ខេត្តតាកែវ ៖ នៅព្រឹកថ្ងៃទី 29 ខែកញ្ញាឆ្នាំ 2025 ក្រុមអាជីវករផ្សារអង្គតាសោមជិត 50 នាក់បាននាំគ្នាតវ៉ានៅសាលាស្រុកត្រាំកក់ករណីដែលអាជ្ញាធរចាត់ចែងរៀបចំសណ្តាប់ធ្នាប់ដែលធ្វើឲ្យប៉ះពាល់ដល់ការលក់ដូររបស់ពួកគាត់។ យ៉ាងណាក៏ដោយបន្ទាប់ពីការសម្របសម្រួលនៅក្នុងសាលាស្រុកនៅព្រឹកថ្ងៃដដែលនេះក្រុមអាជីវករបានត្រឡប់មកលក់ដូរជាធម្មតាវិញហើយ។…
ខេត្តតាកែវ ៖ នៅព្រឹកថ្ងៃទី 29 ខែកញ្ញាឆ្នាំ 2025 ក្រុមអាជីវករផ្សារអង្គតាសោមជិត 50 នាក់បាននាំគ្នាតវ៉ានៅសាលាស្រុកត្រាំកក់ករណីដែលអាជ្ញាធរចាត់ចែងរៀបចំសណ្តាប់ធ្នាប់ដែលធ្វើឲ្យប៉ះពាល់ដល់ការលក់ដូររបស់ពួកគាត់។ យ៉ាងណាក៏ដោយបន្ទាប់ពីការសម្របសម្រួលនៅក្នុងសាលាស្រុកនៅព្រឹកថ្ងៃដដែលនេះក្រុមអាជីវករបានត្រឡប់មកលក់ដូរជាធម្មតាវិញហើយ។
នៅក្នុងលិខិតដាក់ជូនលោកអភិបាលស្រុកត្រាំកក់ក្រុមអាជីវករបានឲ្យដឹងថា
កម្មវត្ថុ៖ ស្នើសុំឆ្លើយតបចំពោះលិខិតជូនដំណឹង លេខ ០១១/២៥ ស.ជ.ណ ចុះថ្ងៃទី២ ខែមិថុនា ឆ្នាំ២០២៥ ស្តីពីការរៀបចំសណ្តាប់ធ្នាប់ និងរបៀបរៀបរយតាមផ្លូវសាធារណៈនៅទីប្រជុំជនផ្សារអង្គតាសោម របស់រដ្ឋបាលស្រុកត្រាំកក់។
យោង ៖ -សារាចរ លេខ ០៨ ស.រ ចុះថ្ងៃទី១៥ ខែសីហា ឆ្នាំ២០១៦ ស្តីពីការគ្រប់គ្រងផ្សារគ្រប់ប្រភេទនៅទូទាំង ប្រទេស របស់រាជរដ្ឋាភិបាលកម្ពុជា ។
-យោងតាមការចាំបាច់ដើម្បីផ្គត់ផ្គង់ជីវភាពប្រចាំថ្ងៃ របស់អាជីវកម្មរងផលប៉ះពាល់។
បន្ទាប់ពីយើងខ្ញុំជាអាជីវករបានទទួលដំណឹងពីការរៀប ចំសណ្តាប់ធ្នាប់ និងរបៀបរៀបរយតាមផ្លូវសាធារណៈនៅទីប្រជុំជនផ្សារអង្គតាសោម និងទុកឱសានវាទឱ្យយើងខ្ញុំរយៈពេល ១០ថ្ងៃជាកំហិត ចាប់ពីថ្ងៃជូនដំណឹងទី២ ខែមិថុនា ឆ្នាំ២០២៥ តាមរយៈលិខិតជូនដំណឹង លេខ ០១១/១៨ សជណ ដើម្បីឱ្យយើងខ្ញុំជាអាជីវករ លក់ដូរ នៅទីតាំងខាងលើនេះរុះរើតូបលក់ដូរ ក្នុងហេតុផលផ្សេងៗដែលមិនត្រឹមត្រូវនឹង ស្ថានភាពជាក់ស្តែង។
យើងខ្ញុំពិតជាមានអារម្មណ៍តក់ស្លុត មានក្តីកង្វល់ និងសោកស្តាយជាពន់ពេកចំពោះវិធានការ របស់រដ្ឋបាលស្រុកត្រាំកក់ ដែលគ្រោងនឹងធ្វើមកលើអាជីវករដែលអ្នកខ្លះមានអតីតភាពលក់ដូរក្រោម ១០ឆ្នាំ លើស១០ឆ្នាំ ដល់ក្រោម២០ឆ្នាំ និងអ្នកខ្លះទៀតលើសពី២០ឆ្នាំ តាំង ពីជំនាន់អភិបាល នៃគណៈអភិបាលស្រុកចាស់ច្រើនអាណត្តិ នៅក្នុងស្ថានភាពសេដ្ឋកិច្ចសកល និងកម្ពុជាមានបញ្ហាប្រឈម និងស្ថានភាពជីវភាពរបស់អាជីវករលក់ដូរក្នុងផ្សារ កំពុងរងការគំរាមកំហែងលក់មិនដាច់ និងរងផលប៉ះពាល់ដូចជាការរកព្រឹកខ្វះល្ងាច និងត្រូវមានបន្ទុកចិញ្ចឹមក្រពះ និងផ្គត់ផ្គង់កូនៗបានរៀនសូត្រ បែបនេះឡើយ។
