រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ កាលពីថ្ងៃទី១២ កុម្ភៈ ២០១៤ នេះ បានសម្រេចកាត់ទោសជនជាប់ចោទ១-ឈ្មោះកែវ សារឿន ភេទប្រុស អាយុ៥២ឆ្នាំ ជនជាតិវៀតណាម ២-ឈ្មោះប៊ុន ថា ភេទប្រុស អាយុ៤៨ ជនជាតិវៀតណាម ដាក់ពន្ធនាគារអស់មួយជីវិត និងពិន័យជាប្រាក់ម្នាក់ៗ៦០លានរៀល និងផ្តន្ទាទោសឈ្មោះពៅ បុប្ផា អាយុ៤៨ឆ្នាំ ជនជាតិវៀតណាមដាក់ពន្ធនាគារ៣០ឆ្នាំ និងពិន័យ៣០លានរៀល ដែលពាក់ព័ន្ធពីបទផលិត រក្សាទុក ដឹកជញ្ជូននូវគ្រឿងញៀន និងដឹកជញ្ជូនអាវុធខុសច្បាប់ដែលគ្មានការអនុញ្ញាតនៅក្នុងខណ្ឌចំការមន ខណ្ឌទួលគោក និងក្នុងខេត្តតាកែវកាលពីឆ្នាំ២០១៣កន្លងមក ។
ការប្រកាសសាលក្រមនេះ បានធ្វើឡើងនៅចំពោះមុខជនជាប់ចោទចំនួន២នាក់ ១-ឈ្មោះកែវ សារឿន ២-ឈ្មោះប៊ុន ថា ភេទប្រុសអាយុ៤៨ឆ្នាំ តែកំបាំងមុខឈ្មោះពៅ បុប្ផា ។ តុលាការបានអះអាងការប្រកាសសាលក្រមនេះធ្វើឡើងបន្ទាប់ពីសវនាការកាលពីថ្ងៃទី១៧ មករា ឆ្នាំ២០១៤ ហើយតុលាការទុកសិទ្ធិឲ្យជនជាប់ចោទប្តឹងឧទ្ធរណ៍រយៈពេល៣០ថ្ងៃ គឺគិតពេលថ្ងៃប្រកាសសាលក្រមប្រសិនបើមិនសុខចិត្ត ។
តុលាការរកឃើញនូវឧបករណ៍ជាច្រើនទៀត រួមមានពុម្ពក្បាលខ្លាសម្រាប់ផលិតថ្នាំញៀន សម្ភារសម្រាប់វេចខ្ចប់ថ្នាំញៀន និងកំប៉ុងទឹកដោះគោសម្រាប់ដាក់ ក៏ត្រូវបានរឹបអូសបំផ្លាញចោល ។ ចំពោះសម្ភារដទៃទៀតជាអចលនវត្ថុមានដី និងផ្ទះស្ថិតក្នុងខណ្ឌចំការមន និងក្នុងសង្កាត់ទឹកល្អក់៣ ខណ្ឌទួលគោក និងក្នុងខេត្តតាកែវជារបស់ជនជាប់ចោទត្រូវបានដកហូត ។ រថយន្ត Hummerពណ៌ខ្មៅ និងរថយន្តចំនួន២គ្រឿងទៀត កាំភ្លើងអាកា១ដើម មានគ្រាប់១៥គ្រាប់ កាំភ្លើងខ្លីចំនួន៣ដើម លិខិតឆ្លងដែនវៀតណាមចំនួនបី លុយដុល្លារចំនួន១ម៉ឺនដុល្លារអាមេរិក ព្រទ្យសម្បត្តិជាច្រើនទៀត និងមានសម្លៀកបំពាក់យោធា១សម្រាប់ត្រូវបានរកឃើញនិងដកហូត ។
ចែករំលែកព័តមាននេះ