កីឡាករវាយកូនបាល់លំដាប់ទី១ពិភពលោក រ៉ាហ្វាអែល ណាដាល់ បានអះអាងថា កិច្ចការទី១ដែលខ្លួនត្រូវធ្វើក្រោយជាសះស្បើយពីរបួសឆ្អឹងខ្នងគឺ ចូលរួមប្រកួតក្នុងព្រឹត្តិការណ៍ Rio Open ដែលនឹងចាប់ផ្តើមក្នុងពេលឆាប់ៗខាងមុខនេះ ។ ម្ចាស់ពានក្របខ័ណ្ឌធំ ១៣ជំនាន់រូបនេះបានបញ្ឈប់រាល់សកម្មភាពនៅលើទីលានទាំងអស់ចាប់តាំងពីពេលរូបគេបរាជ័យក្រោមថ្វីដៃកីឡាករស្វ៊ីស
កីឡាករវាយកូនបាល់លំដាប់ទី១ពិភពលោក រ៉ាហ្វាអែល ណាដាល់ បានអះអាងថា កិច្ចការទី១ដែលខ្លួនត្រូវធ្វើក្រោយជាសះស្បើយពីរបួសឆ្អឹងខ្នងគឺ ចូលរួមប្រកួតក្នុងព្រឹត្តិការណ៍ Rio Open ដែលនឹងចាប់ផ្តើមក្នុងពេលឆាប់ៗខាងមុខនេះ ។ ម្ចាស់ពានក្របខ័ណ្ឌធំ ១៣ជំនាន់រូបនេះបានបញ្ឈប់រាល់សកម្មភាពនៅលើទីលានទាំងអស់ចាប់តាំងពីពេលរូបគេបរាជ័យក្រោមថ្វីដៃកីឡាករស្វ៊ីស Stanislas Wawrinka ក្នុងវគ្គផ្តាច់ព្រ័ត្រក្របខ័ណ្ឌធំ Australian Open ។
ថ្លែងក្នុងសន្និសីទកាសែតមួយ កាលពីថ្ងៃសុក្រ កីឡាករវ័យ២៧ឆ្នាំ រូបនេះបញ្ជាក់ថា ៖«និយាយពីការប្រកួតនៅប្រទេសប្រេស៊ីល នាំឱ្យខ្ញុំមានអារម្មណ៍ល្អ ។ ខ្ញុំមានទំនាក់ទំនងដ៏ល្អអស្ចារ្យមួយជាមួយអ្នកគាំទ្រនៅទីនោះ ។ប្រេស៊ីលជាប្រទេសពិសេសមួយ ហើយខ្ញុំសង្ឃឹមថានឹងទទួលបានបទពិសោធន៍បន្ថែមទៀត» ។តាមគម្រោងតារាងប្រកួត ណាដាល់ នឹងត្រូវប៉ះជាមួយដៃគូដែលស័ក្តិសមក្នុងសមាគម ATP Tour ។ ប៉ុន្តែ រហូតមកទល់នឹងពេលនេះ ដៃគូនោះ គេមិនទាន់ដឹងថាឈ្មោះអ្វីនៅឡើយទេ។
ទោះជាដូច្នេះក្តី ណាដាល់ នៅមិនទាន់ប្រាកដក្នុងចិត្តថា តើខ្លួននឹងធ្វើដូចម្តេចក្នុងករណីរបួសលាប់ឡើងវិញ ។ គេបាននិយាយថា ៖
«យើងនឹងចាំមើលថាតើវាវិវឌ្ឍទៅដូចម្តេច ។ សង្ឃឹមថា ខ្ញុំអាចអត់ធ្មត់និងទ្រាំទ្របាន» ។ ណាដាល់ ពេញចិត្តនឹងអនុស្សាវរីយ៍ជាច្រើនដែលខ្លួនមាននៅប្រទេសប្រេស៊ីល ។ ទីនោះហើយដែលរូបគេបានយកឈ្នះពានកម្មវិធី Costa do Sauipe ATP ក្នុងវ័យ១៨ឆ្នាំ ។ មួយវិញទៀត ការប្រកួតលើកដំបូងរបស់គេក្នុងឆ្នាំ២០១៣ ក្រោយការឈប់សម្រាកព្យាបាលរបួសអស់៧ខែ គឺនៅទីនោះផងដែរ ។ ណាដាល់ បានយកឈ្នះពាន Brazil Open នៅក្រុង Sao Paulo ។ គេបានថ្លែងថា ៖ «ការយកឈ្នះជើងឯកកម្មវិធី Costa do Sauipe ATP កាលឆ្នាំ២០០៥ គឺជាចំណុចចាប់ផ្តើមនៃជោគជ័យក្នុងអាជីពរបស់ខ្ញុំ ។ ឆ្នាំ២០០៥ គឺជារដូវមួយដ៏អស្ចារ្យជាងគេក្នុងអាជីព ដ្បិតខ្ញុំបានយកឈ្នះពានជើងឯកដល់ទៅ១១លើក» ។
ណាដាល់ បានទទួលស្គាល់ថា បំណងតែមួយគត់ដែលខ្លួននៅមិនទាន់សម្រេចបាន និងចង់សម្រេចឱ្យខាងតែបានគឺយកឈ្នះមេដាយមាសព្រឹត្តិការណ៍កីឡាអូឡាំពិករដូវក្តៅឆ្នាំ២០១៦ នៅក្រុងរីយ៉ូ ប្រទេសប្រេស៊ីល ។ គេបានថ្លែងថា ៖ «វាគឺជាការលំបាកណាស់ក្នុងការទស្សន៍ទាយអ្វីដែលនឹងកើតមានក្នុងរយៈពេលពីរឆ្នាំកន្លះខាងមុខ ប៉ុន្តែខ្ញុំត្រូវបានលើកទឹកចិត្តឱ្យទៅចូលរួមការប្រកួតកីឡាអូឡាំពិក នៅឆ្នាំ២០១៦» ។
គេបានបន្តថា៖«ជាការពិតដែលថា ការប្រកួតកីឡាអូឡាំពិកនៅលើតារាងដីឥដ្ឋនឹងផ្តល់ការលើកទឹកចិត្តបន្ថែមឱ្យខ្ញុំបានបន្តិច ។ ទោះជាយ៉ាងណា ការធ្វើជាអ្នកតំណាងប្រទេសខ្លួនឯងនៅព្រឹត្តិការណ៍កីឡាអូឡាំពិកគឺពិតជារឿងអស្ចារ្យបំផុតក្នុងអាជីព ជាពិសេសកាលក្នុងព្រឹត្តិការណ៍អូឡាំពិកក្រុងប៉េកាំង ឆ្នាំ២០០៨» ៕
ចែករំលែកព័តមាននេះ