តម្លៃមាសអន្តរជាតិបង្កើតកំណត់ត្រាថ្មី ឡើងដល់ ៤ ៦០០ដុល្លារក្នុង១តម្លឹង
បរទេស ៖ នៅថ្ងៃទី២៩ ខែកញ្ញា ឆ្នាំ២០២៥ តម្លៃមាសអន្តរជាតិបានបន្តហក់ឡើងដល់កម្រិតខ្ពស់បំផុតជាកំណត់ត្រាថ្មី ពោលលើសពី ៣ ៨០០ដុល្លារក្នុង១អោន ឬលើសពី…
បរទេស ៖ នៅថ្ងៃទី២៩ ខែកញ្ញា ឆ្នាំ២០២៥ តម្លៃមាសអន្តរជាតិបានបន្តហក់ឡើងដល់កម្រិតខ្ពស់បំផុតជាកំណត់ត្រាថ្មី ពោលលើសពី ៣ ៨០០ដុល្លារក្នុង១អោន ឬលើសពី ៤ ៥៧០ដុល្លារក្នុង១តម្លឹង។ ការបង្កើតកំណត់ត្រាថ្មីនេះ ជំរុញដោយកម្សោយប្រាក់ដុល្លារអាមេរិក និងការរំពឹងទុកកាន់តែខ្ពស់ដែលថា ធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់បន្ថែមទៀតនៅឆ្នាំនេះ។
តម្លៃមាសអន្តរជាតិបានបង្កើតកំណត់ត្រាខ្ពស់បំផុតមិនធ្លាប់ពីមុន ៣ ៨១៩ដុល្លារក្នុង១អោន ឬ ៤ ៦០១ដុល្លារក្នុង១តម្លឹង នៅថ្ងៃទី២៩ ខែកញ្ញា ឆ្នាំ២០២៥ មុនរក្សាតម្លៃមកនៅត្រឹម ៣ ៨០៩ដុល្លារក្នុង១អោន ឬ ៤ ៥៨៩ដុល្លារក្នុង១តម្លឹង គិតត្រឹមម៉ោង ២:៤៥នាទីរសៀល (ម៉ោងនៅកម្ពុជា)។ សន្ទស្សន៍ប្រាក់ដុល្លារអាមេរិកបានធ្លាក់ចុះ ០,២% ធៀបនឹងរូបិយប័ណ្ណជាគូប្រជែងរបស់ខ្លួន។
លោក Kyle Rodda អ្នកវិភាគពីគេហទំព័រ Capital.com បានលើកឡើងថា ការចេញផ្សាយរបាយការណ៍អតិផរណានៅក្នុងសហរដ្ឋអាមេរិកបានផ្តល់ហេតុផលទីផ្សារឱ្យជឿថា ការកាត់បន្ថយអត្រាការប្រាក់បន្ថែមទៀតរបស់ Fed នឹងកើតឡើងនៅក្នុងខែតុលា និងខែធ្នូ ឆ្នាំនេះ។ ជាមួយអារម្មណ៍សុទិដ្ឋិនិយមខ្លាំងបែបនេះហើយ តម្លៃមាសអន្តរជាតិកំពុងស្ថិតនៅលើផ្លូវដើម្បីបង្កើតកំណត់ត្រាខ្ពស់មួយទៀត នៅសប្តាហ៍នេះ។
បច្ចុប្បន្នវិនិយោគិនកំពុងតែបង្ហាញការរំពឹងខ្ពស់ជាមួយឱកាសរហូតដល់ ៩០% ដែលថា ការកាត់បន្ថយអត្រាការប្រាក់របស់ Fed នឹងកើតឡើងនៅខែតុលា និងការរំពឹងប្រហែល ៦៥% ថា ការកាត់បន្ថយមួយផ្សេងទៀត នឹងកើតឡើងនៅខែធ្នូ។ បច្ចុប្បន្នវិនិយោគិនក៏កំពុងតែរង់ចាំទិន្នន័យរបស់សហរដ្ឋអាមេរិកស្តីពីទីផ្សារការងារ បញ្ជីប្រាក់បៀវត្សរ៍វិស័យឯកជន សកម្មភាពសេដ្ឋកិច្ចនៅក្នុងវិស័យផលិតកម្ម (ISM manufacturing PMI) និងរបាយការណ៍ប្រាក់បៀវត្សរ៍មិនមែនវិស័យកសិកម្ម ដែលទាំងនេះ គឺជាតម្រុយតាមដានបន្ថែមលើសុខភាពសេដ្ឋកិច្ចរបស់សហរដ្ឋអាមេរិក។
បើតាមរបាយការណ៍ពី SPDR Gold Trust ដែលជាមូលនិធិជួញដូរមាសដ៏ធំបំផុតរបស់ពិភពលោកបានបង្ហាញថា ការកាន់កាប់មាសរបស់ខ្លួន បានកើនឡើង ០.៨៩% ដល់ចំនួន ១ ០០៥,៧២តោន កាលពីថ្ងៃទី២៦ ខែកញ្ញា កើនឡើងពី ៩៩៦,៨៥តោន កាលពីថ្ងៃទី២៤ ខែកញ្ញា៕ ប្រភព ៖ Reuters និង goldprice.org
ចែករំលែកព័តមាននេះ