ខេត្តកណ្ដាល ៖ ស្ត្រីម្នាក់បានសម្រេចចិត្តបញ្ចប់ជីវិតរបស់ខ្លួន ដោយជិះម៉ូតូ មកលោតពីលើស្ពានអ្នកលឿង ចូលទឹកទន្លេលិចបាត់ ដោយបន្សល់ទុកតែស្បែកជើងមួយគូ និងម៉ូតូ១គ្រឿង នៅលើស្ពានប៉ុណ្ណោះ ។…
ខេត្តកណ្ដាល ៖ ស្ត្រីម្នាក់បានសម្រេចចិត្តបញ្ចប់ជីវិតរបស់ខ្លួន ដោយជិះម៉ូតូ មកលោតពីលើស្ពានអ្នកលឿង ចូលទឹកទន្លេលិចបាត់ ដោយបន្សល់ទុកតែស្បែកជើងមួយគូ និងម៉ូតូ១គ្រឿង នៅលើស្ពានប៉ុណ្ណោះ ។
ហេតុការណ៍នេះបានកើតឡើងកាលពីវេលាម៉ោង១០ព្រឹក ថ្ងៃទី៥ ខែកញ្ញា និងបានធ្វើឱ្យប្រជាពលរដ្ឋអ្នកធ្វើដំណើរឆ្លងកាត់ មានការភ្ញាក់ផ្អើល និងចោមរោមមើលយ៉ាងកកកុញនៅលើស្ពាន ត្សឹបាសា ហៅស្ពានអ្នកលឿង ។
សមត្ថកិច្ចដែលប្រចាំការនៅលើស្ពានអ្នកលឿងនោះ បានឲ្យដឹងថា មុនពេលកើតហេតុអ្នកដំណើរ ដែលកំពុងឈរថតរូបលេងនៅលើស្ពាន បានឃើញនារីម្នាក់ វ័យប្រហែល ៣០ឆ្នាំ ពាក់អាវយឺតពណ៌ខ្មៅ ជិះម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AB-4489 ធ្វើដំណើរតែម្នាក់ឯង មកពីទិសខាងលិច ពេលមកដល់លើស្ពានចំណុចកើតហេតុ នាងបានឈប់ចតម៉ូតូ រួចដោះស្បែកជើងទុកនៅលើខឿនបង្កាន់ដៃស្ពាន ដោយគ្មាននិយាយអ្វីមួយម៉ាត់ ហើយក៏លោតចូលទឹកទន្លេលិចបាត់ឈឹងតែម្ដង ។
ក្រោយកើតហេតុភ្លាម ក៏ធ្វើឲ្យមានការផ្អើលឆោឡោឡើង ហើយអ្នកខ្លះបានទាញទូរសព្ទថតឡាយបង្ហោះហ្វេសប៊ុកភ្លាមៗ ចំណែកឯសមត្ថកិច្ចស្រុកលើកដែក ក៏បានចេញទូកតាមរកស្ត្រី ដែលលោតទឹកនោះភ្លាមៗ ដើម្បីជួយសង្គ្រោះ ប៉ុន្តែរកមិនឃើញ។
លោក អាំ ធូ អធិការនគរបាលស្រុកលើកដែក បានឲ្យដឹងនៅវេលាម៉ោង៣រសៀល ថ្ងៃទី៥ កញ្ញានេះថា ប្ដីរបស់ស្ត្រី ដែលលោតទឹកនោះបានមកដល់ហើយ និងកំពុងចេញតាមរកសពប្រពន្ធជាមួយនិងកម្លាំងសមត្ថកិច្ច ប៉ុន្តែលោកមិនទាន់ប្រាប់ពីអត្តសញ្ញាណស្ត្រី ដែលលោតទឹកនោះទេ ដោយគ្រាន់តែប្រាប់ថា កំពុងធ្វើការ ។
ទោះជាយ៉ាងណាក៏ដោយ ប្រភពពីសមត្ថកិច្ចស្រុកលើកដែក បានបង្ហើបប្រាប់ថា ស្ត្រីដែលលោតសម្លាប់ខ្លួនពីលើស្ពានអ្នកលឿងនោះ មានស្រុកកំណើតនៅឯខេត្តស្វាយរៀង ហើយមានប្ដី និងរស់នៅជាមួយគ្នានៅស្រុកកៀនស្វាយ ខេត្តកណ្ដាល ហើយមូលហេតុដែលធ្វើឲ្យនាងដាច់ចិត្តមកលោតទឹកសម្លាប់ខ្លួននេះ គឺដោយសារតែខឹងនឹងប្ដីរបស់នាង ប៉ុន្តែខឹងរឿងអ្វីនោះ គេនៅពុំទាន់ដឹងច្បាស់ទេ ។
គួរបញ្ជាក់ផងដែរថា រយៈពេល៩ខែ ឆ្នាំ២០១៥នេះ ស្ពានអ្នកលឿង មានអ្នកមកលោតទឹកសម្លាប់ខ្លួន២ករណីហើយ ដោយករណីទីមួយកើតឡើងនៅអំឡុងខែមីនា អ្នកលោតទឹកជាយុវជនម្នាក់ ហើយបីថ្ងៃក្រោយគេបានរកឃើញសាកសពអណ្ដែតនៅមាត់ច្រាំង ក្នុងស្រុកពាមជរ។ ចំណែកករណីទី២ គឺស្ត្រីដែលលោតសម្លាប់ខ្លួននៅព្រឹកថ្ងៃទី៥ កញ្ញានេះតែម្ដង ៕
ចែករំលែកព័តមាននេះ