រាជធានីភ្នំពេញ ៖ ពាក់ព័ន្ធនឹងជម្លោះព្រំដែនកម្ពុជា-ថៃ មកដល់ពេលនេះ គេថារាជរដ្ឋាភិ បាលកម្ពុជាស្ងៀមស្ងាត់ ប៉ុន្តែសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា…
រាជធានីភ្នំពេញ ៖ ពាក់ព័ន្ធនឹងជម្លោះព្រំដែនកម្ពុជា-ថៃ មកដល់ពេលនេះ គេថារាជរដ្ឋាភិ បាលកម្ពុជាស្ងៀមស្ងាត់ ប៉ុន្តែសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់គេថា យើងស្ងៀម តែមិនស្ងាត់នោះទេ គឺរាជរដ្ឋាភិបាលបានកំពុងតែខិតខំដោះស្រាយបញ្ហានេះដោយចង់បានសន្តិភាព និងមិនឲ្យបាត់បង់ទឹកដីកម្ពុជា ។
សម្តេចបវរធិបតី ហ៊ុន ម៉ាណែត បានលើកឡើងក្នុងពិធីសម្ពោធដាក់ដំណើរការព្រលានយន្តហោះអន្តរជាតិតេជោ នាព្រឹកថ្ងៃទី ២០ ខែតុលា ឆ្នាំ ២០២៥ ថា អភិក្រមចំពោះការដោះស្រាយបញ្ហាព្រំដែនកម្ពុជា-ថៃ ពេលមានផ្ទុះការបាញ់គ្នានៅព្រំដែន នៅថ្ងៃទី ២៤ ខែកក្កដា ឆ្នាំ ២០២៥ អាទិភាពធំបំផុតកំពុងឲ្យវារីក ឬកុំឲ្យវ៉ៃគ្នា បើវារីកនៅតំបន់អានសះ តាមាន់ តាក្របី សុំឲ្យកុំរីកទៅដល់ខេត្ត ស្រុកផ្សេងៗទៀតនៅទូទាំងខេត្ត គឺត្រូវទប់វាឲ្យហ្នឹងត្រឹមនឹង ដោយកុំឲ្យរាលដាលនៅគ្រប់តាមបណ្តោយព្រំដែន ដែលជាអាភិក្រមទី ១ ត្រូវធ្វើបន្ទាន់ សម្តេចបានលើកឡើងទៀតថា កន្លែងណាដែលកើតហេតុនោះ គឺព្យាយាមកាត់បន្ថយហានិភ័យ និងការបាត់បង់ ។ កាលពេលវ៉ៃគ្នាយើងមិនបានដេកអេះពោះនោះទេ គឺយើងបានព្យាយាមគ្រប់មធ្យោបាយ ដើម្បីបញ្ចប់ការវៃគ្នាដើម្បីកុំឱ្យខ្ទេចខូចច្រើនពេក រហូតដល់មានបទឈប់បាញ់ថ្ងៃ ២៨ កក្កដា ឆ្នាំ ២០២៥ ។ លើសពីនេះព្យាយាមធ្វើការឈប់ស្កាត់កុំឲ្យមានវៃគ្នានៅក្រោយថ្ងៃទី ២៨ ទៀត និងធ្វើការស្តារស្ថានការណ៍ឲ្យមានភាព ប្រសើរឡើងវិញ ។ សម្តេចបវរធិបតីបន្ថែមថា ៖ «យើងមិននៅស្ងៀមនោះទេ គឺយើងមានការចរចាបទឈប់បាញ់ដោយមានកិច្ចប្រជុំ JBC, RBC ធ្វើការជាមួយគ្នា» ។
