រាជធានីភ្នំពេញ ៖ ដើម្បីកុំឲ្យពួកគាត់ឃ្លាតឆ្ងាយ សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានសមាគមអតីតយុទ្ធជនកម្ពុជា បានថ្លែងថា សម្ដេចនឹងរៀបចំសមាគមអតីតយុទ្ធជន…
រាជធានីភ្នំពេញ ៖ ដើម្បីកុំឲ្យពួកគាត់ឃ្លាតឆ្ងាយ សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានសមាគមអតីតយុទ្ធជនកម្ពុជា បានថ្លែងថា សម្ដេចនឹងរៀបចំសមាគមអតីតយុទ្ធជន និងនិវត្តជន នៅតាមស្ថាប័នទាំងអស់ ដើម្បីកុំឲ្យពួកគាត់ឃ្លាតឆ្ងាយ ព្រោះពួកគាត់ បានបំពេញការងារជាច្រើនមុនចូលនិវត្ត ។
ការលើកឡើងរបស់ សម្តេចតេជោ ហ៊ុន សែន ក្នុងមហាសន្និបាតវិសាមញ្ញតំណាងសមាគមអតីតយុទ្ធជនកម្ពុជាទូទាំងប្រទេស នៅក្រសួងមហាផ្ទៃ រាជធានីភ្នំពេញ នៅព្រឹកថ្ងៃទី២៩ ខែកញ្ញា ឆ្នាំ២០២៥ ។
សម្តេចតេជោ បានឲ្យដឹងថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់ចំពោះអតីតយុទ្ធជន និងបានដាក់ចេញនូវគោលនយោបាយនានា ដើម្បីគុណប្រយោជន៍របស់អតីតយុទ្ធជន ការកែលម្អជីវភាពអតីតយុទ្ធជន និងក្រុមគ្រួសារសព អតីតយុទ្ធជន ។
សម្តេចតេជោ បន្ដថា អតីតយុទ្ធជន និងនិវត្តជន បានដាក់ក្នុងក្រោមដំបូលសមាគមតែមួយ គឺពិតជាល្អខ្លាំងណាស់ ដើម្បីកុំឲ្យពួកគាត់ឃ្លាតឆ្ងាយ ។ សម្តេចតេជោ ហ៊ុន សែន បានគូសបញ្ជាក់ថា «តាមស្ថាប័ននានាមិនទាន់ធ្លាប់មានសមាគមអតីតយុទ្ធជន យើងនឹងរៀបចំសមាគមអតីតយុទ្ធជន និងនិវត្តជននៅតាមស្ថាប័នទាំងអស់ ដើម្បីកុំឲ្យពួកគាត់ឃ្លាតឆ្ងាយពីយើង នៅពេលដែលគាត់ប្រឹងប្រែងការងារ»។
សម្តេច ប្រមុខរដ្ឋស្តីទីបន្ថែមថា នេះជាការបញ្ជូនសារមួយយ៉ាងជាក់លាក់ទៅនិវត្តជនទាំងអស់ ឲ្យបានឃើញអំពីការដែលខ្លួននឹងត្រូវក្លាយជាសមាជិកអតីតយុទ្ធជន និងនិវត្តជន នាពេលខាងមុខនេះ ។
ក្នុងឱកាសនោះដែរសម្តេចតេជោ ហ៊ុន សែន ប្រមុខរដ្ឋស្តីទី បានមានប្រសាសន៍ថា រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា មិនទុកអតីតយុទ្ធជនម្នាក់ណាចោលនោះទេ ពោល គឺបានយកចិត្តទុកដាក់លើជីវភាពរស់នៅរបស់ពួកគាត់ជាប់ជាប្រចាំ ។
សម្តេចតេជោ បានលើកឡើងថា ក្រោមការដឹកនាំរបស់គណបក្សប្រជាជនកម្ពុជា រាជរដ្ឋាភិបាលតែងតែយកចិត្តទុកដាក់ខ្ពស់ ចំពោះជីវភាពរបស់អតីតយុទ្ធជនកម្ពុជាគ្រប់រូប និងគ្រួសារសពរបស់អតីតយុទ្ធជន ។ ប្រធានសមាគមអតីតយុទ្ធជនកម្ពុជាបន្តថា «ការយកចិត្តទុកដាក់នេះតាមរយៈការដាក់ចេញក្របខណ្ឌគោលនយោបាយ និងវិធានការណ៍នានា ដើម្បីរំលឹកដល់គំរូវីរៈភាពយ៉ាងមុះមុត និងគុណបំណាច់ដ៏ធំធេង ដោយមិនអាចកាត់ថ្លៃបានរបស់វីរៈយុទ្ធជន យុទ្ធនារី នៃកងកម្លាំងប្រដាប់អាវុធក៏ដូចជា ប្រជាពលរដ្ឋគ្រប់រូបដែលបានធ្វើពលីកម្មយ៉ាងអង់អាចក្លាហាន ដើម្បីបុព្វហេតុជាតិមាតុភូមិ» ។
សម្តេចតេជោបញ្ជាក់ថា សមាគមអតីតយុទ្ធជនកម្ពុជា ដែលបានបង្កើតឡើងក្រោមគំនិតផ្តួចផ្តើមរបស់សម្តេចផ្ទាល់ កាលពី១៨ឆ្នាំមុន បាន និងកំពុងដើរតួនាទីយ៉ាងសំខាន់ក្នុងការជួយជ្រោមជ្រែងគិតគូរដល់អតីតយុទ្ធជនកម្ពុជា ដែលបានជួយពង្រឹងពង្រីកតួនាទីរបស់សមាគមអតីតយុទ្ធជន ។ សម្តេចតេជោ ក៏បានរំលេចពីគុណបំណាច់អតីតយុទ្ធទៀតថា ដួងព្រលឹងអតីតយុទ្ធជនទាំងអស់ ដែលបានពលីសាច់ស្រស់ឈាមស្រស់ ដើម្បីបុព្វហេតុជាតិមាតុភូមិ នឹងតាមថែរក្សាការពារប្រជាជនកម្ពុជាជំនាន់ក្រោយ៕
ចែករំលែកព័តមាននេះ