រាជធានីភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ បានមានប្រសាសន៍ កាលពីថ្ងៃទី១១ កុម្ភៈ បន្ទាប់ពីវិលត្រឡប់មកដល់ប្រទេសវិញថា គណបក្សសង្គ្រោះជាតិនៅតែប្រកាន់ជំហរចរចាជាមួយគណបក្សប្រជាជនកម្ពុជា ដើម្បីដោះស្រាយបញ្ហានយោបាយកន្លងមក ។ ការដោះស្រាយនេះទាល់តែគណបក្សទាំងពីរនៅជិតគ្នា ហើយគណបក្សសង្គ្រោះជាតិនៅតែបើកចំហ និងប្រកាន់ជំហរចរចាដោយសន្តិវិធី អហិង្សា និងគោរពប្រជាជនជាធំ ។ យើងធ្វើអ្វីៗដោយសន្តិវិធី មានន័យថា ការជួបជជែកគ្នាដោយផ្ទាល់មិនអាចជជែកគ្នាពីចម្ងាយបានទេ ។
លោក សម រង្សុី បន្តថា ដើម្បីដឹងសខ្មៅ ភាគីនីមួយៗអាចយល់ព្រមធ្វើកាយវិការសុច្ឆន្ទៈដល់កម្រិតណា ដល់តែយើងស្ទាបស្ទង់គ្នាឱ្យបានច្បាស់ ដើម្បីឈានទៅមុខ ។ គណបក្សសង្គ្រោះជាតិនៅតែប្រកាន់ជំហរដដែល រួមមានប៉ុស្តិ៍វិទ្យុ ទូរទស្សន៍ និងការបោះឆ្នោតឡើងវិញ ទាមទារគណៈកម្មាធិការអចិន្ត្រៃយ៍សភាស្នើគ្នា ជាមួយគណបក្សប្រជាជនកម្ពុជា ។ លោក សម រង្សុី បញ្ជាក់ថា គណបក្សសង្គ្រោះជាតិប្រកាន់ជំហរគឺធ្វើយា៉ងណា ការបោះឆ្នោតឱ្យបានត្រឹមត្រូវ ចាប់ពីថ្ងៃនេះទៅថ្ងៃមុខ ការបោះឆ្នោតកុំឱ្យមានបញ្ហាដូចមុនទៀត ។ ក្នុងរយៈពេលចាប់ពីថ្ងៃនេះ រហូតដល់ការបោះឆ្នោតនៅថ្ងៃខាងមុខ ធ្វើយា៉ងណាឱ្យគណបក្សសង្គ្រោះជាតិការពារផលប្រយោជន៍ប្រជាពលរដ្ឋ ។
លោក សម រង្សុី បន្ថែមថា ចំពោះការលើកឡើងរបស់សម្តេចនាយករដ្ឋមន្ត្រី ហ៊ុន សែន ដែលថា សម្តេចឡើងតាមរដ្ឋធម្មនុញ្ញ ហើយចុះក៏ចុះតាមរដ្ឋធម្មនុញ្ញដែរនោះ លោក សម រង្សុី បានថ្លែងថា អ្នកកាន់អំណាចតែងតែធ្វើផ្ទុយពីរដ្ឋធម្មនុញ្ញ ។ ជាក់ស្តែងកាលពីឆ្នាំ១៩៩៣ គ្មានច្បាប់ណាចែងឱ្យមាននាយករដ្ឋមន្ត្រីពីរនោះទេ តែផ្ទុយទៅវិញកម្ពុជាមាននាយករដ្ឋមន្ត្រីដល់ទៅពីរ ។ មួយវិញទៀតនៅឆ្នាំ១៩៩៨ មានរដ្ឋធម្មនុញ្ញណា ដែលចែងឱ្យមានស្ថាប័នព្រឹទ្ធសភា រហូតដល់ផ្តល់តំណែងដល់សម្តេច ជា សីុម ជាប្រធានព្រឹទ្ធសភា និងឆ្នាំ២០០៣ ក៏មានការបោះឆ្នោតជាកញ្ចប់ដែលការបោះឆ្នោតនោះ ជ្រើសរើសទាំងប្រធានរដ្ឋសភា និងនាយករដ្ឋមន្ត្រីផង។ បញ្ហានេះជាបញ្ហាផ្ទៃក្នុងរបស់គណបក្សប្រជាជនកម្ពុជា និងផ្ទុយពីរដ្ឋធម្មនុញ្ញ បញ្ហានេះបានធ្វើឱ្យមានការធ្វើវិសោធនកម្មរដ្ឋធម្មនុញ្ញជាហូរហែតាមផ្លូវនយោបាយ ។
