រឿងអាស្រូវចៅអធិការ…ស្រីស្នេហ៍ប្រកាសថា ឈឺចាប់ពេលប្រុសដោះដៃ
- ភ្នំពេញ
រាជធានីភ្នំពេញ ៖ រឿងរ៉ាវភិក្ខុនាម វ៉ាន វន្នី ដែលជាចៅអធិការវត្តពោធិ៍សត្ថារាម ហៅ វត្តពោធិ៍ចិនតុង ដែលបានបែកធ្លាយពាងប្រហុកឬ «ល្បែងលើគ្រែ»…
រាជធានីភ្នំពេញ ៖ រឿងរ៉ាវភិក្ខុនាម វ៉ាន វន្នី ដែលជាចៅអធិការវត្តពោធិ៍សត្ថារាម ហៅ វត្តពោធិ៍ចិនតុង ដែលបានបែកធ្លាយពាងប្រហុកឬ «ល្បែងលើគ្រែ» ដ៏អាស្រូវជាមួយស្រីស្នេហ៍ជាច្រើនសន្លឹក បណ្ដាលឲ្យកក្រើកនៅក្នុងបណ្ដាញសង្គមហ្វេសប៊ុក កាលពីអំឡុងខែមិថុនាកន្លងទៅនោះ បានស្ងប់ស្ងាត់មួយរយៈពេលខ្លីមកហើយ ។
គ្រប់គ្នានៅចាំកាលពីជាង១ខែមុន ដែលចៅអធិការប្រកែកថា មិនមែនជារូបពិតទេ ដែលបានផ្សព្វផ្សាយតាមហ្វេសប៊ុកនោះ ។ ចំណែកខាងស្ត្រីម្ចាស់រូបឈ្មោះ លឹម ធីតា ក៏បានបដិសេធថា ខ្លួនមិនដែលបានស្គាល់ចៅអធិការរូបនេះដែរ ហើយខាងមន្ត្រីសង្ឃនៅសាលាអនុគណខណ្ឌពោធិ៍សែនជ័យ រួមជាមួយមន្ត្រីមន្ទីរ និងការិយាល័យធម្មការនិងសាសនា រកឃើញថា រូបភាពដែលបែកធ្លាយទាំងប៉ុន្មាន គឺជារូបកាត់ត ដោយជនខិលខូចមានបំណងអាក្រក់មកលើចៅអធិការអង្គនោះ ។
ទោះបីជាមានការស្ងប់ស្ងាត់ ប៉ុន្តែមជ្ឈដ្ឋាននានានៅតែមិនអស់ចិត្តចំពោះរឿងនេះនៅឡើយ ព្រោះមិនជឿថាជារូបកាត់តទេ កុំភូតលើគោកអីចឹង ។ ចំណែកផ្ទៃក្នុងវត្តខាងលើក៏មិនបានស្ងប់ស្ងាត់ឡើយ ក្រោយពីបែកធ្លាយរឿងអាស្រូវផ្លូវភេទបាន១សប្តាហ៍ប៉ុណ្ណោះចៅអធិការអង្គនោះ បានដាក់លិខិតមួយច្បាប់ ចូលទៅកាន់សាលាអនុគណខណ្ឌពោធិ៍សែនជ័យ សុំលាលែងពីតំណែងចៅអធិការវត្ត បន្ទាប់មកក៏បានសឹកចាកសិក្ខាបទបាត់ទៅ ។ យោងតាមលិខិតស្នើសុំរបស់គ្រូសូត្រស្ដាំ និងឆ្វេង ព្រមទាំងគណៈកម្មការអាចារ្យវត្តនោះ សាលាអនុគណខណ្ឌក៏បានតែងតាំងចៅអធិការវត្តស្ដីទីរួចរាល់ហើយដែរ នាមព្រះភិក្ខុ ឆាន ឆន ។
រហូតមកដល់ថ្ងៃទី៥ សីហា ស្រាប់តែរឿងរ៉ាវខាងលើបានចាប់ផ្ដើមកក្រើកឡើងវិញ បន្ទាប់ពីមានអាខោនហ្វេសប៊ុកមួយឈ្មោះ «Jou Mary» ដែលសង្ស័យថាជារបស់ស្ត្រីឈ្មោះ លឹម ធីតា ដែលបែកធ្លាយរូបដេកកៀកកើយជាមួយអតីតចៅអធិការនៅលើគ្រែនោះ បានបង្ហោះរូបភាពអតីតចៅអធិការខាងលើស្លៀកស្បង់ និងពាក់អាវផាមួងពណ៌ទឹកមាស រួមជាមួយរូបភាពអាវយឺត និងរូបលោក វ៉ាន វន្នី នោះក្រោយសឹកចាកសិក្ខាបទអង្គុយលើបង់ផងដែរ ។ ស្ត្រីជាម្ចាស់អាខោនហ្វេសប៊ុកខាងលើ បានបង្ហោះសាររៀបរាប់ពីការឈឺចាប់ពេលប្រុសថ្លៃបោះបង់នាងចោល ព្រោះតែខាងប្រុសជឿតាមការបំបែកបំបាក់របស់គ្រួសារ ។
