ខេត្តកំពង់ចាម ៖ ក្មេងប្រុសស្រីពីរនាក់ត្រូវជាបងប្អូនបង្កើតនឹងគ្នា ដោយរាល់ថ្ងៃពួកគេរស់នៅជាមួយជីដូន ចំណែកឪពុកម្ដាយជាប់រវល់រកស៊ីលក់ដូរ ។ ខណៈពួកគេទាំងពីរនាក់បានជិះកង់មកលេងក្នុងបរិវេណវត្តស្វាយព័ន្ធ ក្នុងឃុំខ្ចៅ ស្រុកកងមាស ក៏បានចុះលេងទឹកស្រះក្នុងវត្ត…
ខេត្តកំពង់ចាម ៖ ក្មេងប្រុសស្រីពីរនាក់ត្រូវជាបងប្អូនបង្កើតនឹងគ្នា ដោយរាល់ថ្ងៃពួកគេរស់នៅជាមួយជីដូន ចំណែកឪពុកម្ដាយជាប់រវល់រកស៊ីលក់ដូរ ។ ខណៈពួកគេទាំងពីរនាក់បានជិះកង់មកលេងក្នុងបរិវេណវត្តស្វាយព័ន្ធ ក្នុងឃុំខ្ចៅ ស្រុកកងមាស ក៏បានចុះលេងទឹកស្រះក្នុងវត្ត ជាហេតុបណ្ដាលឱ្យលង់ស្លាប់ទាំងពីរនាក់ ។
សមត្ថកិច្ចមូលដ្ឋានបានប្រាប់ឲ្យដឹងនាព្រឹកថ្ងៃទី៥កញ្ញាថា: ចំពោះទីតាំងដែលក្មេងលង់ទឹកស្លាប់ នៅចំណុចស្រះក្នុងបរិវេណវត្ត មុនីរតនារាម(វត្តស្វាយព័ន្ធ) ស្ថិតនៅភូមិស្វាយព័ន្ធទី២ ឃុំខ្ចៅ ស្រុកកងមាស ខេត្តកំពង់ចាម ។ ហេតុការណ៍កើតឡើងនៅវេលាម៉ោង ៤និង៣០នាទីរសៀលថ្ងៃទី០៤ ខែសីហា ឆ្នាំ២០២៥ ប៉ុស្តិ៍នគរបាលរដ្ឋបាលខ្ចៅ បានទទួលព័ត៌មានពីលោកគង់ សៀកឡេង មេឃុំខ្ចៅ ថា នៅចំណុចស្រះក្នុងបរិវេណវត្តមុនីរតនារាម(វត្តស្វាយព័ន្ធ) ភូមិស្វាយព័ន្ធួទី២ ឃុំខ្ចៅ ស្រុកកងមាស ខេត្តកំពង់ចាម មានក្មេងលង់ទឹកចំនួន០២នាក់ ស្រី០១នាក់។
សមត្ថកិច្ចមូលដ្ឋានបន្តឲ្យដឹងថា ដំបូងម្ដាយនឹកស្មានថាកូនទាំងពីរនាក់នៅផ្ទះជីដូនចំណែកជីដូនវិញបាននឹកថាចៅទាំងពីរនៅផ្ទះម្ដាយរបស់គេ។បន្ទាប់មកទើបម្ដាយចេញទៅតាមរកក្នុងបរិវេណវត្តឃើញកង់មួយគ្រឿងនៅក្បែរមាត់ស្រះទឹកគឺជាកង់របស់កូន។ហើយអណ្ដែតនៅលើផ្ទៃទឹកជាស្បែកជើងរបស់កូនទើបស្រែកហៅគេឯងជួយ។
លោកវរៈសេនីយ៍ឯកជា ជួន អធិការនគរបាលស្រុកកងមាសបានឲ្យដឹងថា ក្រោយពីបានទទួលព័ត៌មាននេះភ្លាមរូបលោក បានចាត់តាំងកម្លាំងជំនាញផែនព្រហ្មទណ្ឌ ដឹកនាំដោយលោកវរសេនីយ៍ទោ ថុង ភូរីវុធ សហការជាមួយកម្លាំងប៉ុស្តិ៍នគរបាលរដ្ឋបាលខ្ចៅ ដោយមានការចូលរួមពីអាជ្ញាធរភូមិឃុំ គ្រូពេទ្យ ចុះទៅដល់ទីកន្លែងកើតហេតុធ្វើការស្រាវជ្រាវស៊ើបអង្កេត និងធ្វើការពិនិត្យទៅលើសាកសព ដោយបានបង្កើតគណៈកម្មការត្រួតពិនិត្យសាកសព សមាសភាពចូលរួមមាន៖
