ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តដឹកទំនិញយីឌុបសណ្តោងរ៉ឺម៉ក ១គ្រឿង របស់ថៃ បើកគេចម៉ូតូ ១គ្រឿង ទៅផ្នែកខាងឆ្វេង ក៏ជ្រុលចង្កូតបុករថយន្តដឹកស្វាយរបស់អាជីវករខ្មែរ ១គ្រឿង ត្រូវផ្នែកចំហៀង បណ្តាលឲ្យរងការខូចខាតទាំងសងខាង និងជ្រុះផ្លែស្វាយនៅពាសពេញផ្លូវជាតិ។ ហេតុការណ៍នេះ បានកើតឡើងកាលពីវេលាម៉ោង ៨ និង ៣០នាទី ព្រឹកថ្ងៃទី១៤ កុម្ភៈ ២០១៤ តាមបណ្តោយផ្លូវជាតិលេខ៥៧A ក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ។
ទាំងជនរងគ្រោះ និងជនបង្កហេតុ ដែលបើករថយន្តបុកគ្នាខាងលើ មិនត្រូវប្រាប់ឲ្យស្គាល់អត្តសញ្ញាណទេ ក្រោយកើតហេតុបានសម្រួលគ្នានៅកន្លែងដោយថៅកែថៃ បង់សងថ្លៃការខូចខាតដល់ខាងភាគីរងគ្រោះខ្មែរ។
ប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា គេបានឃើញរថយន្តដឹកទំនិញប្រភេទយីឌុបរបស់ថៃ ពណ៌ស ១គ្រឿង ម៉ាកអ៊ីស៊ុយស៊ុយសណ្តោងរ៉ឺម៉កពីក្រោយ បើកបរដោយជនជាតិថៃវ័យក្មេងម្នាក់ ចេញពីព្រំដែនកម្ពុជា-ថៃ ទិសដៅពីលិចទៅកើត លុះមកដល់ចំណុចកើតហេតុ ស្រាប់តែរថយន្ត ១គ្រឿងនេះ គេចពីម៉ូតូ ១គ្រឿង ទៅខាងឆ្វេងដៃបណ្តាលឲ្យជ្រុលចង្កូតទៅបុករថយន្តដឹកស្វាយរបស់ឈ្មួញខ្មែរ ១គ្រឿងទៀត យ៉ាងពេញទំហឹង ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ចាម 3A-0879 ដឹកស្វាយពេញទ្រុង មកពីស្រុកស្អាង ខេត្តកណ្តាល ក្នុងទិសដៅពីកើតទៅលិច បមុ្រងយកទៅលក់នៅប្រទេសថៃ បណ្តាលឲ្យរងការខូចខាតយ៉ាងធ្ងន់ធ្ងរ និងចាក់ស្វាយពេញផ្លូវជាតិតែម្តង។
រថយន្តបង្កហេតុថៃ រងការខូចខាតផ្នែកខាងឆ្វេងស្រាល ហើយក្រោយពេលកើតហេតុភ្លាមៗ គេឃើញដំណាងរបស់ថៅកែថៃ មកធ្វើការចរចាសម្របសម្រួល ដើម្បីបញ្ចប់រឿងនៅនឹងកន្លែង។ ក្នុងករណីគ្រោះថ្នាក់ចរាចរណ៍នេះ មិនបណ្តាលឲ្យភាគីណាម្នាក់រងគ្រោះថ្នាក់ឡើយ៕
ចែករំលែកព័តមាននេះ