លោក សម រង្សុី បានថ្លែងទៀតថា ដើម្បីដោះស្រាយបញ្ហានយោបាយនៅក្នុងឆ្នាំ២០១៤នេះ គណបក្សសង្គ្រោះជាតិចង់មានដំណោះស្រាយណាមួយសមស្រប ដើម្បីឈានដល់ការកែរដ្ឋធម្មនុញ្ញដែលអាចធ្វើបាន ។ ចំពោះបញ្ហាដឹកនាំធ្វើបាតុកម្មសាជាថ្មី លោក សម រង្សុី មិនទាន់បញ្ជាក់ច្បាស់ទេ គ្រាន់តែសំណូមពរដល់សម្តេចតេជោនាយករដ្ឋមន្ត្រី ហ៊ុន សែន ឱ្យគោរពរដ្ឋធម្មនុញ្ញ និងគោរពសិទ្ធិប្រជាពលរដ្ឋ នៅពេលណាគណបក្សប្រជាជនកម្ពុជា គោរពរដ្ឋធម្មនុញ្ញហើយ ទើបគណបក្សសង្គ្រោះជាតិធ្វើបាតុកម្មជាថ្មី ។
ការធ្វើទស្សនកិច្ចរបស់លោក សម រង្សុី ដែលមន្ត្រីរដ្ឋាភិបាលចោទថាដើរសម្អុយនៅក្រៅប្រទេសនោះ លោក សម រង្សុី បានអះអាងថា ការស្វែងរកការគាំទ្រពីបណ្តាសហគមន៍អឺរ៉ុប ចាប់ពីថ្ងៃទី២៣ មករា រហូតដល់ថ្ងៃនិវត្តន៍មកកម្ពុជាវិញ សហគមន៍អឺរ៉ុបកំពុងដាក់គំនាបមកលើរដ្ឋាភិបាលកម្ពុជា ។ ទាក់ទងនឹងការលើកឡើងនេះ លោក ផៃ សីុផាន អ្នកនាំពាក្យនៃទីស្តីការគណៈរដ្ឋមន្ត្រី បានប្រាប់កោះសន្តិភាពតាមទូរស័ព្ទនារសៀលថ្ងៃទី១២ កុម្ភៈ ថា ការដើរកៀរគររបស់លោក សម រង្សុី ប្រធានគណបក្សសង្គ្រោះជាតិ គឺជាវោហារស័ព្ទថ្នាក់ដឹកនាំគណបក្សសង្គ្រោះជាតិតែប៉ុណ្ណោះ ក្នុងការបិទបាំងភាពកម្សោយរបស់ខ្លួន ។
លោក ផៃ សីុផាន បន្តថា កិច្ចការទំនាក់ទំនងជាមួយបណ្តាប្រទេសដទៃទៀត ទាំងកិច្ចសហប្រតិបត្តិការរវាងកម្ពុជាជាមួយបណ្តាប្រទេសនានា នៅតែមានសភាពដដែល ជាក់ស្តែងមានការចុះហត្ថលេខារវាងថ្នាក់ដឹកនាំកម្ពុជា ជាមួយប្រទេសនានានៅតែមានជាបន្តបន្ទាប់ ។ ដូច្នេះលទ្ធផលបោះឆ្នោតនៅកម្ពុជាមិនមែនជាលទ្ធភាពរបស់បរទេសក្រៅពីប្រទេសកម្ពុជាទេ។ ការដោះស្រាយវិវាទទាក់ទងនឹងការបោះឆ្នោត គណបក្សសង្គ្រោះជាតិបានសម្រេចធ្វើជាគូប្រជែងក្នុងការបោះឆ្នោតកន្លងមករួចហើយ ដូច្នេះគ្មានទិសដៅណាដើម្បីយកមកដាក់សម្ពាធទាត់ចោល លទ្ធផលនៃការបោះឆ្នោតតាមរយៈគោលការណ៍ច្បាប់ដោះស្រាយវិវាទ រួមទាំងវត្តមានរបស់គណបក្សសង្គ្រោះជាតិតាំងពីការដោះស្រាយវិវាទ ចាប់ពីថ្នាក់ខេត្តរហូតដល់ថ្នាក់កំពូលក្រុមប្រឹក្សាធម្មនុញ្ញនោះទេ ។
