ខេត្តកំពង់ធំ ៖ នៅសាលប្រជុំគណៈស្នងការដ្ឋាននគរបាលខេត្តកំពង់ធំ កាលពីរសៀលថ្ងៃទី១៣ កុម្ភៈ ២០១៤ មានរៀបចំកិច្ចប្រជុំត្រួតពិនិត្យជំរុញការចុះបញ្ជីគ្រប់គ្រងស្ថិតិពលរដ្ឋ ការផ្តល់អត្តសញ្ញាណបណ្ណសញ្ជាតិខ្មែរ និងពិធីប្រគល់ម៉ាស៊ីនភ្លើងដល់អធិការដ្ឋានក្រុង-ស្រុកទាំង៨ ទូទាំងខេត្ត ក្រោមអធិបតីភាព ឯកឧត្តម ឧត្តមសេនីយ៍ត្រី ផាន់ សុផេង ទីប្រឹក្សា ឯកឧត្តម បណ្ឌិត ងួន ញ៉ិល អនុប្រធានទី១ រដ្ឋសភា និងជាស្នងការ នៃស្នងការដ្ឋាននគរបាលខេត្តកំពង់ធំ ដោយមានចូលរួមពីមន្ទ្រីនគរបាលជាច្រើននាក់។
លោកវរសេនីយ៍ទោ យឿន សេរីវុទឌ្ឍី នាយការិយាល័យស្ថិតិ និងអត្តសញ្ញាណបណ្ណ បានឡើងអានរបាយការណ៍បូកសរុបលទ្ធផលការងារផ្តល់អត្តសញ្ញាណបណ្ណសញ្ជាតិខ្មែរ ពង្រឹងការចុះបញ្ជីគ្រប់គ្រងស្ថិតិពលរដ្ឋ ជំរុញណែនាំការងារជំនាញបច្ចេកទេស និងការថែរក្សាឧបករណ៍សម្ភារ ការងារអត្តសញ្ញាណបណ្ណ ការិយាល័យជំនាញ សូមសំណូមពរដល់លោកអធិការ អធិការរងគ្រប់ក្រុង-ស្រុក។
ទី១. ធ្វើយ៉ាងណាជំរុញការងារចុះបញ្ជីគ្រប់គ្រងស្ថិតិពលរដ្ឋ ត្រូវត្រួតពិនិត្យធ្វើរបាយការណ៍រៀងរាល់ខែនិមួយៗ ឲ្យបានត្រឹមត្រូវ ប្រគល់មកការិយាល័យជំនាញ ទី២. ការផ្តល់សៀវភៅស្នាក់នៅ និងសៀវភៅគ្រួសារ ស្នងការដ្ឋាននគរបាលខេត្ត បានធ្វើសេចក្តីជម្រាបលេខ១២២៤ ស.ជ.រ ចុះថ្ងៃទី១៩ តុលា ២០១២ ស្តីពីផ្តល់សៀវភៅស្នាក់នៅ និងសៀវភៅគ្រួសារ គឺមិនត្រូវយកកម្រៃពីប្រជាពលរដ្ឋនោះឡើយ
និងទី៣. ការផ្តល់អត្តសញ្ញាណបណ្ណសញ្ជាតិខ្មែរ មិនទាន់បានត្រឹមត្រូវ និងសុក្រិត្យ សូមឲ្យលោកអធិការ អធិការរង ពង្រឹងណែនាំដល់នាយប៉ុស្តិ៍នគរបាលរដ្ឋបាល ការចុះបញ្ជីស្នាក់នៅ ការស្រង់ចំនួនប្រជាពលរដ្ឋ ដែលមានអាយុចាប់ពី ១៥ឆ្នាំ ឡើងទៅ ត្រូវផ្តល់អត្តសញ្ញាណបណ្ណសញ្ជាតិខ្មែរ (សម្រង់៣០) ឲ្យបានច្បាស់លាស់ ត្រឹមត្រូវ។
ឯកឧត្តម ឧត្តមសេនីយ៍ត្រី ផាន់ សុផេង បានអញ្ជើញមានប្រសាសន៍ថា ចំពោះសេវាផ្តល់សៀវភៅស្នាក់នៅ សៀវភៅគ្រួសារ និងអត្តសញ្ញាណបណ្ណសញ្ជាតិខ្មែរ រួមទាំងសេវាផ្សេងៗទៀត ហាមដាច់ខាតទារលុយពីប្រជាពលរដ្ឋ លើកលែងតែគាត់ឲ្យដោយសុច្ចចិត្ត ឲ្យប៉ុន្មានយកប៉ុណ្ណឹង។
ចំពោះមន្ត្រីនគរបាលចុះបញ្ជីគ្រប់គ្រងស្ថិតិពលរដ្ឋ ត្រូវមានការប្រុងប្រយ័ត្នខ្ពស់បំផុតចំពោះឈ្មោះ នាមត្រកូល និងភេទប្រុស-ស្រី បើបុគ្គលណាម្នាក់ប្រព្រឹត្តខុសជំរិតទារប្រាក់ពីប្រជាពលរដ្ឋ ហើយពួកគាត់ប្តឹង នឹងត្រូវមានទោសតាមច្បាប់ ត្រូវអនុវត្តឲ្យបានល្អនូវគោលនយោបាយភូមិ-ឃុំមានសុវត្ថិភាពទាំង ៩ចំណុច ដែលថ្នាក់លើដាក់ជូនឲ្យបានល្អប្រសើរបំផុត។
ជាចុងក្រោយ ឯកឧត្តមស្នងការបានប្រគល់ម៉ាស៊ីនភ្លើងដល់លោកអធិការក្នុង ១ស្រុក-ក្រុង ទទួលបានម៉ាស៊ីនភ្លើង ២គ្រឿង៕
ចែករំលែកព័តមាននេះ