រាជធានីភ្នំពេញ ៖ លោក ហេង រតនា អគ្គនាយកស៊ីម៉ាក បានប្រកាសនៅលើបណ្តាញសង្គមនារសៀលថ្ងៃទី២៩ ខែកញ្ញានេះថា ៖ កន្លងមកមានអ្នកស្នើសុំខ្ញុំឱ្យជួយបកស្រាយ…
រាជធានីភ្នំពេញ ៖ លោក ហេង រតនា អគ្គនាយកស៊ីម៉ាក បានប្រកាសនៅលើបណ្តាញសង្គមនារសៀលថ្ងៃទី២៩ ខែកញ្ញានេះថា ៖ កន្លងមកមានអ្នកស្នើសុំខ្ញុំឱ្យជួយបកស្រាយ ដោយចោទជាសំណួរថា«ធ្វើយ៉ាងម៉េច បានដឹងថា គ្រាប់បែកទម្លាក់ពីយន្តហោះ ឬគ្រាប់បាញ់ផ្លោងពីសម័យសង្គ្រាមមុនៗ និងគ្រាប់បែកទម្លាក់ពីយន្តហោះ ឬគ្រាប់បាញ់ផ្លោងក្នុងសង្គ្រាមតាមព្រំដែនថ្មីៗនេះ!?»
អគ្គនាយកស៊ីម៉ាក បានបញ្ជាក់ថា ចម្លើយខ្លី ៖ បើផ្អែកតាមលក្ខណៈបច្ចេកទេស មានចំណុចវិភាគសំណាកជាច្រើនដែលខ្ញុំសុំមិនធ្វើការបកស្រាយលំអិតក្នុងវាទិកានេះទេ និងសុំលើកយកចំណុចសង្ខេបខ្លី មកបញ្ជាក់ជូនជ្រាបថា ៖ គ្រាប់បែកទម្លាក់ពីយន្តហោះក្តី ឬគ្រាប់កាំភ្លើងធំក្តី សុទ្ធតែមានលេខកូដសម្គាល់ខែឆ្នាំផលិត ឬប្រទេស/ក្រុមហ៊ុនផលិត ។
បន្ថែមលើសនេះ សម្រាប់កម្ពុជា រាជរដ្ឋាភិបាល បានពង្រឹងសមត្ថភាពអង្គភាពCMAC ក្នុងការធ្វើការសិក្សាស្រាវជ្រាវព័ត៌មាននិងរៀបចំទិន្នន័យការទម្លាក់គ្រាប់បែកក្នុងសម័យសង្គ្រាមអតីតកាល បានយ៉ាងច្បាស់លាស់ ដោយមានកំណត់ត្រាព័ត៌មានពាក់ពន្ធ័ការទម្លាក់គ្រាប់បែកពីយន្តហោះ ដូចជា កាលបរិច្ឆេទ ប្រភេទយន្តហោះ និងចំណុចទីតាំងនៃការទម្លាក់គ្រាប់បែកទាំងនោះផងដែរ ។
ជាងនេះទៀត ប្រការដូចខាងលើនេះជាលក្ខណៈបច្ចេកទេស គ្មានការយល់ច្រឡំគ្នា រវាងគ្រាប់បែកទម្លាក់ពីយន្តហោះ ក្នុងសង្គ្រាមថ្មីៗនេះ ជាមួយគ្រាប់បែកទម្លាក់ពីយន្តហោះក្នុងសម័យសង្គ្រាមអតីតកាលឡើយ!!៕
ចែករំលែកព័តមាននេះ