ខេត្តកំពង់ឆ្នាំង ៖ អ្នកយកព័ត៌មានឱ្យកាសែត និងទូរទស្សន៍ចំនួន៣នាក់ ត្រូវបានស្នងការដ្ឋាននគរបាលខេត្ត កោះហៅឱ្យចូលខ្លួនទៅបំភ្លឺនៅថ្ងៃទី១៧ កុម្ភៈ តាមដីកាបង្គាប់ឱ្យសាកសួរលេខ៨៥/០១៤ ចុះថ្ងៃទី១១ កុម្ភៈ របស់ព្រះរាជអាជ្ញាអមសាលាដំបូងខេត្ត តាមបណ្តឹងរបស់លោក លឹម ហាក់ មន្ត្រីកងរាជអាវុធហត្ថខេត្តប្តឹងជនមិនស្គាល់មុខពីបទបង្កាច់បង្ខូចកេរ្តិ៍តាមទូរទស្សន៍ និងសារព័ត៌មាន ។
តាមបណ្តឹងរបស់លោកលឹម ហាក់ មន្ត្រីកងរាជអាវុធហត្ថគឺប្តឹងរកប្រភពពីសមត្ថកិច្ចណាដែលផ្តល់ព័ត៌មានមួលបង្កាច់រូបលោកដែលចោទថា រូបលោកបានស្ថិតក្នុងការរំដោះយករថយន្តដឹកឈើ កាលពីយប់ថ្ងៃទី២ ខែមករា ឆ្នាំ២០១៤ ។ អ្នកសារព័ត៌មានដែលត្រូវលោក លឹម ហាក់ ប្តឹងចំនួន៣នាក់ មានលោក ពៅ សុខហ៊ាន អ្នកសារព័ត៌មានកោះសន្តិភាព លោក ឈៀង ថារិទ្ធ ទូរទស្សន៍ហង្សមាស លោកយឹម សុក្ខារិន ទូរទស្សន៍អប្សរាណេត ។ គួររំលឹកថា កាលពីវេលាម៉ោង១០និង១០នាទីយប់ថ្ងៃទី២ ខែមករា ឆ្នាំ២០១៤ នៅចំណុចត្នោត១ដើមស្ថិតក្នុងភូមិត្រពាំងផ្គាំ ឃុំបន្ទាយព្រាល ស្រុករលាប្អៀរ មានមន្ត្រីទំនើង១ក្រុម និងបក្ខពួកជិះរថយន្ត៦គ្រឿងមកស្ទាក់ព័ទ្ធរំដោះយកជនល្មើស២នាក់ និងរថយន្តតាកូម៉ាពាក់ស្លាកលេខកណ្តាល 2A-6191 ដែលដឹកឈើប្រភេទលេខ១ធំៗ៤ដុំ របស់បក្សពួកខ្លួន ពីសមត្ថកិច្ចចម្រុះបានដោយសុវត្ថិភាព ។ ប៉ុន្តែឈើទាំង៤ដុំត្រូវបានគេទម្លាក់ចោលនៅកន្លែងកើតហេតុដោយរំដោះយកតែរថយន្ត ។
នៅក្នុងហេតុការណ៍នេះសមត្ថកិច្ចចម្រុះបានឱ្យអ្នកយកព័ត៌មានដឹងពីសមាសភាពអ្នកមករំដោះឈើ ហើយអ្នកសារព័ត៌មាន និងទូរទស្សន៍បានសរសេរទៅតាមវិជ្ជាជីវៈរបស់ខ្លួន ។ ស្រាប់តែពេលក្រោយមក លោកលឹម ហាក់ បានប្រតិកម្មថា លោកមិនបាននៅកន្លែងកើតហេតុនោះទេ ទើបលោកប្តឹងរកអ្នកផ្តល់ព័ត៌ដោយឱ្យអ្នកសារព័ត៌មានទាំងនោះទៅបំភ្លឺនិងទាមទារជំងឺចិត្តម្នាក់ចំនួន១០លានរៀលនិងផ្តន្ទាទោសតាមផ្លូវច្បាប់ ។ សម្រាប់ចំណុចនេះកោះសន្តិភាពសូមបញ្ជាក់ថា ក្នុងច្បាប់ចេញផ្សាយលេខ៨០៦៩ចុះថ្ងៃទី៤-៥ ខែមករាឆ្នាំ២០១៤ ក្នុងទំព័រទី១ មានចំណងជើងថា ៈ«មន្ត្រីខិលខូចមួយក្រុមមកស្ទាក់រំដោះ…»ក្នុងខ្លឹមសារមិនបានសរសេរចំឈ្មោះលោកណាម្នាក់ទេ គ្រាន់តែដាក់ថាមន្ត្រីទំនើង ។ក្រោយមកទៀតដោយដឹងថា មានប្រតិកម្មពីលោកលឹម ហាក់ មន្ត្រីកងរាជអាវុធហត្ថខេត្ត កោះសន្តិភាពបានផ្សាយឡើងវិញមួយលេខទៀត ក្នុងច្បាប់ចេញផ្សាយលេខ៨០៧១ ចុះថ្ងៃទី៧ ខែមករា ឆ្នាំ២០១៤ ទំព័រទី១មានចំណងជើងថា«ជុំវិញការចាប់រថយន្តដឹកឈើ ក្រុមមន្ត្រីបានសាចទឹកដាក់គ្នា…» ដែលក្នុងខ្លឹមសារបានសរសេរថា សមត្ថកិច្ចទាំងនោះមិនបានស្ថិតនៅកន្លែងកើតហេតុទេ អ្នកមករំដោះឈើគឺជាប្រជាពលរដ្ឋ ។
ចំណុចទាំង២ខាងលើនេះគួរតែមិនអាចលោក លឹម ហាក់ ប្រើស្ទីលឆោតល្ងង់ ប្តឹងភ្នាក់ងារកោះសន្តិភាពបានទេ ។ ម៉្យាងវិញទៀតច្បាប់ស្តីពីរបបសារព័ត៌មានជំពូក១ សិទ្ធិនិងសេរីភាពខាងសារព័ត៌មាន មាត្រា២ចែងថា សារព័ត៌មានមានសិទ្ធិរក្សាការសម្ងាត់ស្តីពីប្រភពព័ត៌មានរបស់ខ្លួន ។ ដូច្នេះការកោះហៅនេះគេយល់ថា គឺជាការបំបាក់ស្មារតីគំរាមកំហែងនិងបំភិតបំភ័យដល់អ្នកសារព័ត៌មានក្នុងបំណងធ្វើឱ្យសេរីភាពក្នុងការបញ្ចេញមតិលើវិស័យសារព័ត៌មានក្នុងលទ្ធិប្រជាធិបតេយ្យវិវត្តន៍ថយក្រោយ ។
ក្នុងច្បាប់នោះផងដែរក៏បានចែងថា បើសិនការសរសេរនោះជាការមិនពិតគឺត្រូវបកស្រាយនៅលេខក្រោយៗទៀតតាមទំព័រដែលបានចុះផ្សាយ និងគួរតែជននោះឆ្លើយបំភ្លឺតាមសារព័ត៌មានវិញទើបហៅថាមន្ត្រីនោះចេះដឹងជាមន្ត្រីមិនល្ងង់ខ្លៅ ៕
ចែករំលែកព័តមាននេះ