ការបង្ហោះហ្វេសប៊ុករបស់ស្ត្រីរូបនេះបានបង្ហាញច្បាស់ហើយថា មុននេះមានការបដិសេធទាំងបំពាន ដើម្បីបំភាន់រឿងអាស្រូវរបស់ខ្លួនចំពោះមុខមហាជន ។ លុះដល់ប្រុសថ្លៃ «អន្ទិតអតីតចៅអធិការ» ដោះដៃចោលបាត់មិនស្រណោះគ្រែក៏ទម្លាយការពិតអស់គ្មានសល់ មិនខុសពីបទចម្រៀងដែលមានទំនុកថា «សាឡនៗអើយ កុំស្រឡាញ់លោក កំលោះគគោក ទុកលោកធ្វើបុណ្យ» ។
ខ្លឹមសារដែលស្ត្រីឈ្មោះ លឹម ធីតា សរសេររៀបរាប់ថា «អូនជាអ្នកទិញអាវឱ្យបង បងថាស្រឡាញ់អាវ និងឆាតឱ្យអូនទិញឱ្យទុកពាក់ពេលបងសឹកទៅ តែឥឡូវម្តេចក៏បងធ្វើដាក់អូនអុីចឹង ! អូនលែងមានន័យសម្រាប់បងហើយមែនបង ? អរគុណគ្រប់យ៉ាងសម្រាប់ការបោកប្រាស់ អរគុណព្រហ្មលិខិតដែលធ្វើបាបខ្ញុំកម្សត់កម្រជាមួយគ្នាជិតមួយឆ្នាំ មានទាំងផ្អែមបានទាំងជូរចត់ ដោះស្រាយបង្ហាញជាមួយគ្នា ពេលចប់រឿងបានសឹក បងបោះបង់អូនចោល ព្រោះជឿគ្រួសារបង អរគុណមេរៀនជីវិត» ។
កាលពីថ្ងៃទី១៧ កក្កដា ឆ្នាំ២០១៩ អាខោនហ្វេសប៊ុកឈ្មោះ«Jou Mary» នេះក៏បានបង្ហោះសារដ៏ឈឺចាប់មួយដោយភ្ជាប់ជាមួយនិងរូបភាពទារកដែលទើបពន្លូតចោល ព្រមទាំងដៃដាក់សេរ៉ូមនិងនំខួបកំណើតផងដែរ បានធ្វើឲ្យមជ្ឈដ្ឋានទូទៅសង្ស័យថា ទារកនោះជាកូនរបស់ម្ចាស់អាខោនហ្វេសប៊ុកនេះ ផ្ទាល់ជាមួយនឹងអតីតចៅអធិការរូបនោះទៀតផង ហើយបើតាមការពិនិត្យមើលឃើញថា សារនោះបានបង្ហោះក្រោយពេលដែលនាងបានជួបក្រុមគ្រួសារខាងប្រុស តែគេមិនស្វាគមន៍ ។ ចំណែកប្រុសស្នេហ៍រូបនោះក៏មិនព្រមចេញមកជួបនាងថែមទៀត ឱ ! ព្រហ្មលិខិតអើយ…។
សារនោះមានខ្លឹមសារថា «ថ្ងៃនេះហើយបានដឹងការពិតហើយជាថ្ងៃដែលឈឺបំផុតសម្រាប់ខ្ញុំ ពេលបានជួបគ្រួសារបងផ្ទាល់ គ្រួសារបងមិនស្វាគមន៍ខ្ញុំ បងមិនចេញមកជួបខ្ញុំ អ្នកស្គាល់បង មិត្ដភក្ដិបងគេសុទ្ធតែ
ដឹងថា យើងស្រឡាញ់គ្នា មានតែបងនឹងគ្រួសារបងទេថា មិនធ្លាប់ស្គាល់ខ្ញុំ ខ្ញុំនៅចាំបានទាំងអស់រឿងសប្បាយនឹងជូរចត់ ខួបកំណើតខ្ញុំបងជាអ្នកធ្វើឱ្យ ខួបកំណើតបង ខ្ញុំជាអ្នកធ្វើឱ្យបង ថ្ងៃដែលអូនចេញពីពេទ្យវិញជាថ្ងៃអូនឈឺចាប់បំផុត បងជាអ្នកមើលថែខ្ញុំ បងថា បងសុំទោសដែលបងឈឺជំនួសខ្ញុំមិនបាន បងសន្យាថានឹងមិនចោលខ្ញុំគ្រប់ពេល ព្រោះយើងធ្លាប់កម្សត់កម្រនឹងគ្នា បងតែងតែប្រាប់ខ្ញុំថា នឹងសាងគ្រួសាររួមគ្នា យើងនឹងមានបុត្រជាមួយគ្នាម្ដងទៀត មិនដូចលើកនេះឡើយ ថ្ងៃដ៏សែនចងចាំបំផុតនៅពេលមួយបងបានអះអាងថា បងនឹងមិនចោលខ្ញុំនៅមុខគេគ្រប់គ្នា តែនៅថ្ងៃនេះបងបានបោះបង់ខ្ញុំចោល ពិតមែនហើយបងស្បថបំពានខ្លួនឯង (១៧ កក្កដា ២០១៩) ចាំលុះថ្ងៃស្លាប់» ។
