រាជធានីភ្នំពេញ ៖ ជនសង្ស័យឆក់ ២នាក់ ក្នុងចំណោមបក្ខពួក ៣នាក់ ត្រូវបានជនរងគ្រោះជាម្ចាស់កាបូប និងបងប្អូន នាំគ្នាដេញចាប់បាននៅចំណុចផ្លូវលេខ៣៣៥ កែងផ្លូវ២៥៥ ក្នុងសង្កាត់បឹងសាឡាង ខណ្ឌទួលគោក កាលពីវេលាម៉ោង ៧យប់ ថ្ងៃទី១៧ កុម្ភៈ ២០១៤ បន្ទាប់ពីធ្វើសកម្មភាពឆក់កាបូបស្ពាយពីស្រ្តីជាជាងអ៊ុតសក់ម្នាក់បានសម្រេច នៅផ្លូវលេខ២០៥ សង្កាត់ទួលស្វាយព្រៃទី២ ខណ្ឌចំការមន ហើយព្យាយាមជិះម៉ូតូរត់គេចខ្លួន។
ជនសង្ស័យទាំងមានឈ្មោះ ១. ជួប សុផាន់ណា ភេទប្រុស អាយុ ២៥ឆ្នាំ ស្នាក់នៅផ្លូវរថភ្លើង សង្កាត់ទឹកល្អក់ទី១ ខណ្ឌទួលគោក ២. រឿង សម្បត្តិ ភេទប្រុស អាយុ ២៦ឆ្នាំ ស្នាក់នៅភូមិចំរើនផល សង្កាត់បឹងទំពុន ខណ្ឌមានជ័យ។ ជនសង្ស័យទាំង ២នាក់នេះ បន្ទាប់ពីធ្វើសកម្មភាពឆក់កាបូបបានហើយបានព្យាយាមជិះម៉ូតូរត់គេចខ្លួន តែត្រូវជនរងគ្រោះ និងបងប្អូន រួមទាំងមានការអន្តរាគមន៍ពីសមត្ថកិច្ចខណ្ឌទួលគោក ទើបធ្វើការចាប់ឃាត់ខ្លួនបាន។
តាមប្រភពព័ត៌មាន បានឲ្យដឹងថា ស្រ្តីរងគ្រោះបានជិះម៉ូតូ ២នាក់ បងប្អូនកំពុងធ្វើដំណើរតាមផ្លូវ ដោយមានប្តីជាជនជាតិម៉ាឡេស៊ី ជិះជាមួយបងប្អូនដែរតាមពីក្រោយ លុះមកដល់ផ្លូវ២០៥ ស្រាប់តែមានជនសង្ស័យ ៣នាក់ ជិះម៉ូតូឌ្រីមC125 ស៊េរី២០១២ ពណ៌ខ្មៅ ១គ្រឿង ពាក់ស្លាកលេខ ភ្នំពេញ 1CF-0298 ធ្វើសកម្មភាពឆក់កាបូបតែម្តង។ ក្រោយឃាត់ខ្លួនជនសង្ស័យ សមត្ថកិច្ចបានដកហូតបានកាបូបមកវិញ ដោយក្នុងនោះមាន លុយចំនួន ២៤០ដុល្លារ អាយផេត ១គ្រឿង កាតធនាគារ (ATM) មួយចំនួន ប៉ុន្តែ ជនរងគ្រោះបាននិយាយថា មានបាត់ប្រាក់ ១០០០ដុល្លារ និងចិញ្ចៀនមាស ៤ជី។
ជនសង្ស័យទាំង ២នាក់ ខាងលើ ត្រូវបានសមត្ថកិច្ចបញ្ជូនខ្លួនទៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរបន្ត៕
ចែករំលែកព័តមាននេះ