រាជធានីភ្នំពេញ ៖ ជនសង្ស័យម្នាក់ គឺជាមុខសញ្ញាចោរកម្ម (ឆក់) ដែលធ្លាប់ជាប់ពន្ធនាគារជាង៣ឆ្នាំ ដោយសារឆក់ទ្រព្យសម្បត្តិអ្នកដំណើរតាមផ្លូវ ហើយទើបតែចេញមកវិញ ប្រកបរបរថ្មី ជាអ្នកដឹកជញ្ជូនអីវាន់អនឡាញ…
រាជធានីភ្នំពេញ ៖ ជនសង្ស័យម្នាក់ គឺជាមុខសញ្ញាចោរកម្ម (ឆក់) ដែលធ្លាប់ជាប់ពន្ធនាគារជាង៣ឆ្នាំ ដោយសារឆក់ទ្រព្យសម្បត្តិអ្នកដំណើរតាមផ្លូវ ហើយទើបតែចេញមកវិញ ប្រកបរបរថ្មី ជាអ្នកដឹកជញ្ជូនអីវាន់អនឡាញ បានប៉ុន្មានខែប៉ុណ្ណោះ។ ជននេះ មិនរាងចាលឡើយ ក៏ចាប់យកមុខរបរចាស់ ដែលធ្លាប់ប្រព្រឹត្ត (ឆក់) ឡើងវិញ ហើយបានធ្វើសកម្មភាព ជិះម៉ូតូឆក់ខ្សែ កពីស្ត្រីម្នាក់ ដែលកំពុងជិះម៉ូតូតាមផ្លូវ ។ ខណៈនោះបណ្ដាលឲ្យជនរងគ្រោះដួលរបួសស្រាល និងស្រែកចោៗ ហើយជនសង្ស័យយកខ្សែ កជិះម៉ូតូគេចខ្លួន ជ្រុលទៅបុកម៉ូតូកង់បីកំពុងឈប់ស្ងៀម បណ្ដាលឲ្យដួលរបួសស្រាលដែរ ត្រូវប្រជាពលរដ្ឋឃាត់បាន វាយទាត់ធាក់ទ្រមខ្លួនរួចទើបប្រគល់ឲ្យនគរបាល ។
ហេតុការណ៍ខាងលើនោះ បានកើតឡើង នៅវេលាម៉ោង៩និង៣៥នាទីព្រឹកថ្ងៃទី២ ខែកញ្ញា ឆ្នាំ២០២៥ នៅតាមផ្លូវជាតិលេខ៤ ត្រង់ចំណុចមុខផ្សារជម្ពូវ័ន ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ថា ជនសង្ស័យម្នាក់នោះឈ្មោះ មាស ណិត អាយុ១៩ឆ្នាំ មុខរបរដឹកជញ្ជូន មានទីលំនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ជិះម៉ូតូម៉ាកហុងដាស្កូបពី ស៊េរីឆ្នាំ២០២៥ ពណ៍ស បិទស្កុតពណ៍ខ្មៅ ពាក់ស្លាកលេខភ្នំពេញ 1LU-9224 ហើយម៉ូតូនេះ ត្រូវបានដកហូតទុក ព្រោះជាមធ្យោបាយជិះធ្វើសកម្មភាពឆក់ ។
នគរបាល បានប្រាប់ឲ្យដឹងបន្តទៀតថា ដោយឡែកស្ត្រីរងគ្រោះឈ្មោះ អ.ស.ផ អាយុ៣៥ឆ្នាំ មុខរបរលក់ដូរ មានទីលំនៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ។ ជិះម៉ូតូ១គ្រឿង ម៉ាកហុងដាគុបជ្រុងសេ៥០ ពណ៍ទឹកប៊ិច ពាក់ស្លាកលេខភ្នំពេញ1BF-1418 ។ ខ្សែ ករបស់ស្ត្រីរងគ្រោះ ដែលត្រូវជនសង្ស័យឆក់នោះ គឺជាខ្សែកប្លាទីន ទម្ងន់៧ជី ដែលមានតម្លៃ៧៥០ដុល្លារ មិនត្រូវបានបាត់បង់នោះទេ ក្រោយពេលចាប់ខ្លួនជនសង្ស័យបាន ក៏ត្រូវកម្លាំងនគរបាលដកហូតយកមកវិញបាន រួចបានប្រគល់ជូនជនរងគ្រោះរូបនោះវិញរួចហើយដែរ ។
