ខេត្តពោធិ៍សាត់​៖ កាលពីថ្ងៃ​ទី២៧ កញ្ញា ឆ្នាំ​២០២៥ វេលា​ម៉ោង 0៧​និង​៤០​នាទី​ព្រឹក មាន​ករណី​ឃាតកម្ម​មួយ​បាន​កើតឡើង នៅ​ភូមិ​ឯកភាព ឃុំ​ថ្មដា ស្រុក​វាល​វែង ខេត្តពោធិ៍សាត់ ដោយ​បុរស​ម្នាក់​បាន​ប្រើ​អាវុធ​ខ្លី​ម៉ាក​K54 បាញ់​ស្រោច​ទៅ​លើ​ក្រុម​ជន​រង​គ្រោះ ដែល​កំពុង​ជិះ​រថយន្ត ១ គ្រឿង ម៉ាក​សាំ​យ៉ុ​ង ពណ៌​លឿង បណ្តាលឱ្យស្លាប់ស្ត្រីម្នាក់ និង​៤នាក់​ទៀត​របួសធ្ងន់​និង​ស្រាល ដោយសារ​ករណី​ឈ្លោះ​ដណ្ដើម​កូន​គ្នា​។​

ក្រោយ​កើតហេតុ​បាន​ប៉ុន្មាន​ម៉ោង សមត្ថកិច្ច​កម្លាំង​ជំនាញ​ព្រហ្មទណ្ឌ នៃ​អធិការដ្ឋាន​នគរបាល​ស្រុក​វាល​វែង សហការ​ជាមួយ​កម្លាំង​អធិការដ្ឋាន​នគរបាល​ក្រុង​ពោធិ៍សាត់ និង​កម្លាំង​ជំនាញ​ព្រហ្មទណ្ឌ​នៃ​ស្នងការដ្ឋាន​នគរបាល​ខេត្ត បាន​ធ្វើការ​ស្រាវជ្រាវ​ឃាត់ខ្លួន​ជនសង្ស័យ​បាន នៅ​ក្នុង​មន្ទីរពេទ្យ​បង្អែក​ខេត្តពោធិ៍សាត់ វេលា​ម៉ោង​12​និង​15​នាទី​ថ្ងៃត្រង់​ថ្ងៃដដែល ។

ជនសង្ស័យ​ឈ្មោះ ឯ ណ​អ ភេទ​ប្រុស អាយុ​34​ឆ្នាំ រស់នៅ​ភូមិ​ឯកភាព ឃុំ​ថ្មដា ស្រុក​វាល​វែង​។

រីឯ​ជន​រង​គ្រោះ​ទាំង​05​នាក់ 1- ឈ្មោះ ណ ដ ភេទ​ស្រី អាយុ ៣០ ឆ្នាំ រស់នៅ​ភូមិ​ដាន​គោម​ខាងត្បូង ឃុំ​ដាន​គោម ស្រុក​អង្គរ​ជ័យ ខេត្តកំពត (​ស្លាប់​)​។ 2-​ឈ្មោះ ប ទ​វ ភេទ​ប្រុស អាយុ​ជាង​30​ឆ្នាំ រស់នៅ​ភូមិ​ទួល​ស្វាយ ឃុំ​វាល ស្រុក​គងពិសី ខេត្តកំពង់ស្ពឺ (​របួសធ្ងន់​) 3-​ឈ្មោះ ណ ត ភេទ​ស្រី អាយុ​55​ឆ្នាំ រស់នៅ​ភូមិ​ដាន​គោម ឃុំ​ដាន​គោម ស្រុក​អង្គរ​ជ័យ ខេត្តកំពត (​របួសធ្ងន់​) 4-​ឈ្មោះ ច សវ ភេទ​ប្រុស អាយុ​37​ឆ្នាំ រស់នៅ​ភូមិ​ដំ​ដែក ឃុំ​រកា​កោះ ស្រុក​គងពិសី ខេត្តកំពង់ស្ពឺ (​របួសស្រាល​) និង​5-​កុមា​រា​ឈ្មោះ ឯ វរ​ប អាយុ​1​ឆ្នាំ​8​ខែ ត្រូវជា​កូនប្រុស​បង្កើត​របស់​ជនសង្ស័យ (​របួសស្រាល​)​។

បច្ចុប្បន្ន​ជន រង​គ្រោះ​របួសស្រាល ព្យាបាល​នៅ​មណ្ឌល​សុខភាព​ប្រមោយ និង​ជន​រង​គ្រោះរ​បូស​ធ្ងន់ សង្គ្រោះ​នៅ​មន្ទីរពេទ្យ​បង្អែក​ពោធិ៍សាត់​។​

សមត្ថកិច្ច​បញ្ជាក់​អោយ​ដឹង​ថា នៅ​ថ្ងៃ​កើតហេតុ​នោះ គេ​ឃើញ​ជនសង្ស័យ​ជិះ​រថយន្ត ០១ គ្រឿង ម៉ាក TOYOTA HILUX VIGO ពណ៌​ទឹកប្រាក់ ពាក់​ស្លាក​លេខ ពោធិ៍សាត់ 2B-2013​។ ទៅ​ដល់​ចំណុច​កើតហេតុ បាន​ប្រើ​កាំភ្លើងខ្លី​ធ្វើ​សកម្មភាព​បាញ់​ស្រោច​ទៅ​លើ​ក្រុម​ជន​រង​គ្រោះ ដែល​កំពុង​ជិះ​រថយន្ត ០១ គ្រឿង ម៉ាក​សាំ​យ៉ុ​ង ពណ៌​លឿង ពាក់​ផ្លា​ក​លេខ ភ្នំពេញ 2AH-0038 បណ្ដាល​ឱ្យ​ស្លាប់​និង​រង​របួសធ្ងន់​ស្រាល​ចំនួន​05​នាក់​នៅ​ក្នុង​រថយន្ត រួច​ហើយក៍​បើករថយន្ត​រត់គេច​ខ្លួន​បាត់ លុះ​វេលា​ម៉ោង​12​ថ្ងៃត្រង់ ទើប​សមត្ថកិច្ច​ស្រាវជ្រាវ​ឃាត់ខ្លួន​បាន នៅ​ក្នុង​មន្ទីរពេទ្យ​បង្អែក​ខេត្ត ។ ដំបូង​យើង​មិនដឹង​ថា មាន​ជម្លោះ​អ្វី​ទេ ប៉ុ​នែ្ត​ក្រោយមក​ទើប​ដឹង​ថា មាន​ជម្លោះ​គ្រួសារ​ដណ្ដើម​កូន​គ្នា ទើប​ឈាន​ដល់​បាញ់ប្រហារ​បែប​នេះ​។

បច្ចុប្បន្ន​ជនសង្ស័យ​ខាងលើ បាន​បញ្ជូន​មក​អធិការដ្ឋាន​នគរបាល​ស្រុក​វាល​វែង ដើម្បី​បន្ត​នីតិវិធី​៕