សម្តេចបវរធិបតីនាយករដ្ឋមន្ត្រី បានលើកឡើងថា មានបងប្អូនខ្លះបាននិយាយថា ចាំបាច់ត្រូវភ្ជាប់ទំនាក់ទំនងឡើងវិញធ្វើអ្វី ដែលទាំងនៅកម្ពុជាក៏មាននិយាយយ៉ាងនេះ ទាំងនៅប្រទេសថៃក៏មាននិយាយយ៉ាងនេះ ។ សម្តេចធិបតី ថា ការនិយាយរបស់បង្អូនយ៉ាងនេះ គឺនិយាយតាមអារម្មណ៍របស់បងប្អូន ប៉ុន្តែបើមេដឹកនាំនៅប្រើកំហឹងទល់កំហល់ដាក់គ្នានោះ គឺមិនមែនស្លាប់មេដឹកនាំនៅ ភ្នំពេញនោះទេ ផ្ទុយទៅវិញអ្នកដែលស្លាប់ គឺជាទាហាន និងប្រជាជន ។ ដូច្នេះការបញ្ចប់ជម្លោះ គឺជាគោលដៅសំខាន់ដែលសង្ឃឹមថា ក្នុងពេលឆាប់ៗនេះនឹងមានការចុះកិច្ចព្រមព្រៀងសន្តិភាព ដែលយើងបាននិងកំពុងធ្វើយ៉ាងណា ដើម្បីបញ្ចប់ជម្លោះនេះ ដែលនេះគឺជាអភិក្រមរបស់យើង ។
ជាមួយគ្នានោះដែរ សម្តេចនាយករដ្ឋមន្ត្រីបានគូសបញ្ជាក់ថា បញ្ហាព្រំដែន គឺជាបញ្ហាស្មុគស្មាញដែលនៅក្នុងសហគមន៍អាស៊ានមានប្រទេសតិចណាស់ ដែលគ្មានបញ្ហាព្រំដែន ជាមួយប្រទេសជិតខាង ដោយបញ្ហាវាបានបន្សល់ទុកតាំងពីជំនាន់អាណានិគមរាប់រយឆ្នាំ ប៉ុន្តែការជ្រើសរើសសម្រាប់ការដោះស្រាយ គឺវិធីសាស្ត្រដោយសន្តិវិធីតាមយន្តការនេះ តាមយន្តការនោះ ដោយមិនប្រើប្រាស់ការប្រយុទ្ធគ្នាដោយកំហឹងនោះទេ យើងត្រូវការនិយាយគ្នា ដើម្បីដោះស្រាយបញ្ហា ដោយសម្តេចបានអះអាងថា កម្ពុជាគ្មានសោះឡើយនូវគោលបំណង ដើម្បីរំលោភលើអធិបតេយ្យភាព បូរណភាពរបស់អ្នកណាឡើយ តែយើងក៏មិនឱ្យអ្នកណាមក រំលោភលើអធិបតេយ្យភាព បូរណភាពរបស់យើងដូចគ្នា នេះ គឺជាគោលការណ៍ ។
បើតាមសម្តេចនាយករដ្ឋមន្ត្រីការដោះស្រាយបញ្ហាព្រំដែន គឺត្រូវធ្វើឡើងតាមគោលការណ៍ដែលប្រទេសអាស៊ានផ្សេងៗបានធ្វើរួចមកហើយ ។ គេមានគណៈកម្មាធិការកិច្ចការព្រំដែន មានច្បាប់អន្តរជាតិ មានសន្ធិសញ្ញា អនុសញ្ញាជាដើម ដែលកម្ពុជាបានធ្វើ ២០ឆ្នាំមកហើយ ។ នេះហើយគឺជាការត្រៀមដើម្បីពន្លត់ជម្លោះព្រំដែនដោយសន្តិវិធី ដែលការឯកភាពគ្នាទ្វេភាគី គឺគ្មានអ្នកណាបាត់អ្វីនោះទេ ។ ដូច្នេះ សូមបងប្អូនប្រជាពលរដ្ឋយល់ពីអត្ថប្រយោជន៍នៃភាពស្ងាត់របស់រាជរដ្ឋាភិបាល ដោយសម្តេចបានគូសបញ្ជាក់ថា យើងស្ងាត់ តែមិនស្ងៀមទេ គឺយើងបានធ្វើរាល់សកម្មភាពទាំងអស់ដើម្បីបទឈប់បាញ់ និងសន្តិភាព ៕
ចែករំលែកព័តមាននេះ