ខេត្តកោះកុង ៖ ព្រឹកថ្ងៃទី១៣ កុម្ភៈ ពលរដ្ឋម្នាក់រស់នៅក្នុងខេត្តកំពង់ស្ពឺ និងភរិយា មានមុខរបរលក់ដូរ បានទូរស័ព្ទប្រាប់ភ្នាក់ងារកោះសន្តិភាពទាំងមិនទាន់បាត់ភ័យខ្លាចនៅឡើយថា នៅល្ងាចថ្ងៃទី១២ កុម្ភៈ រូបគាត់ និងភរិយា បានជិះរថយន្តផ្ទាល់ខ្លួនទៅចូលរួមពិធីមង្គលការកូនមិត្តភក្តិនៅឯទីរួមខេត្តកោះកុង ។
ខេត្តកោះកុង ៖ ព្រឹកថ្ងៃទី១៣ កុម្ភៈ ពលរដ្ឋម្នាក់រស់នៅក្នុងខេត្តកំពង់ស្ពឺ និងភរិយា មានមុខរបរលក់ដូរ បានទូរស័ព្ទប្រាប់ភ្នាក់ងារកោះសន្តិភាពទាំងមិនទាន់បាត់ភ័យខ្លាចនៅឡើយថា នៅល្ងាចថ្ងៃទី១២ កុម្ភៈ រូបគាត់ និងភរិយា បានជិះរថយន្តផ្ទាល់ខ្លួនទៅចូលរួមពិធីមង្គលការកូនមិត្តភក្តិនៅឯទីរួមខេត្តកោះកុង ។ បន្ទាប់ពីពិសាភោជនាហាររួចនៅវេលាម៉ោងប្រហែល៩ និង៣០នាទីយប់ ពួកគាត់ក៏បានជិះរថយន្តរបស់ខ្លួនម៉ាកកាមរីបាឡែន ត្រឡប់មកផ្ទះវិញ ។
នៅវេលាម៉ោងប្រមាណ១១ និង៤៥នាទីយប់ គាត់បានមកដល់ចំណុចផ្លូវបំបែកស្រែអំបិល ដែលត្រង់ចំណុចនេះបែកជា២ គឺម្ខាងបែកទៅរាជធានីភ្នំពេញ និងម្ខាងទៀតបែកទៅខេត្តព្រះសីហនុ និងនៅតែប្រហែល១០០ម៉ែត្រទៀត ដល់ផ្លូវជាតិលេខ៤ ។ ពួកគាត់បាននិយាយម្តងម្នាក់ថា ពេលពួកគាត់មកដល់ចំណុចខាងលើ ស្រាប់តែឃើញមានរថយន្តបាឡែនមួយគ្រឿង ឈប់ចំកណ្តាលទ្រូងផ្លូវបំបែកទៅរាជធានីភ្នំពេញ ព្រមទាំងមានមនុស្សឈរក្បែររថយន្តកាន់ពិលបញ្ចាំងភ្លើងសំដៅមករកពួក គាត់ ។ ចំណែកផ្លូវបំបែកទៅខាងស្តាំគឺជាផ្លូវបំបែកទៅខេត្តព្រះសីហនុ ក៏មានរថយន្តសុីរ៉ែន ពណ៌ខ្មៅ ឈប់នៅប្របនឹងចិញ្ចើមផ្លូវ និងមានឡូហ្គោកងរាជអាវុធហត្ថបិទនៅលើរថយន្តទៀតផង និងមានមនុស្សឈរកាន់ដំបងភ្លើងបញ្ជាចរាចរណ៍ ចំនួន២នាក់ ឈរចំកណ្តាលផ្លូវ ធ្វើឱ្យពួកគាត់លែងហ៊ានបើករថយន្តទៅមុខ ព្រោះខ្លាចបុកមនុស្សទាំង២នាក់នោះ ។
បន្ទាប់មកក៏មានបុរសវ័យកណ្តាលម្នាក់ កាន់ដំបងភ្លើងបញ្ជាចរាចរណ៍ ដើរសំដៅមករកមាត់ទ្វារខាងអ្នកបើកបរ ពេលនោះគាត់បានចុចកញ្ចក់ចុះបន្តិច រួចសួរទៅកាន់បុរសនោះវិញថា លោកជាសមត្ថកិច្ចខាងណា ហើយឃាត់រថយន្តខ្ញុំមានការអ្វី ? បុរសនោះក៏ឆ្លើយមកវិញថា សុំចុះចេញពីរថយន្ត ដើម្បីត្រួតពិនិត្យក្នុងរថយន្ត និងក្នុងគូទរថយន្ត ។ ទាំង២នាក់ប្តីប្រពន្ធ ដោយឮគេបញ្ជាឱ្យចុះដើម្បីឆែកឆេររថយន្តបែបនេះ ពួកគាត់ក៏សម្រេចបើករថយន្តចេញយ៉ាងលឿន ឆ្ពោះទៅកាន់ខេត្តព្រះសីហនុតែម្តង ព្រោះខណៈនោះមនុស្សរារាំងផ្លូវទាំង២នាក់ ពុំបានឈរនៅពីមុខរថយន្តដូចពីដំបូងទេ ។ ពលរដ្ឋ២នាក់ប្តីប្រពន្ធបានបានរៀបរាប់ទៀតថា ពេលនោះពួកគាត់បើករថយន្តទាំងភ័យញរអស់ហើយ ព្រោះពេលគាត់បើកចេញបានបន្តិច ក៏មានរថយន្តកាមរីបាឡែន ពណ៌ស បើកដេញពីក្រោយ តែដោយរថយន្តគាត់ដាច់ឆ្ងាយពីរថយន្តនោះ គាត់នឹកឃើញផ្ទះមិត្តភក្តិរបស់គាត់ម្នាក់នៅហួសផ្សារវាលរេញបន្តិច ក៏បើកចូលទៅទីនោះតែម្តង ព្រមជាមួយនោះដែរ រថយន្តកាមរីបាឡែនដែលបើកដេញតាម ក៏គេចខ្លួនបាត់ ។
លុះដល់វេលាម៉ោង៦ព្រឹក ថ្ងៃទី១៣ កុម្ភៈ ទើបពួកគាត់ ពឹងឱ្យមិត្តភក្តិបើករថយន្តឡិចសុីស៤៧០ ជូនមកដល់ខេត្តកំពង់ស្ពឺវិញ ។ ពួកគាត់ទាំង២នាក់ប្តីប្រពន្ធ បានប្រាប់កោះសន្តិភាពតាមទូរស័ព្ទទៀតថា ពួកគាត់មិនហ៊ានដាក់ពាក្យបណ្តឹងសំដៅជនប្រព្រឹត្តអំពើមកលើរូបគាត់ថា ជាករណីអ្វីទេ ប៉ុន្តែពួកគាត់សំណូមពរឱ្យអាជ្ញាធរខេត្តកោះកុង និងខេត្តព្រះសីហនុ វែកមុខស្រាវជ្រាវរកជនដែលបានធ្វើសកម្មភាពស្រដៀងនឹងចោរចាប់ជំរិត និងចោរប្លន់ដែលមានរូបភាពរថយន្តសុីរ៉ែន ដូចសមត្ថកិច្ចខាងលើនេះ មកផ្តន្ទាទោស បើទោះជាសមត្ថកិច្ចពិតប្រាកដ ក៏សកម្មភាពនេះគេហៅថាជាសកម្មភាពមនុស្សសង្គមងងឹតដែរ ។ ដោយយល់ថា នៅចំណុចកើតហេតុខាងលើនេះ ស្ថិតក្នុងទឹកដីខេត្តកោះកុង កោះសន្តិភាពបានទាក់ទងតាមទូរស័ព្ទទៅលោកវរសេនីយ៍ឯក ស្រេង ហុង មេបញ្ជាការរងកងរាជអាវុធហត្ថខេត្ត ប្រាប់អំពីសកម្មភាពខាងលើនេះដែរ តែលោកបដិសេធថា កម្លាំងរបស់លោកពុំដែលចេញធ្វើសកម្មភាពនៅពេលយប់ទេ ជាពិសេសយប់ថ្ងៃទី១២ កុម្ភៈ គឺមិនបានដឹងឡើយ ។
អ្នករស់នៅជុំវិញកន្លែងកើតហេតុខាងលើ បានទូរស័ព្ទប្រាប់កោះសន្តិភាពថា នេះពុំមែនជាករណីលើកទី១ទេ ដែលក្រុមខាងលើធ្វើសកម្មភាពដោយប្រើរូបភាពសមត្ថកិច្ច តែជំរិតទារប្រាក់ពីអ្នករកសុី ឬអ្នកធ្វើចរាចរណ៍លើផ្លូវជាតិលេខ៤៨ ដើម្បីទម្លាក់កំហុសមកលើសមត្ថកិច្ចខេត្តកោះកុង តែពួកគេជាសមត្ថកិច្ចនៅក្រោមអាណាចក្រខេត្តព្រះសីហនុ ៕
ចែករំលែកព័តមាននេះ