ខេត្តប៉ៃលិន ៖ ស្រ្តីម្នាក់រងរបួសយ៉ាងធ្ងន់ធ្ងរ ត្រូវបងប្អូន និងអ្នកជិតខាងដឹកយកទៅសង្គ្រោះនៅមន្ទីរពេទ្យបង្អែកខេត្ត ខណៈដែលនាងអង្គុយម្នាក់ឯងនៅផ្ទះម្តាយបង្កើតរបស់ខ្លួន ស្រាប់តែអតីតប្តី ដែលទើបតែលែងលះគ្នាបាន ៤ខែ យកពូថៅមកលួចកាប់ពីក្រោយបណ្តាលឲ្យត្រូវក្បាលរងរបួសផ្នែកខាងស្តាំ ដេរអស់ ៣ថ្នេរ របួសដៃខាងស្តាំដេរអស់ ៥ថ្នេរ (ម្រាមដៃ ២ថ្នេរ) រយះជង្គង់ខាងស្តាំ ពោរក្បាលផ្នែកខាងក្រោយ សន្លប់ជាច្រើនម៉ោង។
ហេតុការណ៍អតីតប្តីលួចកាប់ប្រហារនេះ បានកើតឡើងកាលពីវេលាម៉ោង ៣ និង ៣០នាទី រសៀលថ្ងៃទី១៧ កុម្ភៈ ២០១៤ ស្ថិតនៅផ្ទះម្តាយបង្កើតឈ្មោះ ពៅ រ៉ាត់ អាយុ ៥៧ឆ្នាំ នៅក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ហើយត្រូវសមត្ថកិច្ចប៉ុស្តិ៍នគរបាលរដ្ឋបាលសង្កាត់អូរតាវ៉ៅ ចាប់ឃាត់ខ្លួននៅវេលាម៉ោង ៤រសៀល ថ្ងៃដដែល។
ស្រ្តីរងគ្រោះឈ្មោះ មាស ស្រីមុំ អាយុ ៣២ឆ្នាំ មានស្រុកកំណើតរស់នៅភូមិព្រះម្លូ ឃុំបឹងខ្នារ ស្រុកបាកាន ខេត្តពោធិ៍សាត់ មានកូនចំនួន ២នាក់ ទី១. ឈ្មោះ មាស វិច្ឆិកា ភេទស្រី អាយុ ១២ឆ្នាំ ទី២. ឈ្មោះ មាស សីលា ភេទប្រុស អាយុ ១១ឆ្នាំ ហើយជនបង្កជាប្តីឈ្មោះ ជូ សារី អាយុ ៤៩ឆ្នាំ ជាជាងផ្ទះ មានស្រុកកំណើតរស់នៅភូមិខ្នារ ខេត្តបាត់ដំបង ទាំងពីរនាក់ប្តីប្រពន្ធមករស់នៅខេត្តប៉ៃលិន អស់រយៈពេល ១៤ឆ្នាំ កន្លងមកហើយនៅភូមិកើតហេតុខាងលើ។
លោក គង់ សំណាង នាយប៉ុស្តិ៍រដ្ឋបាលនគរបាលសង្កាត់អូរតាវ៉ៅ បានឲ្យដឹងថា មូលហេតុរហូតឈានដល់ប្តីយកពូថៅទៅកាប់ប្រហារប្រពន្ធប៉ងសម្លាប់នេះ ដោយសារតែភ្លើងប្រចណ្ឌ ព្រោះមុនពេលកើតហេតុប្តីរបស់នាងតែងតែរករឿងវាយដំប្រពន្ធ និងរស់នៅមិនចុះសម្រុងគ្នា រហូតដល់ប្រពន្ធប្តឹងមេភូមិសុំលែងលះប្តីអស់រយៈពេល ៤ខែ មកហើយ តែមិនបានធ្វើតាមប្រព័ន្ធតុលាការនោះទេ។
លោក គង់ សំណាង បន្តទៀតថា ក្រោយពីលែងលះរួច បុរសបង្កហេតុបានចោទប្រពន្ធរបស់ខ្លួនថា មានទំនាក់ទំនងជាមួយបុរសផ្សេង ទើបយកពូថៅដើរទៅលួចកាប់ប្រពន្ធពីក្រោយបណ្តាលឲ្យរងរបួសតែម្តង។ ខាងលោកបានរៀបចំសំណុំរឿងបញ្ជូនទៅការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្ត ដើម្បីចាត់ការទៅតាមនីតិវិធីច្បាប់៕
ចែករំលែកព័តមាននេះ