ទីក្រុងកៀវ៖ ថ្ងៃនេះ រុស្ស៊ីបញ្ជូនដ្រូនរាប់រយគ្រឿង និងមីស៊ីលរាប់សិបគ្រាប់ទៅវាយប្រហាររដ្ឋធានីកៀវរបស់អ៊ុយក្រែនខ្លាំងជាងគេ។ ទីតាំងដទៃទៀតក៏គេចមិនផុតពីការវាយប្រហារនេះដែរ។ អាជ្ញាធរអះអាងថាមនុស្សយ៉ាងតិច៤នាក់បានស្លាប់ និងរាប់សិបនាក់ទៀតរងរបួស។ នេះជាផ្នែក១នៃយុទ្ធនាការវាយប្រហារទីក្រុងកៀវម្ដងហើយម្ដងទៀត។ ជាពិសេស ការវាយប្រហារកាន់តែមានសភាពខ្លាំងក្លាបន្ទាប់ពីលោកត្រាំបង្ហើបឱ្យដឹងថាអ៊ុយក្រែនអាចវាយយកទឹកដីរបស់ខ្លួនទាំងអស់ត្រឡប់មកវិញ។
នៅក្នុងស្ថានភាពដែលរុស្ស៊ីវាយប្រហារយ៉ាងជញ្ជ្រំដូច្នេះ ប៉ូឡូញដែលមានព្រំប្រទល់ជាប់អ៊ុយក្រែននោះបានសម្រេចចិត្តបិទដែនអាកាសរបស់ខ្លួននៅទីក្រុងចំនួន២ប៉ែកឦសាន។ មិនតែប៉ុណ្ណោះ ប៉ូឡូញចល័តយន្តហោះចម្បាំងជាច្រើនគ្រឿងដើម្បីត្រៀមទប់ទល់នឹងហានិភ័យណាមួយ។ យោធាអ៊ុយក្រែនអះអាងថារុស្ស៊ីបញ្ជូនដ្រូន៥៩៥គ្រឿង និងមីស៊ីល៤៨គ្រាប់ដើម្បីវាយប្រហារ។
អ៊ុយក្រែនបាញ់ទម្លាក់ដ្រូន៥៦៨គ្រឿង និងមីស៊ីល៤៣គ្រាប់។ ដូច្នេះ នៅសល់ក្រៅពីនេះអាចហោះទៅវាយប្រហារគោលដៅចុងក្រោយរបស់ខ្លួន។ លោកហ្សេឡិនស្គីថ្លែងថាការវាយប្រហារដែលអូសបន្លាយពេលជាង១២ម៉ោងទម្រាំបិទបញ្ចប់ទៅវិញនោះបានបំផ្លិចបំផ្លាញគ្លីនិកវះកាត់បេះដូង១កន្លែង, រោងចក្រជាច្រើនកន្លែង និងអគារស្នាក់នៅរបស់ប្រជាជន។
រុស្ស៊ីក៏ទទួលស្គាល់ផងដែរថាខ្លួនពិតជាបានវាយប្រហារមែន។ ក្រសួងការពារជាតិរុស្ស៊ីអះអាងថាខ្លួនបានវាយប្រហារទ្រង់ទ្រាយធំដោយប្រើប្រាស់អាវុធមានវង់ប្រតិបត្តិការឆ្ងាយ និងបាញ់ចេញពីដែនសមុទ្រ និងប្រើប្រាស់ដ្រូន។ ប៉ុន្តែរុស្ស៊ីអះអាងថាខ្លួនវាយប្រហារតែគោលដៅយោធាតែប៉ុណ្ណោះ។ ក្នុងនោះក៏មានមូលដ្ឋានទ័ពអាកាសរបស់អ៊ុយក្រែនផងដែរ។
ហ្សេឡិនស្គីជំរុញឱ្យសហគមន៍អន្តរជាតិចាត់វិធានការក្ដៅទៅលើរុស្ស៊ី
លោកហ្សេឡិនស្គីជាថ្មីម្ដងទៀតបានអំពាវនាវទៅសហគមន៍អន្តរជាតិចាត់វិធានការដោយម៉ឺងម៉ាត់ដើម្បីកាត់ផ្ដាច់ប្រាក់ចំណូលរបស់រុស្ស៊ីពីការលក់ថាមពល (ប្រេង, ឧស្ម័ន)។ រហូតមកដល់ពេលនេះ អ៊ុយក្រែនមិនទាន់មានជោគជ័យក្នុងការបញ្ចុះបញ្ចូលឱ្យលោកត្រាំដាក់ទណ្ឌកម្មប្រទេសរុស្ស៊ីនៅឡើយទេ។ លោកហ្សេឡិនស្គីថ្លែងថាគួរណាស់ចាត់វិធានការនេះតាំងពីយូរមកហើយ។ យើងផ្ដល់ក្ដីសង្ឃឹមទៅលើអាមេរិក អឺរ៉ុប ក្រុមប្រទេសជីប្រាំពីរ និងជីម្ភៃដើម្បីចាត់វិធានការដ៏ខ្លាំងក្លាមួយ។
ប្រជាជនអ៊ុយក្រែនរស់នៅទីក្រុងកៀវដែលកំពុងលង់លក់ក្នុងដំណេកត្រូវភ្ញាក់ទាំងមមិងមមាំងដោយសារសំឡេងផ្ទុះគ្រាប់កាំភ្លើងយ៉ាងកងរំពង, ដោយសារសំឡេងដ្រូនហោះហើរពីលើអគារស្នាក់នៅរបស់ពួកគេ និងដោយសារប្រព័ន្ធការពារដែនអាកាសរបស់អ៊ុយក្រែនខ្លួនឯងបាញ់ទម្លាក់ដ្រូន និងមីស៊ីល។ គេឃើញផ្សែងដ៏ខ្មៅងងឹតហោះហើរទៅលើអាកាសចេញពីទីតាំងមួយដែលរងការវាយប្រហារ។ រហូតដល់ម៉ោង៩:១៣ព្រឹកទើបគេលែងស្ដាប់ឮសំឡេងស៊ីរ៉ែនប្រកាសអាសន្ន៕
ចែករំលែកព័តមាននេះ