ទីបំផុតរឿងរ៉ាវខាងលើបានបញ្ជាក់ឲ្យឃើញកាន់តែច្បាស់ថា ក្រដាសមិនអាចខ្ចប់ភ្លើង ឬដំរីស្លាប់មិនអាចយកចង្អេរបិទបាំងជិតឡើយ ហើយរូបភាពល្បែងលើគ្រែដ៏ត្រេកត្រអាលរវាងអតីតចៅអធិការវត្តខាងលើជាមួយស្រីស្នេហ៍ដែលបានបែកធ្លាយកាលពីអំឡុងខែមិថុនា ឆ្នាំ២០១៩កន្លងមកនេះ គឺជារូបភាពពិតមិនមែនក្លែងក្លាយកាត់តឡើយ ព្រោះកាលណោះខាងស្រី បានប្រកែកថាមិនធ្លាប់ដែលស្គាល់ចៅអធិការ ប៉ុន្តែពេលនេះ បែរជាចេញសារសម្ដែងការឈឺចាប់ ពេលដែលអតីតចៅអធិការបោកប្រាស់ស្នេហ៍បែបនេះទៅវិញ ។
ព្រះភិក្ខុកល្យាណធម្មោ ធី ឃឿន លេខាធិការដ្ឋានសាលាអនុគណខណ្ឌពោធិ៍សែនជ័យ បានមានសង្ឃដីកាថា ក្រោយពីរឿងនេះកើតឡើងអតីតចៅអធិការអង្គនោះបានដាក់លិខិតមួយច្បាប់លេខ០១២/១៩ ល.ស.វ.ព.ស.រ ចុះថ្ងៃទី១ ខែកក្កដា ឆ្នាំ២០១៩ ចូលទៅកាន់សាលាអនុគណខណ្ឌពោធិ៍សែនជ័យ សុំលាលែងពីតំណែងចៅអធិការវត្ត និងយោងលើលិខិតស្នើសុំរបស់ព្រះគ្រូសូត្រស្ដាំ និងឆ្វេង ព្រមទាំងគណៈកម្មការអាចារ្យវត្តនោះ សាលាអនុគណខណ្ឌក៏បានតែងតាំងព្រះចៅអធិការវត្តស្ដីទីរួចរាល់ហើយដែរ កាលពីថ្ងៃទី៨ ខែកក្កដា ឆ្នាំ២០១៩កន្លងទៅនេះ ។ ម្យ៉ាងរឿងរ៉ាវនេះបានកើតឡើងនៅចំពេលដែលព្រះអនុគណជាប់រវល់នៅឯសហរដ្ឋអាមេរិកឯណោះ ហើយព្រះអង្គបានធ្វើប្រតិភូកម្មអំណាចប្រគេនទៅព្រះវិន័យធម៌ ហើយព្រះវិន័យធម៌បានធ្វើរឿងនេះចប់សព្វគ្រប់រួចរាល់អស់ហើយដែរ ។
គួរបញ្ជាក់ផងដែរថា នាង លឹម ធីតា បានបង្ហោះសារបដិសេធមួយនៅក្នុងអាខោនហ្វេសប៊ុកឈ្មោះ«Jou Mary» នេះកាលពីបែកធ្លាយរឿងអាស្រូវផ្លូវភេទថ្មីៗនោះ ដែលមានខ្លឹមសារថា «ពេលឃើញរូបភាពនេះលេចឡើង នាងខ្ញុំពិតជាតក់ស្លុតយ៉ាងខ្លាំង ដែលរូបនេះនាងខ្ញុំមិនដែលបានស្គាល់លោកអង្គនោះ និងមិនដែលប្រព្រឹត្តដូចរូបថតទាំងនោះឡើយ ។ នាងខ្ញុំសូមបដិសេធទាំងស្រុង ចំពោះរូបភាពទាំងនេះព្រោះមានជន ឬក្រុមណាមួយក្នុងគោលបំណងបរិហារកេរ្តិ៍បង្ខូចកិត្តិយសនាងខ្ញុំនិងក្រុមគ្រួសារ ។ សូមបណ្ដាញសារព័ត៌មាន និងផេកទាំងឡាយ បញ្ឈប់ការចែកចាយរូបមិនពិតទាំងនេះ ព្រោះជារូបកាត់តប៉ុណ្ណោះ ហើយនាងខ្ញុំមិនទទួលខុសត្រូវចំពោះរូបភាពទាំងអស់នេះឡើយ» ៕ (សម្រួលដោយ៖ ស្រីណា)
ចែករំលែកព័តមាននេះ