លោក ផៃ សីុផាន បន្ថែមថា បញ្ហាអ្វីត្រូវបញ្ចប់ គឺគ្មានការផ្លាស់ប្តូរជាងនេះទៀតទេ ។ ចំពោះការបើកទ្វារចរចារបស់គណបក្ស
សង្គ្រោះជាតិវិញ ត្រូវបានលោក ផៃ សីុផាន ថ្លែងថា ទាំងផ្លូវការ និងមិនផ្លូវការ គណបក្សប្រជាជននៅតែបើកទ្វារចំហជានិច្ចក្នុងការចរចា ។ គណបក្សប្រជាជនកម្ពុជា បានរៀបចំនូវយន្តការរួចទៅហើយ សម្រាប់ការចរចាគ្នាបន្តទៀត គឺបន្តពីអ្វីនៅក្នុងជំនួបថ្នាក់ដឹកនាំកំពូលៗ ដែលមានសម្តេច ហ៊ុន សែន ជាអ្នកដឹកនាំប្រតិភូ និងភាគីគណបក្សសង្គ្រោះជាតិ មានលោក សម រង្សុី ជាអ្នកដឹកនាំ កាលពីថ្ងៃទី១៦-១៧ កញ្ញា ឆ្នាំ២០១៣ នៅវិមានរដ្ឋសភាកន្លងមក ។
ចំណែកលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិមានប្រសាសន៍នៅថ្ងៃទី១១ កុម្ភៈ នោះដែរថា ការធ្វើទស្សនកិច្ចរបស់ថ្នាក់ដឹកនាំគណបក្សសង្គ្រោះជាតិ គឺមានការគាំទ្រពីប្រទេសដែលកាន់លទ្ធិប្រជាធិបតេយ្យ ។ មកដល់ពេលនេះមិនទាន់មានការកំណត់ថ្ងៃជួបចរចាណាមួយនៅឡើយទេ រវាងគណបក្សសង្គ្រោះជាតិជាមួយគណបក្សប្រជាជនកម្ពុជា ។ ភាគីរបស់គណបក្សសង្គ្រោះជាតិ បានតែងតាំងតំណាង១រូប គឺលោក គួយ ប៊ុនរឿន ជាតួអង្គទាក់ទងគ្នា ចំណែកភាគីគណបក្សប្រជាជនកម្ពុជាវិញ បានតែងតាំងតំណាង១រូបដែរ គឺលោក ព្រំ សុខា រដ្ឋលេខាធិការក្រសួងមហាផ្ទៃ។
អ្នកនាំពាក្យរូបនេះបានឱ្យដឹងទៀតថា គណបក្សសង្គ្រោះជាតិ នឹងធ្វើបាតុកម្មជាទ្រង់ទ្រាយធំទៀត គឺមានអ្នកចូលរួមច្រើនជាងលើកមុនទ្វេដង ហើយការធ្វើនេះនៅក្នុងរាជធានីភ្នំពេញ ដើម្បីទាមទាររកយុត្តិធម៌ជូនពលរដ្ឋ និងបោះឆ្នោតឡើងវិញ ។ តាមគេហទំព័រក្នុងស្រុកមួយ បានដកស្រង់សម្តីរបស់មន្ត្រីជាន់ខ្ពស់គណបក្សប្រជាជនកម្ពុជាយា៉ងខ្លីថា គណបក្សប្រជាជនកម្ពុជាស្វាគមន៍ចំពោះការចរចាគ្នារវាងគណបក្សប្រជាជនកម្ពុជាជាមួយគណបក្សសង្គ្រោះជាតិ ដើម្បីបញ្ចប់វិបត្តិនយោបាយនៅកម្ពុជា ។
ទោះបីជាគណបក្សសង្គ្រោះជាតិបានលើកឡើងថា អន្តរជាតិកំពុងតែដាក់គំនាបមកលើរដ្ឋាភិបាលកម្ពុជាក្តី តែកាលពីពេលថ្មីៗនេះសម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា ស្ថាប័នរដ្ឋទាំងអស់ និងសេដ្ឋកិច្ចនៅកម្ពុជាកំពុងតែដំណើរការជាធម្មតា គឺមិនដូចអ្វីដែលបក្សប្រឆាំងបានលើកឡើងឡើយ ៕
ចែករំលែកព័តមាននេះ