បើតាមបុរសអ្នករត់ម៉ូតូកង់បីម្នាក់ ដែលកំពុងចាំម៉ូយនៅមុខផ្សារជម្ពូវ័ន បាននិយាយថា នៅមុនពេលកើតហេតុស្ត្រីរងគ្រោះបានចេញពីទិញអីវាន់ នៅក្នុងផ្សារជម្ពូវ័ន ហើយជិះម៉ូតូម្នាក់ឯង តាមផ្លូវជាតិលេខ៤ ក្នុងទិសដៅពីកើតទៅលិច ត្រលប់ទៅផ្ទះវិញ។ លុះពេលជិះបានបន្តិច ក៏ស្រាប់តែជនសង្ស័យខាងលើ ជិះម៉ូតូក្នុងទិសដៅស្របគ្នាទៅពីក្រោយ ហើយពេលទៅដល់ទន្ទឹមគ្នា ក៏ធ្វើសកម្មភាពឆក់ខ្សែ កពីស្ត្រីរងគ្រោះ បានសម្រេច ប៉ុន្តែដាច់បន្តោងជ្រុះនៅនឹងកន្លែងកើតហេតុ ហើយបណ្ដាលឲ្យនាងដួលម៉ូតូរងរបួសស្រាល ។
អ្នករត់ម៉ូតូកង់បីរូបនោះ បាននិយាយបន្តទៀតថា ខណៈនោះនារីរងគ្រោះ បានស្រែកថាចោរៗ បង្កឲ្យមានការភ្ញាក់ផ្អើល ចំណែកឯជនសង្ស័យ ក៏បានយកខ្សែ កជិះគេចខ្លួន ប៉ុន្តែព្រះអត់ជួយបានជ្រុលទៅបុកពីក្រោយម៉ូតូកង់បី១គ្រឿង ដែលកំពុងឈប់ស្ងៀម ។ បណ្ដាលឲ្យរងរបួសស្រាលដែរ ហើយបានស្រវាលើកម៉ូតូប្រុងជិះរត់គេចខ្លួនបន្តទៀត ប៉ុន្តែត្រូវបានប្រជាពលរដ្ឋ រាប់សិបនាក់ ដែលកំពុងស្ថិតនៅជិតនោះ នាំគ្នាចូលទៅឃាត់បាន។ បន្ទាប់មកវាយទាត់ធាក់ម្នាក់១ដៃ ១ជើង បញ្ចេញកំហឹងបណ្ដាលឲ្យទ្រមខ្លួន រួចទើបប្រគល់ឲ្យនគរបាលប៉ុស្តិ៍ចោមចៅទី៣ នាំយកទៅសួរនាំនិងចាត់ការតាមច្បាប់ ។
នគរបាលបានបញ្ជាក់ប្រាប់ថា ជនសង្ស័យរូបនេះគឺជាមុខសញ្ញាចាស់ ធ្លាប់ធ្វើសកម្មភាពឆក់ទ្រព្យសម្បត្តិ អ្នកដំណើរតាមផ្លូវជាញឹកញាប់ ហើយកាលពីអំឡុងឆ្នាំ២០២២ កន្លងទៅ ធ្វើសកម្មភាពឆក់ នៅតាមមហាវិថីឈ្នះឈ្នះ ម្ដុំភូមិចែងម៉ែង សង្កាត់សំរោងក្រោម ព្រំប្រទល់ភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ ។ ខណៈនោះក៏ត្រូវបានសមត្ថកិច្ចឃាត់បានរួចកសាងសំណុំរឿងបញ្ជូនទៅសាលាដំបូងរាជធានីភ្នំពេញ និងត្រូវបានជាប់ពន្ធនាគារចាប់តាំងពីពេលនោះរហូតមក និងទើបតែចេញមកវិញបានប៉ុន្មានខែប៉ុណ្ណោះ មិនរាងចាល ក៏ឆក់ខ្សែពីស្ត្រីខាងលើទៀត ហើយត្រូវចាប់ខ្លួនបែបនេះ និងអាចប្រឈមនិងការចូលគុកសាជាថ្មីទៀតហើយ ៕
ចែករំលែកព័តមាននេះ