យើងខ្ញុំសូមគូសបញ្ជាក់ថា ការលើកឡើងអំពីមូលហេតុ៖
ផ្សេងៗនៅក្នុងលិខិតជូនដំណឹង របស់ រដ្ឋបាលស្រុកត្រាំកក់ គឺពុំត្រឹមត្រូវតាមស្ថានភាពជាក់ស្តែងនោះឡើយ ព្រោះអាជីវករ ដែលប្រើប្រាស់ និងអាស្រ័យផលក្នុងផ្សារអង្គតាសោម គឺលក់ដូរជាលក្ខណៈកញ្ច្រែង កញ្ជើ ល្អី និងរាន ដែលងាយស្រួល ក្នុងការុះរើ និងចល័ត។ ម្យ៉ាងទៀតក្នុងទីតាំងភូមិសាស្ត្ររបស់ផ្សារ តើមានផ្លូវក្រវ៉ាត់ជុំវិញ មិនបង្កក្តីរំខានដល់ការធ្វើដំណើររបស់សាធារណៈជននោះឡើយ ហើយលើសពីនេះទៅទៀត អាជីវករភាគច្រើនគឺលក់លើគំនូសដែលអភិបាល នៃគណៈអភិបាលស្រុកចាស់ រៀបចំគូសជូន និងមានការបង់ថ្លៃភាស៊ីជាប្រចាំថ្ងៃត្រឹមត្រូវ។
យ៉ាងណាមិញ តាមរយៈ សារាចរ លេខ ០៨ ស.រ ចុះថ្ងៃទី១៥ ខែសីហា ឆ្នាំ២០១៦ ស្តីពីការគ្រប់គ្រងផ្សារគ្រប់ប្រភេទនៅទូទាំងប្រទេសនិង សារាចរលេខ១១ សរ ចុះថ្ងៃទី៩ ខែធ្នូ ឆ្នាំ២០១៦ ស្តីពីការលុបការបង់ថ្លៃចំពោះប្រជាពលរដ្ឋលក់ដូរតាមកញ្ច្រែង កញ្ជើ ល្អី របស់រាជ រដ្ឋាភិបាលកម្ពុជា ដែលបានដាក់ចេញកន្លងមក គឺមានគោលបំណងដើម្បីការពារ និងផ្តល់ក្តីអនុគ្រោះខ្លាំង ដល់អាជីវករលក់ដូរបន្តិចបន្តួច ដើម្បីចឹញ្ចឹមក្រពះ និងក៏ជម្រុញឱ្យរដ្ឋបាលថ្នាក់ក្រោមជាតិខិតខំការពារ និងផ្តល់ការអនុគ្រោះផងដែរ។ ប៉ុន្តែហេតុអ្វីបានជា រដ្ឋបាលស្រុកត្រាំកក់ ចេញលិខិតមកយើងខ្ញុំបែបនេះទៅវិញ។
តាមរយៈការរៀបរាប់ខាងលើសូមសំណូមពរ៖
ទី១.សុំរក្សាកន្លែងលក់ដូររបស់អាជីវករឱ្យនៅដដែល ប៉ុន្តែសុំត្រឹមរៀបចំសណ្តាប់ធ្នាប់ឱ្យបានល្អ
ទី២.សុំឱ្យអ្នកមានផ្ទះ ឬតូបលក់ដូរត្រឹមត្រូវកុំតសំយ៉ាប លយមកមុខ ឬដាក់សម្ភារហៀរចេញមកផ្លូវឬ យកដីសាធារណៈមុខផ្ទះរបស់ខ្លួនជួលដើម្បីប្រយោជន៍ខ្លួនឯង
ទី៣. សុំឱ្យ រដ្ឋបាលស្រុកត្រាំកក់ រៀបចំផ្សារ ឬកន្លែងលក់ដូរថ្មីឱ្យបានត្រឹមត្រូវជាមុនសិន មុននឹងសម្រេច ជម្លៀសអាជីវករទៅលក់ដូរកន្លែងថ្មី ព្រោះប្រសិនបើអាជីវករលក់ដូរបន្តិចបន្តួចគ្មានកន្លែងលក់ដូរ
គឺមានផលប៉ះពាល់ និងបញ្ហាប្រឈមច្រើនដល់សេដ្ឋកិច្ច អ្នកក្នុងបន្ទុកគ្រួសារ និងសង្គមទាំងមូល
ទី៤. សុំចេញបង្កាន់ដៃកាន់កាប់ឱ្យអាជីវករចាស់ៗ ដើម្បីគាត់បានចូលរួមអភិវឌ្ឍសង្គម និងសេដ្ឋកិច្ច
ទី៥.សុំយកជីវភាពរបស់ប្រជាពលរដ្ឋទន់ខ្សោយជាអាទិភាព ដោយគប្បីរកវិធីសាស្ត្រដោះស្រាយឱ្យមាន លក្ខណៈទន់ភ្លន់ និងកក់ក្តៅក្នុងនាមជាអាណាព្យាបាលប្រជាពលរដ្ឋមូលដ្ឋាន។
បន្ទាប់ពីការតវ៉ារបស់ក្រុមអាជីវករនៅព្រឹកថ្ងៃទី 29 ខែ កញ្ញានេះរដ្ឋបាលស្រុកហាក់ដូចជាបន្ធូរដៃហើយក្រុមអាជីវករក៏បានត្រឡប់ទៅលក់ដូរជាធម្មតាវិញ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