ខេត្តបន្ទាយមានជ័យ ៖ បុរសម្នាក់ត្រូវអ្នកស្រុកប្រទះឃើញចង.កលើដើមឈើកម្ពស់ប្រហែល ១០ម៉ែត្រ ក្នុងភូមិរស្មីសាមគ្គី សង្កាត់និមិត្ត ក្រុងប៉ោយប៉ែត កាលពីវេលាម៉ោង ១២ថ្ងៃត្រង់ ថ្ងៃទី១៥ កុម្ភៈ ២០១៤ បន្ទាប់ពីបាត់ខ្លួនពេលទៀបភ្លឺថ្ងៃកើតហេតុ។ សពរងគ្រោះឈ្មោះ យ៉ង់ អឿន អាយុ ៥០ឆ្នាំ ជាកសិករ មានទីលំនៅក្នុងភូមិកើតហេតុ។ ជនរងគ្រោះចង.កនឹងខ្សែគោលើដើមដង្កោ ចម្ងាយពីផ្ទះរបស់ខ្លួនប្រហែលជិត ៥០០ម៉ែត្រ។
តាមស្ត្រីឈ្មោះ រឹម សាលួត អាយុ ៤៦ឆ្នាំ ជាប្រពន្ធជនរងគ្រោះ បានប្រាប់ថា ប្ដីរបស់គាត់បាត់ពីផ្ទះនៅវេលាម៉ោងប្រហែល ៣ទៀបភ្លឺ ថ្ងៃទី១៥ កុម្ភៈ មិនដឹងទៅណានោះទេ ប៉ុន្តែ ប្ដីគាត់មុនបាត់ខ្លួនកើតជំងឺកំរោលចូលចេះតែនិយាយប៉ប៉ាច់ប៉ប៉ោចមិនដេកមិនពួនទេ ធ្វើឲ្យគាត់ និងកូនៗ អត់ងងុយ ២ ទៅ ៣យប់ មកហើយៗ ក៏ញឹកញាប់ផងដែរក្នុង ១ខែ រហូត ២ ទៅ ៣ ដង។
ស្ត្រីជាប្រពន្ធប្រាប់បន្តថា ពេលប្ដីគាត់បាត់ខ្លួន គឺគាត់ និងកូនៗ បាននាំគ្នាដើររកជាច្រើនកន្លែងដែរ តែរកមិនឃើញ លុះប្ដីប្រពន្ធមួយគ្រួសារជាអ្នកជិតខាងឈ្មោះ ប៊ូ វាសនា អាយុ ៣២ឆ្នាំ ប្រពន្ធឈ្មោះ សុផា អាយុ ២៩ឆ្នាំ ទៅរកអុសប្រទះឃើញ ហើយមកប្រាប់ទើបគាត់ និងកូនៗដឹង។ នៅកន្លែងកើតហេតុគេឃើញសមត្ថកិច្ចនគរបាលក្រុងប៉ោយប៉ែត សហការជាមួយសមត្ថកិច្ចនគរបាលរដ្ឋបាលសង្កាត់និមិត្ត ព្រមទាំងគ្រូពេទ្យជំនាញបានចុះដល់កន្លែងកើតហេតុ ដើម្បីធ្វើកោសល្យវិច្ឆ័យ។
លោក ម៉ារិន មេប៉ុស្តិ៍រដ្ឋបាលនគរបាលសង្កាត់និមិត្ត ប្រាប់តាមទូរស័ព្ទថា គ្រូពេទ្យជំនាញបានបញ្ជាក់ថា សពរងគ្រោះចង.កធ្វើអត្តឃាតដោយខ្លួនឯង។ គួរបញ្ជាក់ថា សពចង.កនេះ ខុសពីសពចង.កដទៃ គឺខ្ពស់ទាល់តែកូនប្រុសឡើងកាត់ចំណង ហើយអ្នកស្រុកជួយសំរូតចុះទើបសពដល់ដីបាន។ សពរងគ្រោះត្រូវក្រុមគ្រួសាររៀបចំធ្វើបុណ្យតាមប្រពៃណី៕
ចែករំលែកព័តមាននេះ