ជាលទ្ធផលពិនិត្យ
១-សពរងគ្រោះ ឈ្មោះ សេង វ៉ា អាយុ ភេទប្រុស អាយុ០៧ឆ្នាំ ជាតិខ្មែរ នៅភូមិស្វាយព័ន្ធទី២ ឃុំខ្ចៅ ស្រុកកងមាស ខេត្តកំពង់ចាម ។
២. សពរងគ្រោះ ឈ្មោះ សេង មុីជីង ភេទស្រី អាយុ០៥ឆ្នាំ ទាំង០២នាក់ ជាកូនរបស់ឈ្មោះ ៖
ឪពុកឈ្មោះ ហេង ឆេង ហ័រ (ហៅម៉ាប់) អាយុ៣៤ ជនជាតិខ្មែរ។
ម្ដាយឈ្មោះ អាង ណារី អាយុ៣០ឆ្នាំ ជនជាតិខ្មែរ មានទីលំនៅភូមិស្វាយព័ន្ធទី២ ឃុំខ្ចៅ ស្រុកកងមាស ខេត្តកំពង់ចាម។
ផ្នែកក្បាល មុខក្រោយពុំមានស្លាកស្នាមរបួស ឬបាក់បែកឆ្អឹងអ្វីឡើយ មានទឹកហូរចេញតាមច្រមុះ និងមាត់
-ផ្នែកក មុខក្រោយពុំមានស្លាកស្នាមរបួស ឬបាក់បែកឆ្អឹងអ្វីឡើយ
ផ្នែកដងខ្លួន ខ្នងក្រោយពុំមានស្លាកស្នាមរបួស ឬបាក់បែកឆ្អឹងអ្វីឡើយ
ផ្នែកអវ:យវ:ដៃជើងមុខក្រោយពុំមានស្លាកស្នាមរបួស ឬបែកបាក់ឆ្អឹងអ្វីឡើយ។
ការបំភ្លឺសាក្សី ផ្អែកតាមការបំភ្លឺរបស់ឈ្មោះ ជា ស៊ាក ភេទប្រុស អាយុ៦៨ឆ្នាំ បានបញ្ជាក់ថា នៅថ្ងៃទី០៤កញ្ញា ២០២៥ វេលាម៉ោង ៤និង៣០នាទីរសៀល ឈ្មោះអាង ណារី ភេទស្រី អាយុ៣០ឆ្នាំ នៅភូមិស្វាយព័ន្ធទី២ ឃុំខ្ចៅ ស្រុកកងមាស ខេត្តកំពង់ចាម ត្រូវជាម្តាយបង្កើតរបស់សពក្មេងទាំង០២នាក់ បានស្រែកឆោឡោថា កុងអើយជួយខ្ញុំផង ស្បែកជើងកូនខ្ញុំនៅក្នុងស្រះទឹក ខ្ញុំសង្ស័យថាកូនខ្ញុំលង់ទឹកស្លាប់ ភ្លាមនោះ ឈ្មោះ ជា ស៊ាក គាត់បានចុះរាវក្នុងទឹកស្រះនោះ ឃើញសពក្មេងទាំង០២នាក់នោះ យកមកទុកលើចិញ្ចើមស្រះ បានបន្តិចក្រោយមកមានមនុស្សជាច្រើននាំគ្នាទៅមើល។
ការសន្និដ្ឋានផ្អែកតាមការពិនិត្យវិភាគកន្លែងកើតហេតុ ផ្អែកតាមការបំភ្លឺរបស់សាក្សី ផ្អែកតាមការពិនិត្យសាកសពគណៈកម្មការយើងសន្និដ្ឋានបានថា ពិតជាលង់ទឹកស្លាប់ពិតប្រាកដមែន ដោយពុំពាក់ព័ន្ធទៅនឹងបទល្មើសព្រហ្មទណ្ឌឡើយ និងបានប្រគល់សាកសពរងគ្រោះអោយទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