ថ្ងៃចុងក្រោយនៃការឆ្លងកាត់បណ្តោះអាសន្ន! ស្ពានមិត្តភាពកម្ពុជា-ចិន មេគង្គក្រចេះ ត្រៀមបិទវិញដើម្បីអ៊ុតកៅស៊ូ AC
លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រកាសនារសៀលថ្ងៃទី២៨ ខែកញ្ញានេះថា ៖ នៅថ្ងៃទី២៨ ខែកញ្ញា…
លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រកាសនារសៀលថ្ងៃទី២៨ ខែកញ្ញានេះថា ៖ នៅថ្ងៃទី២៨ ខែកញ្ញា ឆ្នាំ២០២៥នេះ គឺជាថ្ងៃចុងក្រោយ ដែលស្ពានមិត្តភាពកម្ពុជា-ចិន មេគង្គក្រចេះ អនុញ្ញាតឱ្យបងប្អូនប្រជាពលរដ្ឋឆ្លងកាត់បណ្តោះអាសន្ន ក្នុងឱកាសបុណ្យកាន់បិណ្ឌ និងភ្ជុំបិណ្ឌ រយៈពេល២១ថ្ងៃ ពីថ្ងៃទី៨-២៨ ខែកញ្ញា ឆ្នាំ២០២៥ ។
អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ថា នៅព្រឹកថ្ងៃទី២៩ ខែកញ្ញា ឆ្នាំ២០២៥ ស្អែកនេះ ក្រុមការងារការដ្ឋានស្ថាបនាស្ពាននឹងបិទចរាចរណ៍ ដើម្បីបន្តការងារបន្ទាប់បន្សំចុងក្រោយដូចជា ៖ ការងារអ៊ុតកៅស៊ូ AC,ការងារគូសគំនូសចរាចរណ៍, ការងារដំឡើងផ្លាកសញ្ញាចរាចរណ៍ និង្ឲការងារភ្លើងបំភ្លឺស្ពានជាដើម។
មកទល់ពេលនេះ ស្ពានមិត្តភាពកម្ពុជា-ចិន មេគង្គក្រចេះ សម្រេចការសាងសង់ស្ទើរ១០០% ហើយ ខណៈដែលគម្រោងទាំងមូលរួមមាន ៖ គម្រោងសាងសង់ស្ពានមិត្តភាពកម្ពុជា-ចិន មេគង្គក្រចេះ និងផ្លូវតភ្ជាប់សម្រេចវឌ្ឍនភាពជារួម៨៧,២៥% ។
គួរបញ្ជាក់ថា ស្ពានមិត្តភាពកម្ពុជា-ចិន មេគង្គក្រចេះ មានទីតាំងត្រើយខាងកើត ស្ថិតនៅត្រង់ភូមិតាលុស ឃុំបុសលាវ ស្រុកចិត្របុរី និងត្រើយខាងលិច ស្ថិតនៅត្រង់ភូមិថ្មរាប ឃុំព្រែកប្រសព្វ ស្រុកព្រែកប្រសព្វ មានមុខកាត់ទទឹងជាង ១៣ម៉ែត្រ មានគន្លងផ្លូវសម្រាប់រថយន្តចរាចរណ៍ចំនួន ២គន្លងទៅ-មក ,គន្លងផ្លូវសម្រាប់ទោចក្រយានចំនួន២គន្លងទៅ-មក និងផ្លូវថ្មើរជើងចំនួន២គន្លងទៅ-មក ប្រវែង១ម៉ែត្រ និងបង្កាន់ដៃស្ពានសងខាង ។
ដំណែកផ្លូវតភ្ជាប់ប្រវែងជាង៣២គីឡូម៉ែត្រ រួមមាន ៖ ផ្លូវតភ្ជាប់ពីក្បាល ស្ពានមានប្រវែងជាង១៥គីឡូម៉ែត្រ និងផ្លូវខ្នែងចំនួន៤ខ្សែ នៅក្នុងក្រុងក្រចេះ មានប្រវែងជាង ១៦គីឡូម៉ែត្រ ។ ខ្សែផ្លូវទាំងនេះ សាងសង់ពង្រីក និងលើកកម្រិត គុណភាពដោយក្រាលបេតុងកៅស៊ូ(AC)កម្រាស់ ៧សង់ទីម៉ែត្រដូចគ្នា ។ ក្នុងនោះកំណាត់ផ្លូវ៤ខ្សែ ប្រវែងជិត ២៧គីឡូម៉ែត្រ ស្ថាបនាពង្រីកទទឹងចាប់ពី៩ម៉ែត្ររហូតដល់១៣ម៉ែត្រ លើតួផ្លូវចាប់ពី១១ម៉ែត្រ រហូតដល់ជិត២០ម៉ែត្រ និងកំណាត់ផ្លូវ១ខ្សែ ប្រវែងជាង ៥គីឡូម៉ែត្រ ពង្រីកទទឹង ១៩ម៉ែត្រ លើតួផ្លូវ៣០ម៉ែត្រ ដោយពុះទ្រូងផ្លូវនៅចំកណ្តាលធ្វើសួនរុក្ខជាតិបៃតងប្រវែង ៤ម៉ែត្រផងដែរ ៕
ចែករំលែកព័តមាននេះ