ៍ឈានមុខគេមួយនៅកម្ពុជា ៕
ចែករំលែកព័តមាននេះ