រាជធានីភ្នំពេញ ៖ ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា បានបញ្ជាក់ថា កម្ពុជាក្លាយជាគោលដៅទេសចរណ៍មួយចំណោមគោលដៅដទៃទៀត ដែលប្រកបដោយកម្លាំងរស់រវើក និងសំទុះអភិវឌ្ឍន៍ខ្លាំងបំផុតនៅអាស៊ី ។ យោងតាមបណ្តាញសង្គមឯកឧត្តម វ៉ាង…
រាជធានីភ្នំពេញ ៖ ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា បានបញ្ជាក់ថា កម្ពុជាក្លាយជាគោលដៅទេសចរណ៍មួយចំណោមគោលដៅដទៃទៀត ដែលប្រកបដោយកម្លាំងរស់រវើក និងសំទុះអភិវឌ្ឍន៍ខ្លាំងបំផុតនៅអាស៊ី ។
យោងតាមបណ្តាញសង្គមឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា នៅយប់ថ្ងៃទី២៨ ខែកញ្ញា ឆ្នាំ២០២៥ បានឲ្យដឹងថា យោងតាមក្រុមហ៊ុនវិភាគទិន្នន័យអាកាសចរណ៍ Cirium បានឱ្យដឹងថា ឆ្នាំ២០២៥ កម្ពុជានឹងស្វាគមន៍ជើងហោះហើរចំនួន៣១៥៧៩លើក កើនឡើង១៤.២% បើធៀបនឹងរយ:ពេលដូចគ្នាកាលពីឆ្នាំទៅ ។
ឯកឧត្តមទូតបានបន្ថែមថា ៖ កៅអីសម្រាប់អ្នកដំណើរដែលអាចប្រើបាន（Available passenger seats）នឹងឡើងដល់៥,១៨២,៨៦៤ កន្លែង កើនឡើង១៤.៧% បើធៀបនឹងរយ:ពេលដូចគ្នា កាលពីឆ្នាំទៅ ។ តួលេខកំណើនជើងហោះហើរ និងកៅអីដ៏រឹងមាំនេះ បានបញ្ជាក់អំពីភាពរីកចម្រើនរបស់កម្ពុជាក្លាយជាគោលដៅទេសចរណ៍មួយ ចំណោមគោលដៅដទៃទៀត ដែលប្រកបដោយកម្លាំងរស់រវើក និងសម្ទុះអភិវឌ្ឍន៍ខ្លាំងបំផុតនៅអាស៊ី ។
ទាក់ទិននឹងវិស័យទេសចរណ៍នេះ ឯកឧត្តម ហោ សារុនរដ្ឋលេខាធិការក្រសួងទេសចរណ៍ធ្លាប់បានឲ្យដឹងថា វិស័យទេសចរណ៍បានរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គម ជាពិសេសលំហូរចូលយ៉ាងច្រើននៃភ្ញៀវទេសចរចិនមកកម្ពុជា នៅមុនវិបត្តិជំងឺកូវីដ-១៩ មានចំនួនប្រមាណ២,៤លាននាក់ នៅឆ្នាំ២០១៩ ។
ឯកឧត្តមបានឲ្យដឹងថា កាលពីឆ្នាំ២០២៤ កន្លងទៅកម្ពុជាទទួល បានភ្ញៀវទេសចរអន្តរជាតិសរុបប្រមាណ៦,៧លាននាក់ កើនឡើងប្រមាណ២៣% ធៀបនឹងឆ្នាំ២០២៣ ក្នុងនោះភ្ញៀវទេសចរចិនមានចំនួនប្រមាណ៨៥ម៉ឺននាក់កើនឡើង៥៥% ។ សម្រាប់រយៈពេល៨ខែដើមឆ្នាំ២០២៥នេះ កម្ពុជាទទួលបានភ្ញៀវទេសចរអន្តរជាតិប្រមាណ៤,០៥លាននាក់ ក្នុងនោះភ្ញៀវទេសចរចិន មានចំនួន៧៨,៥ម៉ឺននាក់ កើនឡើង៤៥,៧%។
ឯកឧត្តមបញ្ជាក់ថា ៖«តាមនិន្នាការនេះ យើងខ្ញុំសង្ឃឹមយ៉ាងមុតមាំថា ការកំណត់យកឆ្នាំ២០២៥ជា «ឆ្នាំទេសចរណ៍ កម្ពុជា-ចិន» នឹងក្លាយជាចលករយ៉ាងសំខាន់ក្នុងការជំរុញកំណើនភ្ញៀវទេសចរចិនមកទស្សនាកម្ពុជា បង្កើនការវិនិយោគក្នុងវិស័យទេសចរណ៍ និងការផ្លាស់ប្តូរវប្បធម៌រវាងប្រទេសទាំងពីរសំដៅរួមចំណែកដល់ការសម្រេចបំណងប្រាថ្នាក្នុងការកសាងសហគមន៍ជោគវាសនារួមកម្ពុជា-ចិន ។ យើងសង្ឃឹមថា កម្ពុជានឹងទទួលបានភ្ញៀវទេសចរចិនលើសពីមួយលាននាក់សម្រាប់ឆ្នាំ២០២៥នេះ»។
ឯកឧត្តមថាអនាគតនៃវិស័យទេសចរណ៍កម្ពុជា គឺមិនអាចកាត់ផ្ដាច់ពីការស្រូបទាញកំណើននៃលំហូរទេសចរ និងវិនិយោគិនចិនបានឡើយ ។ សម្រាប់កម្ពុជា យើងបានត្រៀមលក្ខណសម្បត្តិគ្រប់គ្រាន់ និងបន្តខិតខំពង្រឹងការត្រៀមលក្ខណសម្បត្តិទទួលភ្ញៀវទេសចរចិនតាមរយៈការពង្រឹងការអនុវត្តស្តង់ដាគុណភាព ផលិតផល និងសេវាកម្មទេសចរណ៍សម្រាប់ទីផ្សារទេសចរណ៍ចិន (China-ready) ការបង្កើនបទពិសោធល្អៗគួរឱ្យចងចាំសម្រាប់ភ្ញៀវទេសចរ ការដាក់ឱ្យដំណើរការប្រព័ន្ធ E-arrival ការសម្រួលការធ្វើដំណើរនៅតាមច្រកទ្វារអន្តរជាតិ ការធ្វើពិពិធកម្មផលិតផលទេសចរណ៍ការរៀបចំព្រឹត្តិការណ៍ និងពិព័រណ៌នានា ការផ្សព្វផ្សាយ និងលើកកម្ពស់រូបភាពគោលដៅទេសចរណ៍អាទិភាពជាដើម។ល៕
ចែករំលែកព័តមាននេះ