ទីក្រុងញូយ៉ក៖ នៅទីបំផុត អង្គការសហប្រជាជាតិសម្រេចដាក់ទណ្ឌកម្មអ៊ីរ៉ង់ជាថ្មីពាក់ព័ន្ធនឹងការអភិវឌ្ឍកម្មវិធីនុយក្លេអ៊ែរ។ ក្នុងនោះមានការរឹតត្បិតការទិញ-លក់អាវុធ និងការដាក់ទណ្ឌកម្មដទៃទៀត។ ចំណាត់ការនេះធ្វើឡើងតបតាមសំណើរបស់ប្រទេសមហាអំណាចនៅអឺរ៉ុបដូចជាអង់គ្លេស បារាំង និងអាល្លឺម៉ង់។ ពួកគេថ្លែងថាការចរចាគ្នារយៈពេលជាច្រើនខែកន្លងទៅនេះគ្មានបានលទ្ធផលអ្វីទេ។ តាំងពីមុនការប្រកាសដាក់ទណ្ឌកម្មនេះ អ៊ីរ៉ង់ព្រមានថាខ្លួននឹងបញ្ចេញប្រតិកម្មដ៏ខ្លាំងក្លាបំផុត។
ប្រទេសមហាអំណាចអឺរ៉ុបទាំងបីចោទប្រកាន់ថារដ្ឋាភិបាលទីក្រុងតេអេរ៉ង់បានរំលោភទៅលើស្មារតីនៃកិច្ចព្រមព្រៀងនុយក្លេអ៊ែរឆ្នាំ២០១៥ដែលហាមឃាត់ការផលិតអាវុធនុយក្លេអ៊ែរ។ អ៊ីរ៉ង់បដិសេធការចោទប្រកាន់នេះ។ ប៉ុន្តែទន្ទឹមនឹងនោះ អ៊ីរ៉ង់មានទីតាំងនុយក្លេអ៊ែរលាក់ទុកនៅក្នុងរូងភ្នំ និងខិតខំចម្រាញ់សារធាតុវិទ្យុសកម្មសឹងតែស្មើនឹងកម្រិតផលិតនុយក្លេអ៊ែរ។
កិច្ចព្រមព្រៀងនុយក្លេអ៊ែរនោះគិតមកដល់ពេលនេះមានរយៈពេលដប់ឆ្នាំហើយ។ គេបារម្ភថាការបិទបញ្ចប់កិច្ចព្រមព្រៀងនេះ និងការចាប់ផ្ដើមដាក់ទណ្ឌកម្មជាថ្មីអាចនឹងរុញច្រានស្ថានការណ៍នៅមជ្ឈិមបូព៌ាដែលកំពុងតែប្រឈមនឹងបញ្ហាជាច្រើនស្រាប់ទៅហើយនោះនឹងរឹតតែធ្ងន់ធ្ងរជាងនេះបន្ថែមទៀត។ រាល់ទណ្ឌកម្មរបស់អង្គការសហប្រជាជាតិដែលដាក់ទៅលើប្រទេសអ៊ីរ៉ង់តបតាមសេចក្ដីសម្រេចរបស់ក្រុមប្រឹក្សាសន្តិសុខចាប់ពីឆ្នាំ២០០៦ដល់ឆ្នាំ២០១០ត្រូវអនុវត្តឡើងវិញចាប់ពីម៉ោង៨យប់ថ្ងៃអាទិត្យតទៅ។
រដ្ឋមន្ត្រីការបរទេសបារាំង អង់គ្លេស និងអាល្លឺម៉ង់បានចេញសេចក្ដីថ្លែងការណ៍រួមមួយជំរុញឱ្យអ៊ីរ៉ង់ និងរដ្ឋទាំងអស់ដែលជាសមាជិកអង្គការសហប្រជាជាតិអនុវត្តឱ្យបានពេញលេញទៅតាមសេចក្ដីសម្រេចដាក់ទណ្ឌកម្ម។ ប្រធានកិច្ចការបរទេសសហភាពអឺរ៉ុប លោកស្រីខាចា ខាឡាស់ (Kaja Kallas) បញ្ជាក់នៅក្នុងសេចក្ដីប្រកាសថាសហភាពអឺរ៉ុបចាប់ផ្ដើមនីតិវិធីដាក់ទណ្ឌកម្មដោយឥតបង្អែបង្អង់តទៅទៀតឡើយ។ អ៊ីស្រាអែលប្រកាសគាំទ្រយ៉ាងពេញទំហឹងចំពោះសេចក្ដីសម្រេចនេះ៕
ចែករំលែកព័តមាននេះ