ខេត្តបាត់ដំបង ៖ បទល្មើសដដែលៗបានកើតឡើងដដែលៗម្ដងហើយម្ដងទៀត នៅពេលដែលកម្លាំងសមត្ថកិច្ច និងអាជ្ញាធរដែនដីមិនមានលទ្ធភាពធ្វើការស្រាវជ្រាវតាមចាប់មេខ្លោង«រត់ពន្ធបារីឆ្លងដែន»យកមកផ្តន្ទាទោសបាន ដែលប្រភពនានាបានបង្ហើបថា«មេខ្លោង» រត់ពន្ធបារីឆ្លងដែនខុសច្បាប់ប៉ុន្មានលើកកន្លងមកនេះ រស់នៅមិនឆ្ងាយពីស្រុកសំពៅលូនឡើយ» ដែលយើងនឹងផ្សាយឈ្មោះច្បាស់នៅពេលក្រោយទៀត ដើម្បីឱ្យចេះរាង ។
បទល្មើស «រត់ពន្ធបារីខុសច្បាប់»ដដែលៗនេះ ត្រូវបានបង្ក្រាបជាថ្មីទៀត ដោយកម្លាំងការពារព្រំដែនកម្ពុជា-ថៃ កាលពីរសៀលថ្ងៃទី២៨ កញ្ញា នៅក្បែរច្រករបៀង«បឹងឆ្នាំង» ស្ថិតក្នុងភូមិព្រះពុទ្ធ ឃុំកំរៀង ស្រុកកំរៀង ។
យោងតាមមន្ត្រីព្រំដែន៖ ជនល្មើសបានដឹកបារីតាមរថយន្តមួយគ្រឿងម៉ាក«ស៊ីណា»បម្រុងយកទៅលាក់ទុកបណ្ដោះអាសន្ននៅក្បែរច្រករបៀងនោះ ដើម្បីរង់ចាំឱកាសល្អ បញ្ជូនឆ្លងអូរព្រំដែនចេញទៅប្រទេសថៃ ។ ប៉ុន្តែចៃដន្យត្រូវកម្លាំងយោធា និងកម្លាំងនគរ
បាលការពារព្រំដែនបង្ក្រាបបាន មុនពេលហោះឆ្លងអូរព្រំដែន ។
ប្រភពដដែលបានប្រាប់ថា ជាមួយនឹងការបង្ក្រាបបទល្មើសសេដ្ឋកិច្ចខាងលើនេះ សមត្ថកិច្ចបានឃាត់ខ្លួនអ្នកដឹកជញ្ជូនបារីម្នាក់ (តៃកុងរថយន្ត) ឈ្មោះ ប៉ុន សុភឿន អាយុ៤៨ឆ្នាំ រស់នៅភូមិគីឡូ១៣ ឃុំសន្តិភាព ស្រុកសំពៅលូន រឹបអូសយករថយន្តមួយគ្រឿង និងបារីម៉ាកORIS ចំនួន៤៩
ប៊ិច។
ក្រោយធ្វើកំណត់ហេតុដកហូតវត្ថុតាង និងសួរនាំបឋម ទាំងជនសង្ស័យទាំងវត្ថុតាង ត្រូវបានបញ្ជូនទៅកាន់ការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋានខេត្ត ដើម្បីចាត់ការបន្តតាមនីតិវិធី ។
កោះសន្តិភាពមិនអាចទំនាក់ទំនង លោក យី យក់សាន្ត ប្រធានការិយាល័យប្រឆាំងបទល្មើសសេដ្ឋកិច្ច ដើម្បីសុំការបំភ្លឺបន្ថែមបានទេ នៅព្រឹកថ្ងៃទី២៩ កញ្ញា ជុំវិញចំណាត់ការបន្ត លើអំពើរត់ពន្ធបារីខុសច្បាប់ខាងលើនេះ ។ ដោយឡែក លោកឧត្តមសេនីយ៍ទោ ដាញ់ អេងប៊ុនចាន់ ស្នងការខេត្តវិញ ក៏មិនលើកទូរស័ព្ទ ដូចលើកមុនៗដែរ ។
នេះជាលើកទី៣ហើយ ដែលបទល្មើសសេដ្ឋកិច្ច «រត់ពន្ធបារីឆ្លងដែនខុសច្បាប់» បានកើតឡើងយ៉ាងគគ្លើនម្ដងហើយម្ដងទៀត នៅតាមបន្ទាត់ព្រំដែនកម្ពុជាសៀម នៅក្នុងភូមិសាស្ត្រ ខេត្តបាត់ដំបង ខណៈដែលស្ថានភាពតាមបន្ទាត់ព្រំដែននៃប្រទេសទាំងពីរ ត្រូវបានបិទជិតឈឹងមិនឲ្យមានការទំនាក់ទំនងគ្នា ក្រោយប៉ះទង្គិចគ្នាមួយប្រាវដោយអាវុធ ។ ប៉ុន្តែផ្ទុយទៅវិញ ក្រុមជនទុច្ចរិតនៅតែចិញ្ចឹមចិត្តស្វែងរកចន្លោះប្រហោង ដើម្បីលួចប្រព្រឹត្តបទល្មើសឆ្លងដែនបានដដែល ។ ជាពិសេស អំពើ«រត់ពន្ធបារី»នេះតែម្ដង។
