ខេត្តកំពត ៖ ឈើប្រភេទសសរជ្រុង គ្រឿងផ្ទះ និងឈើហ៊ុប មិនទាន់ច្នៃចំនួន១០រទេះគោ ដែលក្រុមឈ្មួញរកស៊ីខុសច្បាប់ ជួលប្រជាពលរដ្ឋដឹកចេញពីតំបន់ព្រៃកោះស្លា ត្រូវកម្លាំងជំនាញរដ្ឋបាលព្រៃឈើ ស្រុកឈូក សហការជាមួយកម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត បង្ក្រាបបាន
ខេត្តកំពត ៖ ឈើប្រភេទសសរជ្រុង គ្រឿងផ្ទះ និងឈើហ៊ុប មិនទាន់ច្នៃចំនួន១០រទេះគោ ដែលក្រុមឈ្មួញរកស៊ីខុសច្បាប់ ជួលប្រជាពលរដ្ឋដឹកចេញពីតំបន់ព្រៃកោះស្លា ត្រូវកម្លាំងជំនាញរដ្ឋបាលព្រៃឈើ ស្រុកឈូក សហការជាមួយកម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត បង្ក្រាបបាន រូចនាំមករក្សាទុកនៅខណ្ឌរដ្ឋបាលព្រៃឈើកំពត ដើម្បីកសាងសំណុំរឿងបញ្ជូនទៅតុលាការ កាលពីវេលារសៀលថ្ងៃទី១៣ កុម្ភៈ ២០១៤ ។
មន្ត្រីនគរបាលការិយាល័យប្រឆាំងបទល្មើសសេដ្ឋកិច្ចមួយរូបបានប្រាប់កោះសន្តិភាពឱ្យដឹងថា ជុំវិញករណីបង្កា្របបទល្មើសឈើខុសច្បាប់ខាងលើ បន្ទាប់ពីទទួលការរាយការណ៍ពីកម្លាំងសមត្ថកិច្ចមូលដ្ឋានមកថា មានបទល្មើសឈើខុសច្បាប់ជាច្រើនរទេះ ធ្វើចរាចរតាមផ្លូវតាកែនកោះស្លា ឆ្ពោះមកកាន់ទីរួមស្រុកឈូក ។ ក្រោយពីទទួលបានព័ត៌មានខាងលើ នាយការិយាល័យប្រឆាំងបទល្មើសក៏ចេញបញ្ជាឱ្យកម្លាំងមន្ត្រីនគរបាលក្នុងការិយាល័យ ចុះទៅសហការជាមួយសមត្ថកិច្ចជំនាញ ក៏បានប្រទះឃើញដូចការផ្តល់ព័ត៌មានមែន ។
លោកបន្តថា នៅពេលកម្លាំងសមត្ថកិច្ចចាប់ផ្តើមឃាត់រទេះសួរនាំ ក្រុមប្រជាពលរដ្ឋដែលដឹកឈើខុសច្បាប់ឱ្យឈ្មួញនោះ បានគំរាមតបសមត្ថកិច្ចវិញយ៉ាងចាស់ដៃ ដោយកាន់កាំបិត ពូថៅ គំរាមមិនឱ្យសមត្ថកិច្ចចូលជិតឈើរបស់ខ្លួន ។ ពេលនោះសមត្ថកិច្ចដែលកំពុងនៅកន្លែងបង្ក្រាប បានស្នើសុំកម្លាំងនគរបាលអន្តរាគមន៍របស់ស្នងការដ្ឋានខេត្តទៅជួយ ទើបពួកគេដកខ្លួនថយ គេចខ្លួនបាត់ ៕
ចែករំលែកព័តមាននេះ