ខេត្តកំពង់ចាម ៖ ជំងឺគ្រុនផ្តាសាយបក្សីធ្លាប់ផ្ទុះឡើងនៅក្នុងតំបន់ត្រើយខាងកើត និងត្រើយខាងលិចទន្លេមេគង្គ ក្នុងនោះមានដូចជា ស្រុកពញាក្រែក ក្រុងសួង ស្រុកស្ទឹងត្រង់ ស្រុកកំពង់សៀម ដោយបានសម្លា.ប់មនុស្សចំនួន៥នាក់មកហើយ ។
ខេត្តកំពង់ចាម ៖ ជំងឺគ្រុនផ្តាសាយបក្សីធ្លាប់ផ្ទុះឡើងនៅក្នុងតំបន់ត្រើយខាងកើត និងត្រើយខាងលិចទន្លេមេគង្គ ក្នុងនោះមានដូចជា ស្រុកពញាក្រែក ក្រុងសួង ស្រុកស្ទឹងត្រង់ ស្រុកកំពង់សៀម ដោយបានសម្លាប់មនុស្សចំនួន៥នាក់មកហើយ ។ លុះចុងក្រោយនេះបានផ្ទុះឡើងនៅស្រុកបាធាយលើហ្វូងសត្វទារាប់ពាន់ក្បាលរបស់កសិករ ហើយមន្ត្រីជំនាញបានបើកយុទ្ធនាការចុះបាញ់ថ្នាំ និងចាប់ដុតកម្ទេចចោលដើម្បីទប់ស្កាត់កុំឱ្យមានការឆ្លងរីករាលដាលមកលើមនុស្ស ។
លោកនង ម៉េងហ៊ាង ប្រធានការិយាល័យផលិតកម្ម និងបសុព្យាបាលខេត្ត បានប្រាប់ឱ្យដឹងនៅរសៀលថ្ងៃទី១៣ កុម្ភៈថា ដោយមានការណែនាំពីលោកគឹម សាវឿន ប្រធានមន្ទីរកសិកម្មខេត្ត បានចាត់ឱ្យកម្លាំងបសុព្យាបាលយកចិត្តទុកដាក់តាមដានមើលពីការផ្ទុះនូវជំងឺផ្តាសាយបក្សី (H5N1) ដែលរយៈពេលកន្លងមកមានសភាពស្ងប់ស្ងាត់មិនមានការផ្ទុះឡើងនៅតំបន់ណាមួយនោះទេ ដោយសារតែយុទ្ធនាការចុះបាញ់ថ្នាំ និងការផ្សព្វផ្សាយដល់ប្រជាពលរដ្ឋរស់នៅត្រូវប្រុង ប្រយ័ត្ន មិនត្រូវប៉ះពាល់មាន់ទាដែលឈឺ ឬងាប់យកទៅហូបឡើយ ត្រូវជីកដីកប់ចោល ។ លោកនង ម៉េងហ៊ាង បន្តថា កាលពីថ្ងៃទី១១ កុម្ភៈ នៅភូមិស្វាយព្រៃ ឃុំសណ្តែក ស្រុក បាធាយ រូបលោកនិងសហការីបានចុះយុទ្ធនា ការបាញ់ថ្នាំសម្លាប់មេរោគដល់កសិករចំនួន១៩គ្រួសារដែលចិញ្ចឹមទាចំនួន២១.២៥០ក្បាល ។ ក្នុងនោះមាន២គ្រួសារគឺ ១-ឈ្មោះ ញឹប ស្រ៊ន់ ចិញ្ចឹមទាចំនួន២.៧៥០ក្បាល កាលពីចន្លោះថ្ងៃទី៤ ដល់ថ្ងៃទី៧ កុម្ភៈ បានឈឺងាប់ចំនួន១៩២ក្បាល ត្រូវមន្ត្រីជំនាញយក៥ក្បាលទៅធ្វើរោគវិនិច្ឆ័យ ហើយរហូតមកដល់ថ្ងៃទី៨-១១ កុម្ភៈ ២០១៤ ទាបានឈឺងាប់កើនដល់ចំនួន១.៨៥០ក្បាល ចំណែកទានៅសល់ត្រូវសម្លាប់ដុតកប់ចោលនៅកន្លែងទួលសុវត្ថិភាព ។ សម្រាប់គ្រួសារទី២-ឈ្មោះ ខុន ញ៉ ចិញ្ចឹមទាចំនួន២.៥០០ក្បាល កាលពីថ្ងៃទី៤-៧ កុម្ភៈ ២០១៤ បានឈឺងាប់អស់ចំនួន២.៣០០ក្បាល ក្នុងនោះយក៥ក្បាលទៅធ្វើរោគវិនិច្ឆ័យ រហូតមកដល់ថ្ងៃទី៨-១១ កុម្ភៈ ទាបានងាប់ចំនួន១២៤ក្បាលថែមទៀត ចំណែកទារស់ដែលនៅសល់ត្រូវបានសម្លាប់ដុតកប់ចោលដែរ ។
