ទីក្រុងវ៉ាស៊ីនតោន៖ លោកត្រាំសង្ឃឹមថានឹងសម្រេចបានកិច្ចព្រមព្រៀងសន្តិភាពដើម្បីរំលត់ភ្លើងសង្គ្រាមនៅតំបន់ហ្កាហ្សានាពេលពេលឆាប់ៗនេះ។ លោកបង្ហាញសុទិដ្ឋិនិយមយ៉ាងដូច្នេះតាមរយៈការបង្ហោះសារនៅលើបណ្ដាញសង្គមទ្រូសសូសល (Truth Social)។ សំណើរបស់លោកត្រាំដែលចង់បញ្ចប់សង្គ្រាមនោះទទួលបានចម្លើយតបដ៏ល្អបំផុត។ លោកសង្ឃឹមថានាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ នឹងគាំទ្រសំណើនេះជាមិនខាននៅពេលលោកទាំង២ត្រៀមជួបគ្នានៅយប់នេះ។
ប្រេសិតពិសេសរបស់លោកត្រាំលោកស្ទីវវីតខូស (Steve Witkoff) និងកូនប្រសារបស់លោកត្រាំកំពុងពិភាក្សាជាមួយលោកណឺតាន់យ៉ាហ៊ូនៅញូយ៉ក។ លោកត្រាំថ្លែងនៅក្នុងបទសម្ភាសថ្មីៗនេះថាយើងទទួលបានការឆ្លើយតបដ៏ល្អបំផុតព្រោះលោកណឺតាន់យ៉ាហ៊ូក៏ចង់បានកិច្ចព្រមព្រៀងសន្តិភាពផងដែរ។ លោកថាគ្រប់ភាគីទាំងអស់សុទ្ធតែចង់បានកិច្ចព្រមព្រៀង។
នៅពេលថ្នាក់ដឹកនាំប្រទេសនានាជួបជុំគ្នានៅញូយ៉កដើម្បីចូលរួមមហាសន្និបាតអង្គការសហប្រជាជាតិកាលពីសប្ដាហ៍មុននោះ អាមេរិកបានបង្ហាញផែនការសន្តិភាព២១ចំណុចដែលជាប្រយោជន៍សម្រាប់តំបន់មជ្ឈិមបូព៌ាទាំងមូល។ ក្នុងនោះមានការអំពាវនាវឱ្យក្រុមហាម៉ាស់ដោះលែងចំណាប់ខ្មាំងដែលនៅរស់ និងប្រគល់សាកសពចំណាប់ខ្មាំងដែលបានស្លាប់, អ៊ីស្រាអែលមិនត្រូវវាយប្រហារប្រទេសកាតាតទៅទៀតទេ និងការចាប់ផ្ដើមសន្ទនាគ្នាឡើងវិញរវាងអ៊ីស្រាអែល និងប៉ាឡេស្ទីនដើម្បីរួមរស់ជាសន្តិសហវិជ្ជមាន។ នេះបើយោងតាមការបង្ហើបឱ្យដឹងពីមន្ត្រីសេតវិមាន។
អ្នកតំណាងរបស់ក្រុមហាម៉ាស់ថ្លែងថាខ្លួនមិនទាន់ទទួលបាននៅឡើយទេនូវផែនការសន្តិភាពរបស់អាមេរិកដែលបានធ្វើបទបង្ហាញនៅឯមហាសន្និបាតអង្គការសហប្រជាជាតិ។ លោកត្រាំកាលពីយប់មិញទទួលស្គាល់ថាប្រទេសអារ៉ាប៊ីសាអូឌីត, កាតា, អារ៉ាប់រួម, អេហ្ស៊ីប និងហ្សកដង់ជាអ្នកជួយជ្រោមជ្រែងនៅក្នុងបញ្ហានេះ។
លោកថ្លែងថាផែនការសន្តិភាពលើកនេះមិនត្រឹមតែបិទបញ្ចប់ជម្លោះប្រដាប់អាវុធនៅតំបន់ហ្កាហ្សាប៉ុណ្ណោះទេ ប៉ុន្តែនឹងគ្របដណ្ដប់ដ៏ទូលំទូលាយនៅទូទាំងតំបន់មជ្ឈិមបូព៌ាទាំងមូល។ លោកត្រាំសរសេររៀបរាប់ថាកិច្ចព្រមព្រៀងនេះពាក់ព័ន្ធនឹងមនុស្សគ្រប់គ្នា។ ដូច្នេះមនុស្សគ្រប់គ្នាប្រាថ្នាចង់បានកិច្ចព្រមព្រៀងនេះរួមទាំងក្រុមហាម៉ាស់ផងដែរព្រោះគ្រប់គ្នាចាប់ផ្ដើមនឿយណាយនឹងសង្គ្រាម។
លោកត្រាំមិនបានផ្ដល់សេចក្ដីលម្អិតពាក់ព័ន្ធនឹងកិច្ចព្រមព្រៀងដែលស្នើសុំឱ្យអ៊ីស្រាអែលបញ្ចប់សង្គ្រាមជាថ្នូរនឹងការដោះលែងចំណាប់ខ្មាំងនោះទេ។ ប៉ុន្តែអនុប្រធានាធិបតីអាមេរិក លោកជេឌីវេន ថ្លែងប្រាប់ទូរទស្សន៍ហ្វក់ (Fox) ថាមន្ត្រីកំពូលរបស់អាមេរិកកំពុងចូលរួមយ៉ាងសកម្មនៅក្នុងការចរចាដ៏ស្មុគស្មាញបំផុតជាមួយថ្នាក់ដឹកនាំអ៊ីស្រាអែល និងអារ៉ាប់។
លោកវេនថ្លែងបន្តទៀតថានៅក្នុងសេចក្ដីព្រាងនៃកិច្ចព្រមព្រៀងសន្តិភាពនេះមានធាតុសំខាន់ៗចំនួនបី ទី១-ការដោះលែងចំណាប់ខ្មាំង និងប្រគល់សាកសពចំណាប់ខ្មាំង, ទី២-ហាម៉ាស់ត្រូវបញ្ឈប់ការគំរាមកំហែងទៅលើសន្តិសុខជាតិរបស់អ៊ីស្រាអែល និងទី៣-អ៊ីស្រាអែលត្រូវជួយសម្រួលការផ្ដល់ជំនួយមនុស្សធម៌នៅតំបន់ហ្កាហ្សា។ លោកថ្លែងដោយមោកភាពថាភាគីដែលពាក់ព័ន្ធនឹងបញ្ហានេះជិតព្រមព្រៀងគ្នាទៅលើចំណុចទាំងបីនេះហើយ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