តើអ្នកធ្លាប់ខាំបបូរមាត់ខ្លួនឯងញឹកញាប់ ឬទទួលរងការប៉ះទង្គិចដែរទេ? ប្រសិនបើធ្លាប់ អ្នកគួរតែប្រុងប្រយ័ត្ន ព្រោះទម្លាប់នេះអាចបង្កឱ្យមានជំងឺ គីសបបូរមាត់ ដែលជាដុំពកតូចមួយមិនមានការឈឺចាប់ តែអាចរំខានដល់អារម្មណ៍ និងសោភណភាពរបស់អ្នក។

តាមការបកស្រាយពីមន្ទីរពេទ្យកាល់ម៉ែត ជំងឺនេះកើតឡើងនៅពេលដែល ក្រពេញទឹកមាត់តូចៗ ក្នុងមាត់របស់យើងដាច់រហែក ឬស្ទះ។ នៅពេលនោះ ទឹកមាត់ក៏ដក់នៅក្នុងជាលិកា ហើយរីកទៅជាដុំគីសឡើងប៉ោង។

តើធ្វើដូចម្ដេចទើបដឹងថាអ្នកមានជំងឺនេះ?
រោគសញ្ញាងាយសម្គាល់គឺ៖ ដុំពកនោះមានពណ៌ក្រហមថ្លា ឬខៀវ ហើយនៅពេលប៉ះនឹងមានសភាពទន់រលោង។

មូលហេតុចម្បង៖ ភាគច្រើនបណ្ដាលមកពីការខាំបបូរមាត់ខ្លួនឯង ឬការប៉ះទង្គិចផ្សេងៗ។

វិធីព្យាបាល៖
គីសតូចៗ អាចនឹងបាត់ទៅវិញដោយឯកឯង។
ចំណែកគីសធំៗ ដែលមានទំហំលើសពី ១ សង់ទីម៉ែត្រ គឺតម្រូវឱ្យធ្វើការវះកាត់ចេញ។

ដូច្នេះ ប្រសិនបើអ្នកសង្កេតឃើញមានរោគសញ្ញាទាំងនេះ សូមប្រញាប់ទៅជួបគ្រូពេទ្យជំនាញដើម្បីទទួលបានការព្យាបាលទាន់ពេលវេលា និងត្រឹមត្រូវ៕