លោកប្រធានការិយាល័យផលិតកម្ម និងបសុព្យាបាលខេត្តបញ្ជាក់ថា ថ្វីដ្បិតមេរោគផ្តាសាយបក្សីឆ្លងមកលើពពួកសត្វទាបណ្តាលឱ្យងាប់រាប់ពាន់ក្បាល តែតាមរយៈការបូមឈាមអ្នកចិញ្ចឹមទាយកទៅពិនិត្យ មិនឃើញមានមេរោគនេះទេ ។ ជាមួយគ្នានោះដែរ ក្រុមការងារបានបាញ់ថ្នាំសម្លាប់មេរោគនៅកន្លែងកើតហេតុ និងបរិវេណជុំវិញរបស់ម្ចាស់ទាខាងលើ បោសសម្អាតអនាម័យក្នុងភូមិឋាន បិទរូបភាព និងចែកខិត្តប័ណ្ណស្តីពីហានិភ័យនៃជំងឺផ្តាសាយបក្សីផងដែរ ។ កាលពីថ្ងៃទី៤ កុម្ភៈ ក្រសួងសុខាភិបាលបានប្រកាសពីករណីផ្តាសាយបក្សីចំនួន១ករណីថ្មីដែលត្រូវបានអះអាងបញ្ជាក់ថា វិជ្ជមានវីរុសផ្តាយសាយបក្សី H5N1 នេះជាករណីទី១ ក្នុងឆ្នាំនេះ និងជាករណីទី៤៨ ដែលឆ្លងវីរុសផ្តាសាយបក្សី H5N1 នៅក្នុងប្រទេសកម្ពុជា ។ នៅថ្ងៃទី១២ កុុម្ភៈ ក្រសួងសុខាភិបាលក៏បានប្រកាសពីផ្តាសាយបក្សីចំនួន១ករណីថ្មីទៀតត្រូវបានអះអាងបញ្ជាក់ថា វិជ្ជមានវីរុសផ្តាសាយបក្សី H5N1 ។ នេះជាករណីទី២ ក្នុងឆ្នាំនេះ និងជាករណីទី៤៩ ដែលឆ្លងវីរុសផ្តាសាយបក្សី H5N1។ ករណីនេះមកពីខេត្តក្រចេះ និងបានស្លាប់នៅថ្ងៃទី៧ កុម្ភៈ ។ ៣៧ករណីក្នុងចំណោមករណីផ្តាសាយបក្សីទាំង៤៩ ដែលកើតមានឡើងនៅព្រះរាជាណាចក្រកម្ពុជា កើតលើកុមារអាយុក្រោម១៤ឆ្នាំ និង២៧ករណីក្នុងចំណោមករណីផ្តាសាយបក្សីទាំង៤៩ ជានារី ។ ជាបន្ថែមមានតែ១៥ករណីមានជីវិតចាប់តាំងពីមានជំងឺផ្តាសាយបក្សីលើកដំបូងនៅព្រះរាជាណាចក្រកម្ពុជាក្នុងឆ្នាំ២០០៥ ។
ករណីទី២ នេះកើតលើកុមារាម្នាក់អាយុ៨ឆ្នាំ ដែលមានទីលំនៅក្នុងភូមិក្បាលត្រាច ឃុំស្រែចា ស្រុកស្នួល ខេត្តក្រចេះ ត្រូវបានបញ្ជាក់ដោយវិទ្យាស្ថានប៉ាស្ទ័រកម្ពុជា នៅថ្ងៃទី៨ កុម្ភៈ ២០១៤ ថា មានជំងឺផ្តាសាយបក្សី H5N1 ។ កុមារានេះចាប់ផ្តើមមានគ្រុនក្តៅ ហៀរសំបោរ និងឈឺបំពង់ក នៅថ្ងៃទី៣១ មករា ២០១៤ ហើយឪពុកម្តាយស្វែងរកការព្យាបាលនៅគ្លីនិកឯកជនក្នុងភូមិ ។ ដោយសារស្ថានភាពសុខភាពរបស់កុមារាកាន់តែធ្ងន់ធ្ងរ កុមារានេះត្រូវបានដាក់ឱ្យសម្រាកនៅមន្ទីរពេទ្យបង្អែកមេមត់នៅថ្ងៃទី៦ កុម្ភៈ ២០១៤។ ដោយនៅថ្ងៃទី៧ កុម្ភៈ កុមារាមានគ្រុនក្តៅ ឈឺបំពង់ក ក្អក ឈឺពោះ ពិបាកដកដង្ហើម និងសង្ឃឹមត្រូវបានបញ្ជូនមកមន្ទីរពេទ្យខេត្តកំពង់ចាម ប្រហែលនៅវេលាម៉ោង១ទៀបភ្លឺ កុមារនោះក៏ត្រូវដាក់ឱ្យសម្រាកនៅមន្ទីរពេទ្យ និងទទួលការព្យាបាលដោយឱសថ Tamiflu នៅថ្ងៃទី៧ កុម្ភៈ។ ទោះជាមានការយកចិត្តទុកដាក់ពីសំណាក់ក្រុមគ្រូពេទ្យ កុមារនោះបានស្លាប់នៅថ្ងៃទី៧ កុម្ភៈ វេលាម៉ោង៦ល្ងាច ។
ជំងឺផ្តាសាយបក្សី H5N1 គឺជាជំងឺផ្តាសាយមួយ ដែលជាធម្មតាចម្លងរវាងសត្វបក្សីឈឺទៅបក្សីផ្សេងទៀត ប៉ុន្តែជួនកាលវាអាចចម្លងពីបក្សីទៅមនុស្ស ។ ជំងឺផ្តាសាយបក្សីលើមនុស្សជាជំងឺធ្ងន់ធ្ងរ ដែលតម្រូវឱ្យមានការធ្វើការព្យាបាលនៅមន្ទីរពេទ្យ ។ ទោះបីជាវាមិនងាយឆ្លងពីមនុស្សម្នាក់ទៅមនុស្សម្នាក់ទៀត ប៉ុន្តែបើវាផ្លាស់ប្តូរវានឹងអាចរាលដាលដូចនឹងជំងឺផ្តាសាយតាមរដូវកាលដែរ ។ ដូច្នេះការរកឃើញករណីទាន់ពេលវេលាមានសារសំខាន់បំផុត ៕
ចែករំលែកព័តមាននេះ