លើកទី១ បារីចំនួន១៥,០០០កញ្ចប់ បានលួចឆ្លងដែនទៅប្រទេសសៀម ក្នុងទឹកដីស្រុកសំពៅ កាលពីថ្ងៃទី០៥ កក្កដា កន្លងទៅនេះ ហើយត្រូវពួកទាហានសៀមចាប់បានទាំងបារីទាំងកម្មករខ្មែរចំនួន០២នាក់ ។
លើកទី២ កម្លាំងការពារព្រំដែនកម្ពុជា បង្ក្រាបបាន យ៉ាងសន្ធឹកសន្ធាប់ទៀត នៅក្នុងទឹកដីស្រុកភ្នំព្រឹកម្ដង នៅថ្ងៃទី១៩ កញ្ញា ។ ជាមួយនឹងការបង្ក្រាបក្រុមអ្នករត់ពន្ធបារីនៅស្រុកភ្នំព្រឹកនេះ កម្លាំងយោធា និងកម្លាំងនគរបាល ការពារព្រំដែនរឹបអូសយកត្រាក់ទ័រមួយគ្រឿងដែលកំពុងដឹកជញ្ជូនបារីចំនួន១១១ប៊ិក និង ឃាត់ខ្លួនក្រុមកម្មករដឹកជញ្ជូនបារីចំនួន០៧នាក់ទៀត បញ្ជូនទៅកាន់ស្នងការដ្ឋានខេត្ត ដើម្បីចាត់ការតាមនីតិវិធី ។
លុះលើកទី៣នេះ កម្លាំងការពារព្រំដែនជួរមុខកម្ពុជានៅស្រុកកំរៀង ចាប់បានទាំងរថយន្ត ទាំងបារីចំនួន៤៩ប៊ិក និងអ្នកបើករថយន្តម្នាក់ផង ។ បទល្មើសដដែលៗ (រត់ពន្ធបារីឆ្លងដែនខុសច្បាប់) ដែលបានកើតឡើងដដែលៗ នៅតាមបណ្ដាស្រុកមួយចំនួន ជាប់ព្រំដែនកម្ពុជា-ថៃ ភាគខាងលិចខេត្តបាត់ដំបងនេះ ហាក់បានបង្ហាញពីភាពគគ្លើនរបស់ក្រុមឈ្មួញទុច្ចរិតដែលនៅកំពុងរួចខ្លួន នៅពេលដែលសមត្ថកិច្ចជំនាញ និងអាជ្ញាធរដែនដីគ្មានលទ្ធភាពធ្វើការស្រាវជ្រាវតាមស្វែងរកចាប់ខ្លួនមេខ្លោងបាន ។ បើតាមប្រភពព្រាវៗពីមន្ត្រីមួយចំនួនដែលធ្លាប់ដឹងពីបទល្មើស «រត់ពន្ធបារី» នេះ បានបង្ហើបថា កាលពីប្រទេសកម្ពុជា និងសៀម មិនទាន់ឈ្លោះគ្នាបិទព្រំដែន បារីនេះត្រូវបានពួកឈ្មួញលួចនាំចេញស្ទើររាល់ថ្ងៃ តាមច្រករបៀងនានាក្នុងភូមិសាស្ត្រ ស្រុកសំពៅលូន ដែលមានមេឈ្មួញធំ នៅស្រុកនោះតែម្ដង។
ប៉ុន្តែក្រោយប្រទេសទាំងពីរមានអរិភាពនឹងគ្នា រហូតឈានដល់ការបិទព្រំដែនជិតទាំងស្រុង ប៉ុន្តែពួកឈ្មួញទុច្ចរិតហាក់មិននៅស្ងៀមទេ ដែលគេហៅថា ខានស៊ី។ ពួកគេនៅតែស្វះស្វែង ទំនាក់ទំនងជាមួយពួកឈ្មួញទុច្ចរិតថៃស្រាវជ្រាវរកចំណុចចន្លោះប្រហោងតាមបន្ទាត់ព្រំដែន ដើម្បីលួចនាំចេញបារីឆ្លងដែន ដោយខុសច្បាប់បានដដែល ។
គេសង្ស័យមេខ្លោង «រត់ពន្ធបារី ឆ្លងដែនខុសច្បាប់» នេះកំពុងសំងំនៅផ្ទះក្នុងស្រុកសំពៅលូន ។ ដូច្នេះ បទល្មើស«រត់ពន្ធបារីឆ្លងដែន»នេះ ប្រសិនបើសមត្ថកិច្ចជំនាញមិនអាចតាមចាប់ខ្លួនមេឈ្មួញធំបានទេ ឬនៅតែជួយលាក់បាំងដោយប្រការណាមួយ បទល្មើសនេះនៅតែបង្កឲ្យមានផលលំបាកកាន់តែខ្លាំង និងអាចនាំឲ្យអំពល់ទុក្ខដល់ថ្នាក់ដឹកនាំទៀតផង ស្របពេលដែលប្រទេសទាំងពីរកំពុងមើលមុខគ្នាមិនចំផង ៕
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